អ្នកមិនគាំទ្រថាថ្ងៃ៧មករាជាពេលវៀតណាមឈ្លានពាន ខណៈអ្នកគាំទ្រចាត់ទុកវៀតណាមជាអ្នកមានគុណ
ក្រុមអ្នកមិនគាំទ្រថ្ងៃ៧មករាទាំងក្នុង និងក្រៅប្រទេសបានហៅថ្ងៃ៧មករា គឺជាថ្ងៃដែលកងទ័ពវៀតណាមកុម្មុយនីស្តឈ្លានពានទឹកដីខ្មែរ និងត្រួតត្រាកម្ពុជា ខណៈក្រុមអ្នកគាំទ្រគណបក្សប្រជាជនកម្ពុជាចាត់ទុកវៀតណាមថាជាអ្នកមានគុណរបស់ពួកគេ ។ សេចក្តីថ្លែងការណ៍ដោយឡែកពីគ្នានេះ គឺចេញដោយលោក គង់ គាំ ប្រធានគណបក្ស សម រង្ស៊ី ប្រធានគណបក្សសង្គ្រោះជាតិប្រចាំសហរដ្ឋ អាមេរិក លោក គា រី និងប្រធានរណសិរ្សរំដោះជាតិខ្មែរ លោក សម សេរី ស្របពេលគណបក្សប្រជាជនកម្ពុជាអបអរទិវានេះយ៉ាងអធិអធម ។
សេចក្តីថ្លែងការណ៍របស់សមាជិកព្រឹទ្ធសភាគណបក្ស សម រង្ស៊ី លើកឡើងថា ថ្ងៃ៧មករា ជាថ្ងៃដែលកងទ័ពវៀតណាមប្រមាណម្ភៃកងពល ដែលមានពលទាហានប្រមាណ១២០០០០នាក់ចូលមកកម្ពុជា ហើយគណបក្សនេះចាត់ទុកថា “ជាទំព័រដ៏ខ្មៅងងឹតជានិច្ចនៃប្រវត្តិសាស្ត្ររបស់មាតុភូមិកម្ពុជា” ។ សេចក្តីថ្លែងការណ៍នេះបន្តថា អំណាច៧មករា បានបន្ត និងបម្រើមហិច្ចតាវៀតណាមត្រួតត្រាបានបន្តជម្លោះ កាប់សម្លាប់គ្នា រវាងខ្មែរក្រហមគ្នាឯង ដែលមានចិន-វៀតណាម និងសហភាពសូវៀតគាំទ្រផង និងប្រឆាំងកំចាត់ចលនាខ្មែរស្នេហាជាតិផ្សេងៗទៀត ដែលដឹកនាំដោយសម្តេចនរោត្តមសីហនុ ។
ដោយឡែកសេចក្តីថ្លែងការណ៍របស់គណបក្សសង្គ្រោះជាតិប្រចាំសហរដ្ឋអាមេរិកលើកឡើងថា ក្រោយពីការឈ្លានពានវៀតណាមបានលួចយកសម្ភារៈ គ្រប់បែបយ៉ាងទូទាំងនគរ យកទៅស្រុកគេ ហើយថាវៀតណាមបានបន្តផែនការសម្លាប់ប្រជារាស្ត្រខ្មែរយ៉ាងព្រៃផ្សៃតាមរូបភាពក៥ជាដើម ។
សេចក្តីថ្លែងការណ៍នោះបន្តថា វៀតណាមបានឱកាសលួចបង្ខិតដែនសីមា ប្រវ័ញ្ចយកកោះខ្មែរ ព្រមទាំងជាន់ឈ្លីលើសន្ធិសញ្ញាក្រុងប៉ារីស ហើយវៀតណាមបានបញ្ជូនជនជាតិខ្លួនចូលមករស់នៅក្នុងដីកម្ពុជារាប់លាននាក់ មកដណ្តើមផលប្រយោជន៍ប្រជាជនខ្មែរ ។
