សមត្ថកិច្ចចាប់ ខ្លួនតាចាស់ ល្មោភកាមម្នាក់ ដែលល្បួងក្មេង ស្រីអាយុ៦ឆ្នាំ ទៅរំលោភ
ខេត្តប៉ៃលិន ៖ តាចាស់ល្មោភតណ្ហាមិនស្គាល់វត្តវ៉ាស្គាល់តែគុកច្រវ៉ាក់ម្នាក់ ត្រូវបានកម្លាំងសមត្ថកិច្ចប៉ុស្តិ៍រដ្ឋបាលសង្កាត់ប៉ៃលិន ធ្វើការឃាត់ខ្លួន កាលពីវេលាម៉ោង១២ និង0៥នាទីថ្ងៃទី១១ ខែសីហា ឆ្នាំ២០១៣ បន្ទាប់ពីតាចាស់ល្មោភកាមម្នាក់នេះ បានធ្វើសកម្មភាពល្បួងក្មេងស្រីអាយុ៦ឆ្នាំម្នាក់យកទៅរំលោភនៅក្នុងបន្ទប់ទឹកមួយកន្លែងក្នុងវត្តពោធិ៍មារាម ហៅវត្តប៉ាហ៊ី ស្ថិតក្នុងសង្កាត់ប៉ៃលិន ក្រុងប៉ៃលិន។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនល្មើសដែលត្រូវចាប់ខ្លួនខាងលើនេះមានឈ្មោះ អ៊ុក សារី អាយុ៦៤ឆ្នាំ ជាអ្នករើសអេតចាយ នៅម្តុំកន្លែងកើតហេតុខាងលើ មានស្រុកកំណើតនៅភូមិអង្គរបូរី ឃុំព្រែកផ្ទោល ស្រុកអង្គរបូរី ខេត្តតាកែវ បច្ចុប្បន្នរស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន។ ចំណែកកុមារីរងគ្រោះឈ្មោះព.ម.ល អាយុ៦ឆ្នាំ មានស្រុកកំណើតនៅភូមិបឹងវាល ឃុំត្នោតជុំ ស្រុកក្រគរ ខេត្តពោធិ៍សាត់ សព្វថ្ងៃស្នាក់នៅបណ្តោះអាសន្នក្នុងវត្តពោធិមារាម ហៅវត្តប៉ាហ៊ី។
បើតាមការរៀបរាប់របស់ស្ត្រីជាម្តាយរបស់ក្មេងស្រីរងគ្រោះបានឲ្យដឹងថា នៅថ្ងៃកើតហេតុ កូនប្រុសច្បងរបស់គាត់បានរត់ទៅប្រាប់គាត់ថា មានតាចាស់រើសអេតចាយម្នាក់បានឱ្យលុយ៥០០រៀលទៅប្អូនស្រី របស់ខ្លួនរួចនាំចូលក្នុងបន្ទប់ទឹក។ គ្រាន់តែឮដូច្នេះរូបគាត់ក៏បានដើររកកូន ស្រាប់តែបានប្រទះឃើញបុរសចំណាស់រូបនេះកំពុងនៅក្នុងបន្ទប់ទឹកជាមួយកូនស្រីរបស់គាត់។ ភ្លាមៗនោះគាត់ក៏បានទៅប្តឹងសមត្ថកិច្ចឲ្យជួយអន្តរាគមន៍ចាប់ឃាត់ខ្លួនតាចាស់នេះតែម្តង។
ក្រោយពេលទទួលពាក្យបណ្តឹងភ្លាមៗ កម្លាំងសមត្ថកិច្ចក៏បានចុះទៅឃាត់ខ្លួនតាចាស់ល្មោភកាមម្នាក់នេះ យកមកកាន់ស្នាក់ការប៉ុស្តិ៍ដើម្បីធ្វើការសួរនាំ និងកសាងសំណុំរឿងចាត់ការទៅតាមនីតិវិធីច្បាប់៕
ប្រភពពី វត្តភ្នំ
