រាជរដ្ឋាភិបាលចំអកឲ្យចាស់ៗអាយុ៦០ឆ្នាំឡើងឲ្យទៅបើកប្រាក់ខែ៤ម៉ឺនរៀលពីបក្សប្រឆាំង
ប្រមុខរាជរដ្ឋាភិបាលនៅថ្ងៃចន្ទនេះ ថ្លែងសារលើកទឹកចិត្តដល់មន្ត្រីរាជការពីការដំឡើងប្រាក់ខែបន្ថែម ចាប់ពីដើមឆ្នាំ២០១៥នេះ និងបានចំអកដល់ចាស់ៗដែលមានអាយុចាប់ពី៦០ឆ្នាំឡើង ឲ្យទៅបើកប្រាក់ខែ៤ម៉ឺនរៀលពីបក្សប្រឆាំង ។
ក្នុងពិធីបើកការដ្ឋានសាងសង់អគាររដ្ឋបាលសាលាខេត្តត្បូងឃ្មុំ នាព្រឹកថ្ងៃទី៥ ខែមករា ឆ្នាំ២០១៥ លោកនាយករដ្ឋមន្ត្រីលោក ហ៊ុន សែន ថ្លែងថាមន្ត្រីរាជការថ្នាក់ក្រោមជាតិ នៅទូទាំងប្រទេស និងត្រូវដំឡើងប្រាក់ខែបន្ថែមទៀត លើប្រាក់ខែដែលមានស្រាប់ចាប់ពីខែមករាឆ្នាំ២០១៥នេះទៅ ។ ប៉ុន្តែលោកថា ចាស់ដែលមានអាយុ៦០ឆ្នាំឡើងទៅ នឹងត្រូវទៅទារខ្លួនឯងពីអ្នកដែលបានសន្យា ។ លោកមានប្រសាសន៍ថា «រឿង ចាស់ៗ ៤០០០០រៀលសូមអញ្ជើញទៅទារទៅ ខ្ញុំអត់បានសន្យាទេអាហ្នឹង ចាប់ពីអាយុ៦០ទៅទារទៅ អ្នកណាសន្យាទៅទារទៅ ខ្ញុំអត់ដឹងទេ ទៅទារទៅ ។ ករុណាខ្ញុំចង់តែប៉ុណ្ណឹងទេ ចង់ឲ្យប្រាក់ខែមន្ត្រីរាជការម្នាក់ឡើងដល់១០០០ដុល្លារឯណោះ ក៏ប៉ុន្តែស្រុកយើងវាមានអ៊ីចឹង គ្រូបង្រៀនរបស់យើងបានប៉ុណ្ណឹង ទាហានបានប៉ុណ្ណឹង ប៉ូលីសបានប៉ុណ្ណឹង ប៉ុន្តែអ្នកសន្យាដើម្បីផលប្រយោជន៍នៃសន្លឹកឆ្នោត គឺចេះតែសន្យា បន្ទាប់ទៅ តើគេធ្វើបានឬអត់? គឺជាចំណោទនៅបញ្ហា ។ អាយុជីវិតនៃអ្នកសន្យា យ៉ាងយូរ៦ខែ ខ្ញុំករុណានឹងចាត់ទុកថា គេត្រូវតែដួលរលំដាច់ខាតតែម្តង» ។
លោកនាយករដ្ឋមន្ត្រី ហ៊ុន សែន នាពេលកន្លងមក
បើទោះបីលោកនាយករដ្ឋមន្ត្រី ហ៊ុន សែន មិនបានបញ្ចេញឈ្មោះចំទៅគណបក្សប្រឆាំងក៏ដោយ ប៉ុន្តែគោលការណ៍៧ចំណុចរបស់គណបក្សសង្គ្រោះជាតិ ពេលយុទ្ធនាការឃោសនាបោះឆ្នោតក្នុងអាណត្តិទី៥នេះ មានធានាពីការផ្តល់ប្រាក់៤០០០០រៀលក្នុង១ខែ ដល់ចាស់ដែលមានអាយុចាប់ពី៦០ឆ្នាំឡើងទៅ ។
ក្រៅពីឌឺដងឲ្យបក្សប្រឆាំង លោកនាយករដ្ឋមន្ត្រីក៏បានក្រើនរំឭកឲ្យមន្ត្រីរាជការថ្នាក់ក្រោមជាតិ ត្រូវពង្រឹងគុណភាពការងារគ្រប់ស្ថាប័នដើម្បីឆ្លើយតប នឹងតម្រូវការចាំបាច់ របស់ពលរដ្ឋ និងអ្នកវិនិយោគគ្រប់ប្រភេទផងដែរ និងអំពាវនាវឲ្យអ្នកមានធនធានទៅវិនិយោគនៅខេត្តដែលទើបបង្កើតថ្មី នេះ ដើម្បីទប់ស្កាត់កម្មករចំណាកស្រុក ។ លោកបន្ថែមថា «សេវាសាធារណៈ ដែលត្រូវបានផ្តល់ឲ្យប្រជាពលរដ្ឋ ទាមទារឲ្យនូវល្បឿនលឿននិងមានគុណភាព តាំងពីអត្តសញ្ញាណប័ណ្ណ សំបុត្រកំណើត រឿងស្អីៗដែលវាជាការចង់បានរបស់ប្រជាពលរដ្ឋ ។ ការបញ្ជាក់ទាន់ទិននឹងរឿងនេះ រឿងនោះ ឬការសុំវិនិយោគ ឬការសុំនេះសុំនោះ ដែលជាការចាំបាច់របស់ប្រជាពលរដ្ឋត្រូវឆ្លើយតបក្នុងល្បឿនមួយលឿន និងប្រកបដោយគុណភាព» ។
ប្រធានស្តីទីគណបក្សសង្គ្រោះជាតិ លោក ប៉ុល ហំម សុំមិនអត្ថាធិប្បាយតបពីការលើកឡើងរបស់លោកនាយករដ្ឋមន្ត្រី ហ៊ុន សែន នេះទេ ប៉ុន្តែលោកថាបក្សប្រឆាំងមួយនេះ នៅតែប្រកាន់គោលការណ៍នេះដដែល ។
យ៉ាងនេះក្តី ខេត្តត្បូងឃ្មុំដែលទើបបំបែកចេញពីខេត្តកំពង់ចាមនេះ ជាខេត្តមួយដែលគណបក្សប្រជាជនកម្ពុជា ចាញ់សំឡេងឆ្នោតគណបក្សសង្គ្រោះជាតិក្នុងអាណត្តិទី៥នេះ ដោយបក្សប្រឆាំងទទួលបាន១០អាសនៈ គណបក្សកាន់អំណាចបាន៨អាសនៈ ក្នុងចំណោមអាសនៈសរុប១៨អាសនៈ ៕ ប្រភពៈ VOD
