គ.ជ.ប ថ្មីកើតឡើងដូចការចង់បានរបស់បក្សកាន់អំណាច
គ.ជ.ប ថ្មីដែលគណបក្សនយោបាយទាំង២ ព្រមព្រៀងគ្នាបង្កើតនៅចុងខែកុម្ភៈ ឆ្នាំ២០១៥ គឺដូចទៅអ្វីដែលគណបក្សកាន់អំណាចចង់បាន ព្រោះសមាជិកស្ថាប័ននេះ ត្រូវមានសញ្ជាតិខ្មែរពីកំណើត និងត្រូវមានសញ្ជាតិតែមួយពេលកំពុងធ្វើការ។ ចំណែករឿងទី២ គឺបេក្ខជន ជ.គ.ប មិនត្រូវជាប់ញាតិពន្ធ ឬញាតិលោហិតនឹងថ្នាក់ដឹកនាំគណបក្សនយោបាយ។
មុនពេលចេញកិច្ចព្រមព្រៀងនេះ គណបក្សសង្គ្រោះជាតិ និងគណបក្សប្រជាជនកម្ពុជា មិនចុះសម្រុងគ្នាលើបញ្ហាសញ្ជាតិ និងញាតិលោហិតអ្នកនយោបាយនៅក្នុងស្ថាប័នឯករាជ្យមួយនេះទេ។
តំណាងគណបក្សប្រជាជនកម្ពុជា លោក កើត រិទ្ធ ប្រសាសន៍ថា ការព្រមព្រៀងបង្កើត គ.ជ.ប ថ្មីនៅពេលនេះ គឺដើម្បីធានាថា គ.ជ.ប ថ្មី មានអព្យាក្រឹតភាព មានឯករាជភាព គោរពគោលការណ៍ប្រជាធិបតេយ្យ និងធានាថា មិនជាប់គាំងនៅពេលខាងមុខ។ លោកថា នៅសប្ដាហ៍ក្រោយ ក្រុមការងារបច្ចេកទេសរបស់គណបក្សទាំងពីរជួបចរចាគ្នាបន្តទៀត៖ «សំឡេង»។
ការចេញសេចក្ដីថ្លែងការណ៍រួមនេះ គឺក្រោយពីមានជំនួបសម្ងាត់រវាងលោកនាយករដ្ឋមន្ត្រី ហ៊ុន សែន និងលោក សម រង្ស៊ី នៅរដ្ឋសភាជាងមួយម៉ោងនៅព្រឹកថ្ងៃទី២៨ ខែវិច្ឆិកា។ សេចក្ដីប្រកាសរួមដែលចុះហត្ថលេខាដោយថ្នាក់ដឹកនាំកំពូលទាំងពីរបញ្ជាក់ថា គ.ជ.ប ថ្មី នឹងកើតចេញនៅចុងខែកុម្ភៈ ឆ្នាំ២០១៥។ សេចក្ដីប្រកាសរួមនោះ គឺគណបក្សសង្គ្រោះជាតិ មានសិទ្ធិបើកទូរទស្សន៍និងវិទ្យុដោយមានការសហការជាមួយក្រុមហ៊ុនឯកជន។
ចំណែកលោក គួយ ប៊ុនរឿន តំណាងគណបក្សសង្គ្រោះជាតិ ថ្លែងប្រាប់ក្រុមអ្នកសារព័ត៌មានថា កិច្ចព្រមព្រៀងនេះ គឺគណបក្សទាំងពីរបានបញ្ចប់រឿងចម្រូងចម្រាសដែលនៅសេសសល់នៅពេលកន្លងមក។ ចំពោះរឿងសញ្ជាតិ លោក គួយ ប៊ុនរឿន បន្តថា អ្នកដែលមានសញ្ជាតិពីរដែលលះបង់នោះ ពួកគេអាចស្នើសុំសញ្ជាតិមកវិញបាននៅពេលពួកគេឈប់ធ្វើការងារនៅស្ថាប័នបោះឆ្នោតនេះ៖ «សំឡេង»។
ទាក់ទងរឿងសញ្ជាតិនេះដែរ បេក្ខជនទី៩នៃស្ថាប័ន គ.ជ.ប អ្នកស្រី ពុង ឈីវកេក ដែលមានសញ្ជាតិពីរ បដិសេធមិនធ្វើអត្ថាធិប្បាយនោះទេ។ ចំណែកលោក សម រង្ស៊ី ប្រធានគណបក្សសង្គ្រោះជាតិ ក៏បដិសេធមិនឆ្លើយសំណួររបស់វិទ្យុអាស៊ីសេរីដែរ ក្រោយពេលចុះហត្ថលេខាស្ដីពីកិច្ចព្រមព្រៀងនេះ។
ក្រោយចេញសេចក្ដីថ្លែងការណ៍រួម តំណាងគណបក្សប្រជាជនកម្ពុជា លោក កើត រិទ្ធ បញ្ជាក់ថា ក្នុងករណីដែល គ.ជ.ប ថ្មីនេះមានភាពមិនប្រក្រតី ឬមិនអាចដំណើរការទៅមុខបាន រដ្ឋសភាអាចបោះឆ្នោតរំលាយវិញបានដោយសំឡេង ៥០ភាគរយបូក១។ ប្រធានស្ថាប័ននេះ នឹងជ្រើសរើសដោយគណបក្សមានសំឡេងឆ្នោតទាំងពីរ ដោយរូបមន្ត ៤ + ៤ + ១ ដែលបោះឆ្នោតផ្ដល់ការទុកចិត្តដោយសភា។
ក្រសួងព័ត៌មានយល់ព្រមផ្ដល់ហ្វ្រេកង់ទូរទស្សន៍អោយគណបក្សសង្គ្រោះជាតិ
លិខិតរបស់ក្រសួងព័ត៌មាន ផ្ញើជូនក្រុមហ៊ុន ខេមបូឌា អ៊ីនឌីផេនដេន មេឌា (Cambodian Independent Media) ដែលតំណាងអោយគណបក្សសង្គ្រោះជាតិ នៅថ្ងៃទី២៧ ខែវិច្ឆិកា បញ្ជាក់ថា ក្រុមហ៊ុននេះអាចរៀបចំសំណុំបែបបទប្រើប្រាស់ប៉ុស្តិ៍ទូរទស្សន៍ ដែលក្រសួងបានដកហូតពីក្រុមហ៊ុនទូរទស្សន៍ខ្សែកាបរាជធានីភ្នំពេញ។
លិខិតដដែលបញ្ជាក់ថា ហ្វ្រេកង់ទូរទស្សន៍នេះនឹងប្រើប្រាស់ប្រព័ន្ធអាណាឡូក (Analog) ដែលមានកម្លាំងផ្សាយ ១០គីឡូវ៉ាត់ក្នុងរាជធានីភ្នំពេញ និង ១គីឡូវ៉ាត់សម្រាប់ការផ្សាយបន្តតាមបណ្ដាខេត្ត៕
ប្រភពពី វិទ្យុអាស៊ីសេរី
