រាជធានីភ្នំពេញ៖ មន្ត្រីនគរបាលព្រហ្មទណ្ឌរាជធានីភ្នំពេញ បាននាំខ្លួនអង្គរក្សលោកឧកញ៉ា ថោង សារ៉ាត់ ចំនួន៣នាក់ យកទៅសាកសួរនៅស្នងការដ្ឋាននគរបាល រាជធានីភ្នំពេញ ប៉ុន្តែមិនទាន់មានប្រភពអះអាងថាពាក់ព័ន្ធនឹងករណីអ្វីនោះនៅឡើយទេ។

ការឃាត់ខ្លួនខាងលើនេះ បានធ្វើឡើង កាលពីវេលា​ម៉ោង​១១​និង​២០​នាទី​ ​ថ្ងៃទី​១ ខែ​ធ្នូ ឆ្នាំ ២០១៤​នេះ ​នៅ​ចំណុច​មុខ​មន្ទីរ​ពេទ្យ​រុស្សី ស្ថិតក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ។

លោក ​ជួន ណារិន ស្នងការរងនគរបាលរាជធានីភ្នំពេញ ទទួលបន្ទុកព្រហ្មទណ្ឌ បាន​ឲ្យ​ដឹង​ទៀត​ថា សមត្ថកិច្ច​ពិតជាបាន​ឃាត់​ខ្លួន​អង្គរក្ស​លោក​ឧកញ៉ា​ផ្ទាល់​ម្នាក់​ និង​២​នាក់​ទៀត ​ជា​អ្នក​ជិះ​ម៉ូតូ​តាម​ការពារ​សុវត្ថិភាព​​ពី​ខាង​ក្រោយក់យកទៅសាកសួរនៅស្នងការដ្ឋាននគរបាលរាជធានីភ្នំពេញ ប្រាកដមែន។ ក្នុង​​​ហេតុ​ការណ៍​ឃាត់​ខ្លួន​​នោះ លោក​ឧកញ៉ា​ថោង​ សារ៉ាត់ ក៏​នៅ​​ទី​នោះ​ដែរ។

លោក ជួន ណារិន បានអះអាងថា នេះគ្រាន់តែជាការហៅទៅសាកសួរ ដើម្បីយកព័ត៌មាន​ មួយចំនួនប៉ុណ្ណោះ គឺសមត្ថកិច្ចនៅមិនទាន់សន្និដ្ឋានថា​ មនុស្សទាំង៣នាក់នេះពាក់ព័ន្ធនឹង អំពើឃាតកម្មលើលោកឧកញ៉ា អ៊ឹង ម៉េងជឺ នៅឡើយទេ ព្រោះកំពុងធ្វើការសាកសួរ និងផ្ទៀង ផ្ទាត់ព័ត៌មាន។

ចំណែកព័ត៌មានដែលថា ចាប់ខ្លួនលោកឧកញ៉ា ថោង សារ៉ាត់  ថៅកែ​ម្ចាស់​បុរី​៩៩៩​នោះ លោកស្នងការរង ជួន សារិន និងបដិសេធថា មិនបានចាប់ខ្លួនលោកឧកញ៉ាទេ ប៉ុន្តែគេអាចភ័ន្តច្រឡំ នៅពេលដែល លោកឧកញ៉ា​ ថោង សារ៉ាត់ ជិះរថយន្តទៅមើលអង្គរក្សទាំង៣របស់លោកដែលត្រូវសមត្ថ កិច្ចហៅយកទៅសួរនាំនៅស្នងការនគរបាលរាជធានីភ្នំពេញ៕

លោកឧកញ្ញ៉ា ​ថោង សារ៉ាត់

ប្រភពពី Free Press Magazine