កំពង់ចាមៈ បុរសម្នាក់ បានលបចូល ក្នុងផ្ទះប៉ុនប៉ង រំលោភប្រពន្ធគេ ប៉ុន្តែ មិនបានសម្រេច ត្រូវប្តីគេដឹងមុន និងកាប់ត្រូវក្បាល រងរបួសដេកពេទ្យ ហើយបុរសជាប្តី ត្រូវសមត្ថកិច្ចចាប់ខ្លួន ក្នុងបទ ប្រើអំពើ ហិង្សា ។ ហេតុការណ៍នេះ បានកើតឡើង កាលពីវេលាម៉ោង ៨និង១១នាទី យប់ថ្ងៃទី១៩ ខែកុម្ភៈ ឆ្នាំ២០១៤ នៅភូមិស្បែកគឺ ឃុំកណ្តោលជ្រុំ ស្រុកពញាក្រែក ខេត្តកំពង់ចាម ។
នាយប៉ុស្តិ៍ នគរបាលឃុំកណ្តោលជ្រុំ លោក អ៊ីសូ ប៉ូទី បានប្រាប់ឲ្យដឹងថា មុនពេលកើតហេតុ ខាងប្រពន្ធជនសង្ស័យឈ្មោះ យេង ស្រីនាង អាយុ ២៩ឆ្នាំ បានដឹងថា បុរសឈ្មោះ ឡេ ឡាយ អាយុ២៥ឆ្នាំ បាន លបចូលផ្ទះរបស់ខ្លួន ចំនួន២ដងរួចមកហើយ ។ លុះនៅយប់កើតហេតុ នាងបានប្រាប់ប្តីរបស់នាងឈ្មោះ ជុត កាន់ណា អាយុ ៣០ឆ្នាំ បានដឹងរឿង ។ លុះយប់នោះ នៅវេលាម៉ោងជាង៨ បុរសឈ្មោះ ឡេង ឡាយ បានធ្វើសកម្មភាព លបចូលផ្ទះនាងម្តងទៀងនេះ ក៏ត្រូវបុរសជាប្តី បានយកកាំបិតខ្វែវ កាប់ទៅលើឈ្មោះ ឡាយ ខណៈដែលឈ្មោះ ឡាយនេះ ចូលដល់ក្នុងផ្ទះរបស់ខ្លួន តាមទ្វារក្រោយ ត្រូវចំក្បាលផ្នែកខាងឆ្វេង បណ្តាលឲ្យរង របួសជាដំណំ ដឹកយកទៅព្យាបាល នៅមន្ទីរពេទ្យស្រុកពញាក្រែក ។ ក្រោយហេតុកាណ៍ សមត្ថកិច្ច បានឃាត់ខ្លួនបុរសជាប្តី ក្នុងបទ ប្រើអំពើហិង្សា ចងក្រង សំណុំរឿង បញ្ជូនទៅសាលាដំបូង ដើម្បីចាត់ការទៅតាមនីតិវិធី ។
លោកនាយប៉ុស្តិ៍ បានឲ្យដឹងទៀតថា បុរសឈ្មោះ ឡាយ ត្រូវគេកាប់នោះ មានស្រុកកំណើតនៅខេត្តព្រៃវែង ហើយមកស្នាក់នៅ ភូមិកើតហេតុ ធ្វើជាកម្មករសំណង់ ៕
_____________
ផ្តល់សិទ្ទិដោយ៖dap-news.com