មន្រ្តីបក្សប្រឆាំងរកឃើញដី២កន្លែងទៀតនៅសៀមរាបត្រូវបានជួលតម្លៃថោក និងមិនមានតម្លាភាព
តំណាងរាស្រ្តគណបក្សប្រឆាំង នៅថ្ងៃអង្គារនេះ អះអាងថាលោកបានរកឃើញភាពមិនប្រក្រតីនៃការជួលដី២កន្លែងទៀតទំហំ ប្រហែល១០ហិកតា ទៅឲ្យក្រុមហ៊ុន ដែលការជួលនេះមានតម្លៃថោក និងមិនមានតម្លាភាព។
អនុប្រធានគណៈកម្មការហិរញ្ញវត្ថុ ធនាគារ និងសវនកម្ម នៃរដ្ឋសភា មកពីគណបក្សសង្រ្គោះជាតិ លោក សុន ឆ័យ បានដឹកនាំមន្រ្តីជំនាញរបស់ខ្លួនជួបជាមួយក្រុមការងារអាជ្ញាធរជាតិ អប្សរា ដែលដឹកនាំដោយអគ្គនាយកអាជ្ញាធរជាតិអប្សរា លោក ប៊ុន ណារិទ្ធ ដើម្បីសិក្សាពីចំណូលអង្គរវត្ត និងភាពមិនប្រក្រតីមួយចំនួនក្នុងការអភិវឌ្ឍខេត្តទេសចរណ៍មួយនេះ។
កាលពីថ្ងៃចន្ទ លោក សុន ឆ័យ លើកឡើងថាថវិការដ្ឋយ៉ាងតិច៤០០លានដុល្លារអាមេរិក ត្រូវបានបាត់បង់ក្នុងរយៈពេល៧០ឆ្នាំ ដោយសារអាជ្ញាធរជាតិអប្សរាជួលដីតំបន់បុរីសណ្ឋាគារសុខា ឲ្យទៅក្រុមហ៊ុនវៀតណាម សុខ គង់ ក្នុងតម្លៃថោក និងមិនមានតម្លាភាព។
លោក សុន ឆ័យ ប្រាប់VODបន្ទាប់ពីជួបប្រជុំជាមួយមន្ដ្រីអាជ្ញាធរជាតិអប្សរាថាលោកបានរក ឃើញដីចំនួន២កន្លែងទៀត ដែលលោករកឃើញថាត្រូវបានជួលឲ្យក្រុមហ៊ុន គឺមួយកន្លែងទំហំ២ហិកតា និងមួយកន្លែងទៀត ទំហំ១០ហិកតា។ លោកមិនបានដឹងពីទីតាំងជាក់លាក់ និងឈ្មោះក្រុមហ៊ុនដែលត្រូវបានជួលឲ្យនោះទេ ដោយសារអាជ្ញាធរជាតិអប្សរាបដិសេធផ្តល់ឯកសារពាក់ព័ន្ធ។ លោកបានស្នើសុំឯកសារ និងកុងតានានា។ លោកមានប្រសាសន៍ថា«យើងសួរថាក្រុមហ៊ុននោះឈ្មោះអី ជួលប៉ុន្មានឆ្នាំ អត់បានឆ្លើយទេ»។
លោក សុន ឆ័យ បន្តថារដ្ឋាភិបាលគួរតែមានឯកសារជាក់លាក់បង្ហាញពីទ្រព្យ សម្បត្តិរបស់ជាតិ។ លោកថាបើសិនជាសមាជិករបស់គណៈកម្មការហិរញ្ញវត្ថុ ធនាគារ និង សវនកម្ម នៃរដ្ឋសភា មិនចូលរួមការស៊ើបអង្កេតនេះ លោកនឹងធ្វើការស្រាវជ្រាវ និងរៀបចំឯកសារតាមនីតិវិធីច្បាប់។ បន្ទាប់ពីការសិក្សានេះ លោកសុន ឆ័យនឹងស្នើទៅប្រធានរដ្ឋសភា លោក ហេង សំរិន ឲ្យត្រួតពិនិត្យលើភាពមិនប្រក្រតីទាំងនេះ។
ទាក់ទងនឹងការសុំឯកសារនេះ អគ្គនាយកអាជ្ញាធរជាតិអប្សរា លោក ប៊ុន ណារិទ្ធ មានប្រសាសន៍លោកមិនអាចប្រគល់ឯកសារលម្អិតទៅគណៈកម្មការសភានោះទេ ដោយលោកចាត់ទុកថាខុសតួនាទីរបស់សភា ប៉ុន្តែលោកថាលោកមិនបដិសេធនោះទេចំពោះឯកសារមួយចំនួនដែលអាចផ្តល់ ឲ្យ។ លោកមានប្រសាសន៍ថាលោកត្រូវសុំការអនុញ្ញាតពីអាជ្ញាធរសវនកម្មជាតិ និងក្រសួងសេដ្ឋកិច្ច និងហិរញ្ញវត្ថុ ជាមុនសិនមុននឹងផ្តល់ឯកសារឲ្យបាន។លោកបញ្ជាក់ថា«ប្រធានគណៈ កម្មការ គាត់មកតែសមាជិកសភាមកហ្នឹង ត្រូវធ្វើតាមតួនាទីសភា។ តើកន្លងមកសមត្ថកិច្ចគេមកធ្វើបញ្ជីលម្អិតចំណូលចំណាយ កិច្ចសន្យាអីហ្នឹង គឺខាងស្ថាប័នហិរញ្ញវត្ថុ មានច្រើនមន្ទីរ មានខាងអាជ្ញាធរសវនាកម្មជាតិ គេអ្នកមើលលម្អិត។… មានចំណុចខ្លះវាហាក់ដូចជាជាន់សមត្ថកិច្ចរបស់អាជ្ញាធរអស់នោះ។ អញ្ចឹងហើយបានជាខ្ញុំសុំសួរយោបល់ខាងអាជ្ញាធរសវនកម្មជាតិ និងក្រសួងសេដ្ឋកិច្ច និងហិរញ្ញវត្ថុ។ គេបានផ្តល់យោបល់ថាគួរតែចង់ដឹងអីសួរខាងក្រសួងសេដ្ឋកិច្ច និងហិរញ្ញវត្ថុ និងសវនកម្មជាតិ»៕ ប្រភពៈ VOD