នគរបាលខណ្ឌប្ញស្សីកែវ ឃាត់ខ្លួនចោរប្លន់២នាក់
ភ្នំពេញ: នគរបាល
ខណ្ឌប្ញស្សីកែវ
បានស្រាវជ្រាវឃាត់ខ្លួនជាបន្តបន្ទាប់ជនសង្ស័យជាចោរប្លន់២នាក់
កាលពីម៉ោង៩:៣០នាទីព្រឹកថ្ងៃទី២២ កុម្ភៈ ២០១៤
និងបន្តទៅឆែកឆេរលំនៅដ្ឋានមួយកន្លែង នៅចំណុចផ្ទះលេខ៦១៧ ផ្លូវបេតុង
ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ។
ជនសង្ស័យខាងលើបានប្លន់ម៉ូតូមួយតែមិនបានសម្រេច។សមត្ថកិច្ចមូលដ្ឋានប្រាប់ថាជនសង្ស័យទាំង២នាក់ដែលត្រូវ ឃាត់ខ្លួននោះមានឈ្មោះទី១-ឈ្មោះ វ៉ាត គឹមអាង អាយុ២២ឆ្នាំ និងទី២- ឈ្មោះ សុខ ទៀង អាយុ២០ឆ្នាំ ទាំង២នាក់ស្នាក់នៅផ្ទះជួលខាងលើ មានស្រុកកំណើត នៅឯស្រុកចំការលើ ខេត្តកំពង់ចាម ។
សមត្ថកិច្ចបន្តថា កាលពីម៉ោង១២:៣០នាទីរំលងអធ្រាត្រ ឈានចូលថ្ងៃទី២២ កុម្ភៈ ជនសង្ស័យខាងលើប្រដាប់ដោយកាំភ្លើងខ្លីម៉ាករ៉ូឡូមួយដើម បើកម៉ូតូម៉ាកស្គូពីមួយគ្រឿងឌុបគ្នា ធ្វើសកម្មភាពប្លន់ម៉ូតូម៉ាកឌ្រីមសេ១២៥ ស៊េរី២០១៤ ពាក់ស្លាកលេខភ្នំពេញ 1CG-7890 នៅតាមបណ្តោយផ្លូវ៥៩៨ កែងផ្លូវជាតិលេខ៥ សង្កាត់ស្វាយប៉ាក ខណ្ឌប្ញស្សីកែវ តែមិនបានសម្រេច ដោយម្ចាស់ម៉ូតូប្រវាយប្រតប់ជាមួយក្រុមចោរយកម៉ូតូបានវិញ ហើយពួកចោររត់គេចខ្លួនបាត់ ។
ក្រោយពីឃាត់ខ្លួន ជនសង្ស័យទាំង២នាក់ ត្រូវបញ្ជូនទៅសួរនាំនៅអធិការដ្ឋានខណ្ឌប្ញស្សីកែវ ៕
ប្រភពពី CEN