ព្រមគ្នានោះ សេចក្តីថ្លែងការណ៍របស់រណសិរ្សរំដោះជាតិខ្មែរ ដែលមេដឹកនាំអង្គការនេះត្រូវបានរដ្ឋាភិបាលប្រកាសចាប់ខ្លួននោះ លើកឡើងថា លោកហ៊ុន សែន ធ្លាប់បានធ្វើជាយោធាខ្មែរក្រហម ចូលព្រៃម៉ាគីជាមួយយៀកកុងតាមការអំពាវនាវរបស់សម្តេចឪ ជាពិសេសគឺជាការជ្រៀតជ្រែកក្នុងតុលាការកាត់ទោសខ្មែរក្រហមដោយមិនអនុញ្ញាតិឲ្យតុលាការកាត់ទោសមេដឹកនាំខ្មែរក្រហមបន្តទៀត ។ រណសិរ្សរំដោះជាតិខ្មែរនេះចាត់ទុកថា ការដឹកនាំបច្ចុប្បន្ននេះជា ប៉ុល ពតទី២ ដែលបម្រើនយោបាយកុម្មុយនីស្តឥណ្ឌូចិន បង្ហូរជនជាតិវៀតណាមឈ្លានពានពេញប្រទេសខ្មែរ ។
សេចក្តីថ្លែងការណ៍នេះ ជំរុញឲ្យលោក ហ៊ុន សែន ក្លាហានឡើងតុលាការអន្តរជាតិ និងបើកដៃឲ្យអន្តរជាតិរកយុត្តិធម៌ឲ្យប្រជាជនខ្មែរ វែកមុខឃាតករដែលសម្លាប់ខ្មែរអស់រាប់លាននាក់កន្លងមក ។
ប៉ុន្តែមុនពេលប្រារព្ធទិវា៧មករានេះ គឺក្នុងពិធីបើកការដ្ឋាសាងសង់អគាររដ្ឋបាលខេត្តត្បូងឃ្មុំ លោកនាយករដ្ឋមន្ត្រី ហ៊ុន សែន ចាត់ទុកថ្ងៃ៧មករា ជាថ្ងៃប្រវត្តិសាស្ត្រសម្រាប់ប្រជាពលរដ្ឋខ្មែរទូទៅ ហើយលោកហៅអ្នកដែលប្រឆាំងថ្ងៃ៧មករា ថាអ្នកនោះមានសម្ព័ន្ធភាពនឹងរបបខ្មែរក្រហម ។ លោកមានប្រសាសន៍ថា «ស្អប់ ប៉ុល ពត តែប្រឆាំងនឹងអ្នកផ្តួលរំលំ ប៉ុល ពត ។ អ៊ីចឹងមានន័យថាម៉េច មានន័យថាជាសម្ព័ន្ធភាពនៃរបប ប៉ុល ពត ។ អ៊ីចឹងសូមបញ្ជាក់ឡើងវិញ ថ្ងៃ៧មករា គឺជាថ្ងៃរបស់ប្រជាជនកម្ពុជា ដែលស្អប់ខ្ពើមរបបប្រល័យពូជសាសន៍ ប៉ុល ពត ផ្ទុយទៅវិញ វាជាសម្ព័ន្ធមិត្តរបស់ប៉ុលពត ក្នុងពេលដែលគេប្រឆាំង នឹងអ្នកផ្តួលរំលំរបបប៉ុលពត ហើយថ្ងៃ៧មករា មិនមែនក្រៅពីរបបប៉ុលពត មិនមានយកអ្នកណាធ្វើជាសត្រូវទេ»។
សាស្ត្រាចារ្យប្រវត្តិសាស្ត្រ និងនយោបាយលោកបណ្ឌិត សុខ ទូច លើកឡើងថា ថ្ងៃ៧មករាគឺជាថ្ងៃប្រវត្តិសាស្ត្រដែលវៀតណាមជួយរំដោះខ្មែរឲ្យផុតពីរបបប្រល័យពូជសាសន៍ ប៉ុន្តែរយៈពេលមួយឆ្នាំក្រោយពីវៀតណាមរំដោះហើយ មិនព្រមដកទ័ពទៅស្រុកគេវិញ គឺជាការឈ្លានពានទឹកដីខ្មែរ ៕
ប្រភពពី vodhotnews.com
