អាជ្ញាធរខេត្តមណ្ឌលគិរីអំពាវនាវឲ្យជនជាតិដើមព្នងឈប់បង្កើតភូមិថ្មីក្នុងតំបន់ព្រៃអភិរក្ស
អាជ្ញាធរស្រុកពេជ្រាដា ខេត្តមណ្ឌលគិរី នៅថ្ងៃទី២៨ ខែវិច្ឆិកា អំពាវនាវឲ្យអ្នកភូមិជនជាតិព្នង បញ្ឈប់ការតាំងទីលំនៅ និងបង្កើតភូមិខុសច្បាប់ក្នុងតំបន់អភិរក្សភ្នំណាមលៀរ ហើយវិលត្រឡប់មកភូមិដែលពួកគាត់កំពុងរស់នៅបច្ចុប្បន្នវិញ។
ចំណែកអ្នកភូមិអះអាងថា ពួកគាត់ជួបការលំបាកពេលរស់នៅក្នុងភូមិចាស់ ទើបនាំគ្នាទៅតាំងទីលំនៅបង្កើតភូមិថ្មី។
ការអំពាវនាវនេះ ធ្វើឡើងបន្ទាប់ពីប្រជាពលរដ្ឋជាង ១០០គ្រួសារ បានបដិសេធមិនចាត់តំណាងទៅជួបពិភាក្សាជាមួយអាជ្ញាធរស្រុក ជុំវិញការតាំងទីលំនៅខុសច្បាប់នៅតំបន់ដីរដ្ឋ ដែលដកហូតពីក្រុមហ៊ុនសម្បទានសេដ្ឋកិច្ច អិល.ខេ.អិល (LKL)។
កាលពីខែតុលា ប្រជាពលរដ្ឋភូមិប៊ូស្រា និងភូមិពូទឺត ជាង ១០០គ្រួសារ នាំគ្នាទៅសង់រោងស្នាក់នៅក្នុងដីសម្បទានចម្ងាយប្រមាណ ២០គីឡូម៉ែត្រពីភូមិចាស់ និងឋិតនៅប្រមាណ ២គីឡូម៉ែត្រពីប៉ុស្តិ៍ការពារព្រំដែនង៉ាន់ទទឹង ជាប់នឹងប្រទេសវៀតណាម ក្នុងគោលបំណងរៀបចំកន្លែងនោះជាភូមិថ្មី។
ទាក់ទិនករណីនេះ អភិបាលរងស្រុកពេជ្រាដា លោក ខាំ ដារ៉ា ចាត់ទុកទង្វើប្រជាពលរដ្ឋ ថាជាអំពើខុសច្បាប់ ដោយហេតុថា ដីដែលប្រជាពលរដ្ឋចូលទៅតាំងទីលំនៅជាដីតំបន់អភិរក្ស ឋិតក្រោមការគ្រប់គ្រងរបស់ក្រសួងបរិស្ថាន។ លោកបន្តថា អ្នកភូមិត្រូវវិលទៅភូមិពួកគាត់ធ្លាប់រស់នៅ ហើយស្នើសុំដីសម្បទានសង្គមកិច្ច ប្រសិនពលរដ្ឋណាគ្មានដី៖ «ជាក់ស្តែងព្រៃទេ ភូមិចាស់តាំងពីសម័យណាទេ បាទ! មិនអនុញ្ញាតឲ្យទេ អ៊ីចឹងឲ្យគាត់វិលមកវិញ ដើម្បីយើងរកដីសង្គមកិច្ចឲ្យពួកគាត់»។
អាជ្ញាធរឃុំប៊ូស្រា ឲ្យដឹងថា រហូតបច្ចុប្បន្ន តួលេខប្រជាពលរដ្ឋចូលទៅសង់រោងប្រក់តង់កៅស៊ូរស់នៅក្នុងតំបន់អភិរក្សភ្នំណាមលៀរ កើនដល់ជិត ២០០គ្រួសារ។ ប្រជាពលរដ្ឋមកតាំងទីលំនៅបែកជាពីរក្រុម នាំគ្នាវាស់ដីក្បាលទំហំ ៥០ម៉ែត្រតាមបណ្តោយផ្លូវក្រុមហ៊ុន អិល.ខេ.អិល សាងសង់សម្រាប់ចែកគ្នាតាំងទីលំនៅ។
