គណបក្សប្រជាជនកម្ពុជា រិះគន់លោកសមរង្ស៊ី ពាក់ព័ន្ធនឹងការអភិវឌ្ឍ ភ្នំបូកគោ នៅខេត្តកំពត
ភ្នំពេញ:
គណបក្សប្រជាជនកម្ពុជា បានចេញផ្សាយនូវអត្ថបទរិះគន់លោកសមរង្ស៊ី
ពាក់ព័ន្ធនឹងការអភិវឌ្ឍន៍ ភ្នំបូកគោ ក្នុងខេត្តកំពត។ អត្ថបទ
ដែលបានចេញផ្សាយលើវេបសាយផ្លូវការរបស់គណបក្សនេះ នៅថ្ងៃទី១៨
ខែកុម្ភៈ ឆ្នាំ២០១៤ ដោយបានគូសបញ្ជាក់ថា លោកសមរង្ស៊ី
មានចរឹតរើសអើងពូជសាសន៍នឹងវៀតណាម។អត្ថបទ ដែលមានចំណងជើងថា “សមរង្ស៊ីមិនសប្បាយចិត្តនឹងការអភិវឌ្ឍភ្នំបូកគោទេ” ចេញផ្សាយ នៅថ្ងៃអង្គារ ទី១៨ ខែកុម្ភៈ ឆ្នាំ២០១៤ បានបង្ហាញថា ប្រធានគណបក្សសង្គ្រោះជាតិលោកសមរង្ស៊ី បានសម្តែងភាពមិនសប្បាយចិត្ត ក្រោយការឃើញដំណើរការ អភិវឌ្ឍភ្នំបូកគោ ដែលកាលពីមុនភ្នំបូកគោ មិនដែលមានការធ្វើថ្នល់យ៉ាងស្អាតចុះ ឡើងយ៉ាងស្រួលដូចនាពេលនេះទេ។
គេហទំព័រដដែល បានលើកឡើងថា ផ្លូវឡើងទៅលើភ្នំបូកគោ ដែលស្ថាបនាក្នុងអំឡុងទសវត្ស ឆ្នាំ៦០ នាអតីតកាល មានសភាពតូចចង្អៀត ដែលពិបាកគេចនឹងរថយន្តបើកចុះឡើងភ្នំ ដែលមានចំណោតជាខ្លាំងណាស់ ខុសនឹងសម័យបច្ចុប្បន្ន ដែលបានពង្រីកថ្នល់ចាក់កៅស៊ូយ៉ាងស្អាត”ប្រែក្លាយទីចំណោតលែងអោយ មានការពិបាក” បានធ្វើស្ពានថ្មី និងបានរៀបចំជាកន្លែងសំចតតាមដំណាក់នៃកន្លែងនីមួយៗ រហូតដល់លើ ភ្នំទៀតផង។
អត្ថបទដដែល បានបង្ហាញថា ភ្នំបូកគោ ដែលពីមុនតែសំណង់កាស៊ីណូ និងសំណង់លំហែកាយតិចតួច ត្រូវគេឃើញថា បានប្រែមុខមាត់ ដោយសារតែការអភិវឌ្ឍដ៏លឿននាបច្ចុប្បន្ន ប៉ុន្តែលោកសមរង្ស៊ី បានបង្ហាញអារម្មណ៍កាលពីចុងសប្តាហ៍កន្លងមកនេះ ថា លោកមិនសប្បាយចិត្ត ចំពោះការអភិវឌ្ឍទាំងនេះទេ។
អត្ថបទ បានកត់សម្គាល់ថា លោកសមរង្ស៊ី ដែលមានចរឹតរើសអើងពូជសាសន៍នឹងវៀតណាម បានចោទថា ការអភិវឌ្ឍន៍ភ្នំបូកគោនេះ គឺស្ថិតក្រោមការគ្រប់គ្រងអ្នកវិនិយោគ ដែលមានសញ្ជាតិវៀតណាម។ លោកនិយាយចោទថា ការធ្វើវិនិយោគដោយអ្នកមានសញ្ជាតិវៀតណាម មិនត្រឹមតែលក្ខណៈបំរើវិស័យទេសចរណ៍ និងការហោះហើរតាមផ្លូវអាកាស គឺបានបំរើផលប្រយោជន៍វៀតណាម និងលោកបានចោទទៀតថា វិនិយោគរបស់វៀតណាម គឺជាការដាក់អាណានិគមត្រួតត្រាវៀតណាមមកលើកម្ពុជា។
