ឪពុកម្តាយឧកញ៉ា ថោង សារ៉ាត់ ប្រកាសសុំទោសស្នងការក្រុងលោក ជួន សុវណ្ណ
ឪពុកម្តាយឧកញ៉ា ថោង សារ៉ាត់ ប្រកាសសុំទោសស្នងការក្រុង លោក ជួន សុវណ្ណ ជុំវិញការថ្លែងរិះគន់ស្នងការរូបនេះនៅក្នុងសន្និសីទកាសែត ក្រោយពេលអាជ្ញាធរតាមចាប់ខ្លួនឧកញ៉ាជាកូន។
អ្នកស្រី កែវ សារី ម្តាយឧកញ៉ា ថោង សារ៉ាត់ បានប្រាប់អ្នកយកព័ត៌មានអាស៊ីសេរី ផ្នែកភាសាវៀតណាម នៅក្រោយពេលព្រះរាជអាជ្ញាបញ្ចប់ការសាកសួរអ្នកស្រី និងប្ដី ថា ពាក្យសម្ដីដែលអ្នកស្រីបានថ្លែងក្នុងសន្និសីទកាសែតនោះ កើតឡើងដោយសារអ្នកស្រីមានកំហឹងខ្លាំងពេក នៅពេលដឹងថា អាជ្ញាធរចោទប្រកាន់កូនប្រុសថាជាមេក្លោងនៅពីក្រោយឃាតកម្មលើឧកញ៉ា អ៊ឹង ម៉េងជឺ។ អ្នកស្រីបញ្ជាក់ទៀតថា ក្នុងនាមជាម្តាយដែលស្រឡាញ់កូន គាត់ពិបាកក្នុងការគ្រប់គ្រងអារម្មណ៍ខ្លួនឯង នៅពេលកូនប្រុសត្រូវចោទប្រកាន់ និងតាមចាប់ខ្លួន ដែលតាមពិតអ្នកស្រីពុំមានចេតនារារាំងការស៊ើបអង្កេត ឬបំពេញការងារឡើយ។
កាលពីថ្ងៃទី៣ ខែធ្នូ អ្នកស្រី កែវ សារី និងប្ដី គឺលោក ថោង ចំរើន បានធ្វើសន្និសីទសារព័ត៌មានមួយ ក្នុងនោះបានចោទប្រកាន់ស្នងការនគរបាលរាជធានីភ្នំពេញ លោក ជួន សុវណ្ណ ថាមានបំណងអាក្រក់បំផ្លាញកិត្តិយសក្រុមគ្រួសារគាត់។ ពេលនោះ អ្នកស្រី កែវ សាវី បញ្ជាក់ថា សមត្ថកិច្ចបាននាំខ្លួនកូនប្រុសរបស់គាត់យកទៅសួរនាំ និងចាប់ខ្លួនអង្គរក្សកូនប្រុសគាត់ ដោយមិនមានដីកាបង្គាប់ពីតុលាការឡើយ។ អ្នកស្រីបន្តថា កូនប្រុសគាត់សម្រេចគេចខ្លួន ដោយសារតែខ្លាចស្នងការនគរបាលរាជធានីភ្នំពេញ ប្រើអំណាចគាបសង្កត់។ ស្របគ្នានោះ ស្ត្រីម្នាក់នេះថែមទាំងស្នើឲ្យនាយករដ្ឋមន្ត្រី ដក លោក ជួន សុវណ្ណ ចេញពីតំណែងទៀតផង។
អ្នកទាំងពីរ រួមនឹងសាច់ញាតិ ពីរនាក់ទៀតរបស់ លោក ថោង សារ៉ាត់ ត្រូវចាប់ខ្លួននៅយប់ថ្ងៃដដែល បន្ទាប់ពីធ្វើសន្និសីទសារព័ត៌មាននោះ ដោយចោទប្រកាន់ពីបទបរិហារកេរ្តិ៍ រារាំងកិច្ចការស៊ើបអង្កេតរបស់សមត្ថកិច្ច និងប្រើប្រាស់អាវុធខុសច្បាប់។
ទាក់ទិននឹងការប្រើប្រាស់អាវុធ អ្នកស្រី កែវ សារី អះអាងថា គាត់មានលិខិតអនុញ្ញាតអោយប្រើប្រាស់អាវុធចំនួន ៦ដើមដោយស្របច្បាប់។
រហូតមកដល់រសៀលថ្ងៃទី៦ ខែធ្នូ នេះ ឪពុក ម្តាយ ប្រពន្ធទី២ និងប្អូនប្រុសរបស់ លោក ថោង សារ៉ាត់ កំពុងត្រូវចៅក្រមសាលាដំបូងរាជធានីភ្នំពេញបន្តសាកសួរ។
សូមរង់ចាំអានព័ត៌មានពិស្ដារ…
ប្រភពពី វិទ្យុអាស៊ីសេរី
