ព្រះសីហនុៈ ក្របីចំនួនបីក្បាល ត្រូវបានងាប់ ភ្លាមៗ បន្ទាប់ពីត្រូវ រថយន្តលុច្សស៊ីស បើកបរ ដោយជនជាតិបារាំង បើកបុកពេញទំហឹងទាំង កណ្តាលរាត្រី នៅផ្លូវជាតិលេខ៤ ចំណុចបង្គោល គីឡូម៉ែត្រលេខ ១២៧-១២៨ នៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ ។
លោកវរសេនីយ៍ត្រី សម សាមាន មេបញ្ជាការអាវុធហត្ថ ស្រុកកំពង់សីលា ខេត្តព្រះសីហនុ បានមានប្រសាសន៍ឲ្យដឹងថា គ្រោះថ្នាក់ចរាចរណ៍នេះ កើតឡើង នៅថ្ងៃទី១៣ ខែកុម្ភះ ឆ្នាំ២០១៤ វេលាម៉ោង ២១ និង២៥នាទីយប់ នៅផ្លូវជាតិលេ៤ ចំណុចបង្គោល គីឡូម៉ែត្រលេខ ១២៧-១២៨ នៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ រវាងរថយន្ត លុចហ៊្សីសRX300 ពណ៌មាស ពាក់ស្លាកលេខ ភ្នំពេញ 2G-0379 ទិសដៅពីខេត្តព្រះសីហនុ ទៅភ្នំពេញ បើកបរ ដោយជនជាតិបារាំង បានបុកក្របីអ្នកស្រុកចំនួនបីក្បាល នៅកណ្តាលថ្នល់បណ្តាល ឲ្យងាប់ ទាំងអស់ ។
ហើយចំពោះរថយន្តវិញ រងការខូចខាត ធ្ងន់មួយកំណាត់មុខ ប៉ុន្តែអ្នកបើកបរ មិនមានរងរបួស នោះឡើយ ។ ក្រោយកើតហេតុជនជាតិ បារាំងទាំង២នាក់ ដែលជិះក្នុងរថយន្តនោះ មិនបានប្រាប់ ពីអត្តសញ្ញាណនោះឡើយ ហើយបានទាក់ទងហៅរថយន្តគ្នារបស់គេមកទទួលទៅបាត់ ។
ក្រោយកើតហេតុ កម្លាំងនគរបាលចរាចរ យករថយន្តទៅរក្សាទុក នៅអធិការដ្ឋាននគរបាល ស្រុកកំពង់សីលា ដើម្បីដោះស្រាយ នៅពេលក្រោយ ៕