ឆ្លើយតបចំពោះការអំពាវនាវនេះ តំណាងអ្នកតាំងទីលំនៅថ្មី អ្នកស្រី កប់ លេត បដិសេធថា ពួកគាត់មិនចាកចេញទៅភូមិចាស់វិញទេ ពីព្រោះតំបន់នេះ គឺជាអតីតភូមិរបស់ពួកគាត់មានដីសម្រាប់ធ្វើស្រែប្រមាណ ២០០ហិកតារ។ ម្យ៉ាងវិញទៀត អ្នកភូមិសំឡឹងឃើញពីសក្ដានុពលផ្នែកសេវាកម្មទេសចរណ៍។ អ្នកភូមិទាមទាររស់នៅទីនេះ ដើម្បីការពារធនធានព្រៃឈើ បម្រើឲ្យវិស័យទេសចរណ៍សហគមន៍។ អ្នកស្រីបន្តថា សហគមន៍ជនជាតិដើមមានប្រពៃណីរស់នៅអាស្រ័យធនធានធម្មជាតិ ហេតុនេះការតាំងទីលំនៅថ្មីក្នុងព្រៃធម្មជាតិ គឺជាប្រពៃណីអ្នកភូមិច្រើនជំនាន់មកហើយ៖ «ប្រជាពលរដ្ឋនៅតែបោះទីតាំងហ្នឹង គាត់អត់ព្រមចាកចេញទេ គាត់ប្រក់តង់បម្រុងធ្វើផ្ទះ។ តង់ និងរោងហ្នឹងជាង៤០ គាត់នៅផ្ដុំគ្នាសិន»។
ផ្ទុយពីការអះអាងរបស់អ្នកភូមិ ប្រធានភូមិពូទឺត លោក ស្រេង អៀច អះអាងថា អាជ្ញាធរស្រុកបានតម្រូវឲ្យអាជ្ញាធរភូមិ និងឃុំ រៀបចំប្រជុំណែនាំជាថ្មី ឲ្យប្រជាពលរដ្ឋទាំងនោះវិលមកភូមិចាស់វិញ។ ចំណែកអាជ្ញាធរឃុំ ក៏គ្រោងជួបប្រជុំជាមួយតំណាងអ្នកតាំងទីលំនៅថ្មីនៅចុងសប្ដាហ៍ ឬដើមសប្ដាហ៍ក្រោយ៖ «តាមស្រុកចង់ឲ្យខ្ញុំប្រមូលគាត់មកវិញ ប៉ុន្តែខ្ញុំមិនដឹងធ្វើម៉េច គាត់មិនព្រមមក។ ខ្ញុំស្តាប់ស្រុកប្រើដែរ តែខ្ញុំជួយប្រជាពលរដ្ឋដែរ»។
ទោះជាយ៉ាងនេះក៏ដោយ មន្ត្រីសម្របសម្រួលសមាគមអាដហុក (adhoc) ខេត្តមណ្ឌលគិរី លោក សុក រដ្ឋា សំណូមពរឲ្យអាជ្ញាធរពិចារណាឡើងវិញ ជុំវិញការតាំងទីលំនៅនេះ។ លើសពីនេះ លោកបង្ហាញពីផលវិជ្ជមានដែលថា ការតាំងទីលំនៅរបស់អ្នកភូមិជនជាតិដើម មិនមានផលប៉ះពាល់ព្រៃឈើ ឬតំបន់អភិរក្សនោះឡើយ។ អ្នកភូមិ នឹងចូលរួមការពារព្រៃឈើបានងាយស្រួល ចំណែកការបង្កើតភូមិជិតតំបន់ព្រំដែន ក៏ជាការរួមចំណែកការពារទឹកដីនៅតំបន់នោះ។
ទីស្ដីការគណៈរដ្ឋមន្ត្រី កាលពីខែតុលា ឆ្នាំ២០១៤ បានដកហូតដីជិត ៦ពាន់ហិកតារក្នុងតំបន់អភិរក្សភ្នំណាមលៀរ ពីក្រុមហ៊ុនសម្បទានសេដ្ឋកិច្ច អិល.ខេ.អិល ប្រគល់ឲ្យក្រសួងបរិស្ថាន បន្ទាប់ពីប្រជាពលរដ្ឋឃុំប៊ូស្រា ជាង ៨០០នាក់ ធ្វើបាតុកម្មប្រឆាំងក្រុមហ៊ុន ដែលប្រើកងសន្តិសុខបាញ់គំរាមមិនឲ្យអ្នកភូមិចូលទៅធ្វើស្រែចម្ការនៅតំបន់នោះ៕
ប្រភពពី វិទ្យុអាស៊ីសេរី