គេហទំព័រ ដដែល បានលើកឡើងថា “សម្តីនិយាយបង្ហាញភាពរើសអើងនឹងជាតិសាសន៍វៀតណាមនេះ ត្រូវគេឃើញថា គឺជានយោបាយផ្តាច់មុខរបស់គណបក្សសង្គ្រោះជាតិទៅហើយ ដើម្បីការស្វែងរកអ្នកគាំទ្រជាពិសេសចង្កោមអ្នកគាំទ្រពីខ្មែរកម្ពុជា ក្រោមខ្លះ ដែលមានកំហឹងចំពោះវៀតណាមទាក់ទងនឹងប្រវត្តិសាស្ត្របាត់ទឹកដីកម្ពុជា ក្រោម។ ការវាយសម្លាប់ជនជាតិវៀតណាម កាលពីចុងសប្តាហ៍នេះ ត្រូវគេឃើញថា គឺដោយសារតែកំហឹងញុះញង់ប្រកាន់ពូជសាសន៍ស្អប់វៀតណាមនោះផងដែរ”។
អត្ថបទរបស់គណបក្សប្រជាជនកម្ពុជា ក៏បានលើកឡើងថា ដោយឡែកសង្ឃមួយក្រុម ដែលប្រើឈ្មោះសង្ឃឯករាជ្យ ដែលគេឃើញតែងប្រើអំពើហិង្សា និងប្រព្រឹត្តខុសនឹងវិន័យធម៌សាសនាព្រះពុទ្ធ ក៏ជាក្រុមសង្ឃ ដែលមានមេកើយដឹកនាំជាសង្ឃខ្មែរកម្ពុជាក្រោម ដែលមានគំនុំរើសអើងពូជសាសន៍នឹងវៀតណាមនោះផងដែរ ដែលចរឹតរើសអើងពូជសាសន៍ មិនអាចកែបាននេះហើយ ត្រូវគេបារម្ភអំពីការកំពុងអុជអាល ចង់ដុតបញ្ឆេះអោយកម្ពុជាអោយធ្លាក់ក្នុងសង្គ្រាមស៊ីវិលម្តងទៀត។
មិនទាន់មានអត្ថាធិប្បាយបែបណាពីលោកសមរង្ស៊ី ពាក់ព័ន្ធនឹងអត្ថបទខាងលើទេ។ ប៉ុន្តែកាលពីថ្ងៃចន្ទ ទី១៧ ខែកុម្ភៈ ឆ្នាំ២០១៤ គណបក្សសង្គ្រោះជាតិ បានចេញសេចក្តីថ្លែងការណ៍អំពាវនាវដល់ពលរដ្ឋខ្មែរទាំងអស់ បញ្ចប់នូវវប្បធម៌ហិង្សា ក្នុងសង្គមគ្រប់ប្រភេទ ហើយងាកមកប្រើវប្បធម៌នៃការគោរពសិទ្ធិមនុស្ស។
គណបក្សសង្គ្រោះជាតិ បានចេញសេចក្តីថ្លែងការណ៍ខាងលើនេះ បន្ទាប់ពីបានទទួលដំណឹងអំពើឃាតកម្មយ៉ាងព្រៃផ្សៃតាមដងផ្លូវសាធារណៈ ក្នុងពេលពេលថ្មីៗនេះ រួមទាំងឃាតកម្មលើជនជាតិវៀតណាម បន្ទាប់ពីជម្លោះគ្រោះថ្នាក់ចរាចរណ៍ កាលពីចុងសប្តាហ៍មុនផងដែរ។
គណបក្សសង្គ្រោះជាតិ បានប្រកាសថ្កោលទោស ចំពោះការប្រើហិង្សាសម្លាប់មនុស្សក្រៅប្រព័ន្ធច្បាប់ តាមគ្រប់រូបភាព ដែលវប្បធម៌នេះ បាន និងកំពុងកើតមានឡើងស្ទើរគ្រប់ទីកន្លែង ក្នុងប្រទេសកម្ពុជា នាពេលបច្ចុប្បន្ននេះ៕
ប្រភពពី CEN
