ត្រូវជនខិលខូច លួចលេខកូដមន្ដ្រី នាយកដ្ឋាន អប់រំកាយ ដើរបោកបញ្ឆោតគេ

ភ្នំពេញ៖ លោក បឹង គឹមតោ អនុប្រធាននាយកដ្ឋាន អប់រំកាយ និងកីឡា និងជាអគ្គលេខាធិការ សហព័ន្ធកីឡា ទូកកានូ កម្ពុជាផងនោះ បានប្រកាសជា សាធារណៈថា កាលពីពេលថ្មីៗ កន្លងទៅនេះ មានជនខិលខូច បានលួចយកលេខសម្ងាត់ (Password) នៃអាស័យដ្ឋាន អ៊ីម៉ែលរបស់លោក ទៅប្រើប្រាស់ ដើម្បីបោកបញ្ឆោតគេឯង ដូច្នេះលោកបាន ស្នើឲ្យថ្នាក់ដឹកនាំ ឬមិត្តភ័ក្រ ឬអ្នកដែលស្គាល់ អាស័យដ្ឋាន អ៊ីម៉ែលលោក ត្រូវប្រុងប្រយ័ត្នផង ។

អនុប្រធាននាយកដ្ឋានអប់រំកាយ និងកីឡារូបនេះ បានបញ្ជាក់ថា អាស័យដ្ឋានអ៊ីម៉ែល របស់លោក ដែលប្រើប្រាស់ ជាប្រចាំនោះ មានឈ្មោះថា « bkimtor2012@yahoo.com» ប៉ុន្ដែកាលពីថ្ងៃទី០២ ខែមករា ឆ្នាំ២០១៥ កន្លងទៅនេះ គឺមានក្រុមជនខិលខូច បានលួចលេខកូដសម្ងាត់ ហើយថែមទាំង បានសរសេរសារផ្សព្វផ្សាយ លើអ៊ីម៉ែល ខាងលើទៀតថា “Vacation trip to Kiev, Ukraine” មានន័យថា “ខ្ញុំបាន បានធ្វើដំណើរ ទៅទីក្រុងគាវ ប្រទេសអ៊ុយក្រែន” ។

ការសរសេរបែបនេះ បានធ្វើឲ្យមានការ ភ្ងាក់ផ្អើលដល់លោក បឹង គឹមតោ ដែលជាម្ចាស់អាស័យដ្ឋាន អ៊ីម៉ែលខាងលើ នៅថ្ងៃទី០៣ មករាកន្លងទៅ តាមរយៈការខលប្រាប់ តាមទូរស័ព្ទ ពីសំណាក់អ្នក ដែលមានទំនាក់ទំនង លេងអ៊ីម៉ែល ជាមួយនឹងលោក ។

ជាមួយនឹងទង្វើរអសីលធម៌ខាងលើនេះ លោក បឹង គឹមតោ បានប្រកាសបដិសេធ ជាសាធារណៈភ្លាមៗថា «ខ្ញុំបាទពុំបានធ្វើដំណើរទៅទីក្រុង គាវ ប្រទេស អ៊ុយក្រែន ដូចមានសរសេរនៅក្នុងអ៊ីម៉ែលរបស់ខ្ញុំបា ទនោះទេ។ វាជាទង្វើរបស់ជនខិលខូច ឬជនសង្គមងងឹត  ដែលបានលួចយក លេខសង្ងាត់របស់ខ្ញុំ ទៅប្រើប្រាស់អាស័យដ្ឋាន អ៊ីម៉ែល របស់ខ្ញុំបាទ ។  ខ្ញុំបាទទើបតែបានប្តូរ Password កាលពីល្ងាចថ្ងៃទី០៣ ខែមករា ឆ្នាំ២០១៥នេះ” ៕

ផ្តល់សិទ្ធដោយ ៖ ដើមអម្ពិល