ឃាត់ខ្លួនជនសង្ស័យ ៥នាក់ បន្ទាប់ពីឆក់ទូរស័ព្ទ ក្នុងពិធីឆ្លងឆ្នាំសកល

សៀមរាប ៖ កម្លាំងអាវុធហត្ថ ខេត្តសៀមរាប បានឃាត់ខ្លួនសង្ស័យ ៥នាក់ ដែលជាក្រុមឆក់ទូរស័ព្ទដៃ ក្នុងពិធីឆ្លងឆ្នាំសកល កាលពីរាត្រីថ្ងៃទី៣១ ខែធ្នូ ឆ្នាំ២០១៤ និង ឈានចូលរំលង អាធ្រាត្រថ្ងៃទី១ ខែមករា ឆ្នាំ២០១៥ នៅតំបន់ផាប់ស្រ្ទីត  តំបន់ផ្សារចាស់ និងផ្សាររាត្រី ។ ហើយនៅព្រឹកថ្ងៃទី២ ខែមករា ឆ្នាំ២០១៥នេះ នៅទីបញ្ជាការដ្ឋាន កងរាជអាវុធហត្ថ ខេត្តសៀមរាប បានបង្ហាញមុខក្រុមជនសង្ស័យ ដែលជាចោរឆក់ទូរស័ព្ទដៃ ៥នាក់ នេះ ។

លោកវរសេនីយ៍ឯក ស្រី យូរ៉ា មេបញ្ជាការរង និងជាប្រធានមន្ទីរស្រាវជ្រាវ និងយុត្តិធម៌ បានមាន ប្រសាសន៍ឲ្យដឹងថា ករណីនេះ សមត្ថកិច្ច អ.ហ បានឃាត់ខ្លួនជន សង្ស័យចំនួន ៥នាក់ ក្នុងនោះ មានប្រុស៣នាក់ និងស្រី២នាក់ ដែលពួកគេបានធ្វើ សកម្មភាពឆក់ទូរស័ព្ទ ។

លោកបញ្ជាក់ថា ជនសង្ស័យទាំង ៥នាក់នោះ ពាក់ព័ន្ធពីបទលួច ដែលមានឈ្មោះ  ជនសង្ស័យទី១. ទុំ ចន, ភេទប្រុក, អាយុ ៣៣ឆ្នាំ ជនសង្ស័យទី២. មានឈ្មោះ ប្រាជ្ញ សំ ភេទប្រុស អាយុ ២០ឆ្នាំ ជន សង្ស័យទី៣. មានឈ្មោះ នី ភក្ដី, ភេទប្រុស, អាយុ ២២ឆ្នាំ ជនសង្ស័យទី៤. មានឈ្មោះ ពេទ្យ រិទ្ធ ភេទស្រី, អាយុ ១៤ឆ្នាំ, និងជនសង្ស័យទី៥. មានឈ្មោះ ម៉ៅ កា, ភេទស្រី, អាយុ ១៨ឆ្នាំ ដែលពួកគេ ទាំង ៥នាក់ ត្រូវបានឃាត់ខ្លួន កាលពីថ្ងៃទី១ ខែមករា ឆ្នាំ២០១៥ ។

ហើយសមត្ថកិច្ច បានដកហូតបានវត្ថុតាង ដែលមានទូរស័ព្ទដៃ ម៉ាកទំនើប ២គ្រឿង និងម៉ាក់ធម្មតា ១គ្រឿង ។ ហើយទូរស័ព្ទដៃមួយគ្រឿង បានធ្វើកំណត់ហេតុ ប្រគល់ជូនម្ចាស់ដើម ដែលជាភ្ញៀង ទេសចរ បរទេសវិញហើយ នៅព្រឹកថ្ងៃទី២ ខែមករា ២០១៥ ហើយ ២គ្រឿងទៀតមិនទាន់រក ម្ចាស់ឃើញនៅឡើយទេ ។

កញ្ញា ខាត់ទ្រីន ម៉រឺ  អាយុ២១ឆ្នាំ ជានិស្សិត ជនជាតិអូស្ដ្រាលី ដែលជាភ្ញៀវទេសចរ បានមកទស្សនា ក្រុងសៀមរាប និងតំបន់អង្គរ កាលពីថ្ងៃទី៣០ ខែធ្នូ ២០១៤ ជាមូយនិងឪពុករបស់នាង ហើយបាន មកចូលរួមក្នុងពិធីឆ្លងឆ្នាំសកល នៅតំបន់ផាប់ស្រ្ទីត  តំបន់ផ្សារចាស់ និងផ្សាររាត្រី ។ ហើយត្រូវបាន ចោរឆកទូរស័ព្ទដៃ ម៉ាក់ iPhone 5 មួយគ្រឿង ព័ណ៌ស កាលពីរាត្រីថ្ងៃទី៣១ ខែធ្នូ ឆ្នាំ២០១៤ ក្នុង កំឡុងពេលដែលពួកគាត់កំពុងចូលរួមពិធីឆ្លងឆ្នាំសកល និងកម្មវិធី ខោនដោន នៅ ផាប់ស្រ្ទីត ។

បើតាមសមត្ថកិច្ច ក៏ដូចជាអ្នកសៀមរាប និងមគ្គុទ្ទេសទេសចរមួយចំនួន បានឲ្យដឹងថា បច្ចុប្បន្ន ទន្ទឹង និងកិច្ចខិតខំប្រឹងប្រែងរបស់សមត្ថកិច្ច និងអាជ្ញាធរដែលដី ក្នុងការរក្សា សុខ សុវត្ថិភាព ជូនភ្ញៀវ ទេសចរជាតិ-អន្តរជាតិ រួមនិងការពង្រឹងភូមិ ឃុំ/សង្កាត់ មានសុវត្ថិភាព ។

ជាមួយនិងលទ្ធផលទាំងនេះ ក៏នៅមានសកម្មភាព អសកម្មមួយចំនួនកើតឡើងដែរ ដូចជា ករណីចោរ លួច ចោរឆក់ របស់របរភ្ញៀវ និងបងប្អូនប្រជាពលរដ្ឋ ជាអន្លើរៗ នៅក្រុងទេសចរណ៍វប្បធម៌ ប្រវត្តិ សាស្រ្ដមួយនេះ ដែលតម្រូវឲ្យ ខាងសមត្ថកិច្ច និងអាជ្ញាធរដែលដី ពង្រឹងតួនាទីក្នុងការរក្សានូវសុខ សុវត្ថិភាព សណ្ដាប់ធ្នាក់ ចរាចរណ៍បន្ថែមទៀត ផងដែរ ៕

ផ្ដល់សិទ្ធដោយ៖ ដើមអម្ពិល