សមត្ថកិច្ចរារាំងអ្នកតវ៉ារកអន្តរាគមន៍រឿងដីមិនឲ្យទៅសភា
សមត្ថកិច្ចចម្រុះជិត ១០០នាក់ នៅព្រឹកថ្ងៃទី២៨ ខែវិច្ឆិកា រារាំងអ្នកតវ៉ាដីធ្លីប្រមាណ ១០០នាក់ដែរនោះ មិនឲ្យដើរឆ្ពោះទៅកាន់មន្ទីររដ្ឋសភា ខណៈពេលដែលពួកគេស្វែងរកអន្តរាគមន៍ឲ្យមានការដោះលែង ព្រះសង្ឃនិងសកម្មជនដីធ្លីដែលកំពុងជាប់ឃុំនៅក្នុងពន្ធនាគារព្រៃស។ ការរារាំងនេះ ដោយហេតុថា មានកិច្ចប្រជុំពេញអង្គពីថ្នាក់កំពូលនៃបក្សទាំងពីរ ទាក់ទងការអនុម័តថវិកាជាតិនៅរដ្ឋសភា។
ពលរដ្ឋរងគ្រោះដីធ្លីជិត ១០០នាក់នោះ មកពីសហគមន៍បឹងកក់ បុរីកីឡា និងឡពាង សម្រេចនាំគ្នាទៅតវ៉ានៅក្រសួងយុត្តិធម៌វិញ។ ការប្រមូលផ្តុំគ្នាដោយស្រែកតវ៉ានៅពីមុខក្រសួងយុត្តិធម៌ក្នុងបំណងស្នើឲ្យរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ជួយអន្តរាគមន៍ដោះលែងព្រះសង្ឃ សកម្មជនដីធ្លី និងសកម្មជនគណបក្សនយោបាយសរុបចំនួន ១៨នាក់ នេះបន្ទាប់ពីតុលាការសម្រេចឃុំខ្លួននៅពន្ធនាគារព្រៃស។
លោក លឹម សំអឿន ជាស្វាមីរបស់លោកស្រី ហេង ពេជ្រ រស់នៅបឹងកក់ ថ្លែងថា លោកមិនមានបំណងអ្វីក្រៅពីស្នើសុំរដ្ឋមន្រ្តីក្រសួងយុត្តិធម៌ ជួយផ្តល់យុត្តិធម៌ដល់ភរិយារបស់លោក និងអ្នកផ្សេងទៀតដែលកំពុងជាប់ឃុំ៖ «ស្នើសុំអង្វរដល់រដ្ឋមន្រ្តីក្រសួងយុត្តិធម៌សុំអោយមានការដោះលែង ការដែលចាប់ដាក់ពន្ធនាគារព្រៃសយ៉ាងនេះ ធ្វើឲ្យនៅផ្ទះបួនដប់នាក់កំព្រាអត់មានម្តាយ ធ្លាប់តែរកម្ដាយ ធ្វើឲ្យលំបាកនៅក្នុងគ្រួសារ»។
តុលាការដំបូងរាជធានីភ្នំពេញ សម្រេចចោទប្រកាន់ស្រ្តីជាសកកម្មជនដីធ្លី ១០នាក់ និងព្រះសង្ឃ ១អង្គពីបទបង្កស្ទះចរាចរណ៍សាធារណៈ និងប្រឆាំងមន្រ្តីសាធារណៈ ដោយពិន័យជាប្រាក់ ១នាក់ ២លានរៀល និងឲ្យជាប់ពន្ធនាគារ ១នាក់ ១ឆ្នាំ៕
ប្រភពពី វិទ្យុអាស៊ីសេរី
