គ្រូបង្រៀននៅខេត្ដសៀមរាប ព្រមានចុះអវត្ដមានសិស្សដែលមិនចូលរួមពិធីរំឭកថ្ងៃ៧មករា
ក្រុមគ្រូបង្រៀននៅវិទ្យាល័យមួយចំនួន ក្នុងខេត្ដសៀមរាប ព្រមានចុះអវត្ដមានដាក់ពិន័យ ឬកាត់ពិន្ទុចំពោះសិស្សណាមិនចូលរួមពិធីរំឭកខួបលើកទី៣៦ នៃថ្ងៃ៧មករា ។
សិស្សនៅវិទ្យាល័យអង្គរ និងវិទ្យាល័យ១០មករា ខេត្ដសៀមរាប ដែលសុំមិនបញ្ចេញឈ្មោះ និងសំឡេងឲ្យ VOD ដឹងប្រហាក់ប្រហែលគ្នាថា ពួកគេមិនចង់ចូលរួមពិធីរំឭកខួបថ្ងៃ៧មរានៅនេះ ដោយសារជាថ្ងៃឈប់សម្រាក ហើយចង់នៅផ្ទះជួយការងារក្រុមគ្រួសារ ប៉ុន្ដែបែរជាអ្នកគ្រប់គ្រងសាលា បង្ខំឲ្យពួកគេទៅចូលរួមពិធីនេះទាំងពួកគេមិនពេញចិត្ដទៅវិញ ។ ពួកគេបន្ដថា នាយក នាយករងនៅវិទ្យាល័យទាំងពីរនេះ ប្រាប់ថាបើសិស្សានុសិស្សណាមិនចូលអបអរទិវា ៧មករា នៅថ្ងៃនេះ នោះនាយកសាលា ឬគ្រូប្រចាំថ្នាក់នឹងកាត់ពិន្ទុ ដាក់ពិន័យ ព្រមទាំងចុះអវត្ដមានដោយដាក់ថាឈប់អត់ច្បាប់ ។
VOD មិនអាចទាក់ទងនាយកវិទ្យាល័យ១០មករា ១៩៧៩ លោក គឹម ឡេង ដើម្បីសាកសួរពីបញ្ហានេះបានទេ ចំណែកនាយករងវិទ្យាល័យអង្គរ លោក ដួង និមល ក៏មិនអាចសុំបំភ្លឺបានដែរដោយលោកប្រាប់ថាទូរសព្ទច្រឡំលេខ ។
ប្រធានមន្ទីរអប់រំយុវជន និងកីឡាខេត្ដសៀមរាប លោក អ៊ុង សិរីឌី បដិសេធថាមិនមានគ្រូបង្រៀនណាគំរាមចុះអវត្ដមាន ឬកាត់ពិន្ទុសិស្សនោះទេ ។ លោកថា ថ្ងៃ៧មករានេះជាថ្ងៃបុណ្យជាតិ សិស្សសាលាត្រូវបានឈប់សម្រាក ។ ប៉ុន្ដែលោកថា ពិធីបុណ្យជាតិសិស្សត្រូវចូលរួមតាមការចាត់តាំង ។
ទោះជាយ៉ាងនេះក្ដី នាយកប្រតិបត្ដិវិទ្យាស្ថានខ្មែរសម្រាប់អភិវឌ្ឍន៍ជាតិ លោក សេង រិទ្ធី មានប្រសាសន៍ថាការបង្ខិតបង្ខំសិស្សឲ្យចូលរួមក្នុងពិធី ដែលមិនមានការយល់ព្រមពីសាមីខ្លួន ធ្វើឲ្យប៉ះពាល់ដល់សិទ្ធិសេរីភាពរបស់ពួកគេ ។ លោក សេង រិទ្ធី ហៅការចូលរួមរបស់សិស្សនៅថ្ងៃ៧មករានេះ ថាជាថ្ងៃគ្មានន័យសម្រាប់ពួកគេ ។
កាលពីខែមិថុនា ឆ្នាំ២០១៣ សភាឯកបក្សរបស់គណបក្សប្រជាជនកម្ពុជា បានអនុម័តច្បាប់ប្រឆាំងអ្នកមិនទទួលស្គាល់ឧក្រិដ្ឋកម្ម ដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ ។ ច្បាប់នោះចែងថា អ្នកមិនទទួលស្គាល់ឧក្រិដ្ឋកម្មក្នុងសម័យខ្មែរក្រហម ត្រូវដាក់ពន្ធនាគារពី៦ខែទៅ២ឆ្នាំ និងពិន័យជាប្រាក់ពី១លាន ដល់៤លានរៀល ៕
ប្រភពពី vodhotnews.com
