ទាក់​ទង​ទៅ​និង​ផលិត​ផល​​របស់​ក្រុមហ៊ុន Apple ​មាន​ប្រភព​ជា​ច្រើន​បាន​រំពឹង​ថា ក្រុមហ៊ុន Apple នឹង​អាច​​​​ធ្វើ​ការ​បញ្ចេញ​នូវ​ជំនាន់​ថ្មី​នៃ​ iPhone, iPad និង iPad mini នា​ចុង​ឆ្នាំ​នេះ ។ យ៉ាង​ណា​មិញ​បើ​យោង​ទៅ​តាម​ពាក្យ​ចចាមអារ៉ាម​​ចុង​ក្រោយ​នេះ​បាន​ឲ្យ​ដឹង​ថា ​​កុំព្យូទ័រ​បន្ទះ​ស្ដើង​​​​ដែល​ទទួល​បាន​ប្រជា​ប្រិយ​ភាព​​របស់​ក្រុមហ៊ុន​មាន​បំពាក់​ដោយ​អេក្រង់​ទំហំ 7.9-inch ​​នឹង​ត្រូវ​ធ្វើ​ការ​អភិវឌ្ឍ​​ថ្មី​ជា​មួយ​​លក្ខណ​សម្បត្តិ​ជា​ច្រើន​ដែល​​មាន​​ភាព​ខុស​ប្លែក​គ្នា​​ទៅ​នឹង​ម៉ូដែល​ចាស់ (iPad mini) ។

យោង​តាម​ប្រភព MobiLeaks បាន​ឲ្យ​ដឹង​បន្ថែម​ថា ជំនាន់​ទី​២ នៃ iPad mini នឹង​អាច​បំពាក់​ដោយ​​អេក្រង់ Retina displasy ជា​មួយ​នឹង​កម្រិត​ភាព​ច្បាស់ 2048 x 1536 ដែល​អាច​ធ្វើ​ការ​បង្ហាញ​កម្រិត​ភាព​ច្បាស់ 324 pixels ក្នុង​ 1-inch និង​ថែម​ទាំង​​​​មាន​នូវ​លក្ខណ​សម្បត្តិ​ពិសេស CPU dual-core A6X processor របស់​ក្រុមហ៊ុន Apple ដែល​ធ្វើ​ឲ្យ​ផលិត​ផល​នេះ​មាន​ល្បឿន​កាន់​តែ​ប្រសើរ​ ។ ដោយ​ឡែក​ចំពោះ​កាមេរ៉ា​របស់​ផលិតផល​ក៏​នឹង​មាន​ការ​អភិវឌ្ឍ​ទៅ​លើ​កាមេរ៉ា​​ក្រោយ​ទំហំ 8MP ​និង​មុខ 2MP ផង​ដែរ (បញ្ជាក់ iPad mini បច្ចុប្បន្ន​ត្រូវ​បាន​បំពាក់​ដោយ​កាមេរ៉ា​ក្រោយ​ទំហំ 5MP និង មុខ 1.2MP ប៉ុណ្ណោះ​) ។ ក្រៅ​ពី​នេះ​ជំនាន់​ក្រោយ​របស់ iPad mini នឹង​មាន​កម្រាស់​ចន្លោះ​ពី 7.2mm ទៅ 7.5mm ហើយ​ក៏​ប្រហែល​ជា​​មាន​នូវ​ថាមពល​ថ្ម​ខ្លាំង​ជាង​មុន​​ផង​​​ក៏​ថា​បាន ។

សូម​បញ្ជាក់​ថា ​បើ​យោង​ទៅ​តាម​ប្រភព bgr បាន​ឲ្យ​ដឹង​ថា ​ក្រុមហ៊ុន Apple ត្រូវ​បាន​គេ​រំពឹង​ថា នឹង​អាច​ប្រកាស​ចេញ​​ជា​ផ្លូវ​ការ​នូវ​ជំនាន់​ថ្មី​របស់ iPad mini នា​ចុង​ឆ្នាំ​នេះ៕