យុទ្ធនាការបោសសម្អាតអំពើពុករលួយចូលលុកលុយដល់ក្រុមហ៊ុនផលិតរថយន្តធំទីពីររបស់ចិន
ថ្នាក់ដឹកនាំជាន់ខ្ពស់ម្នាក់របស់ក្រុមហ៊ុនផលិត រថយន្ត ដុងហ្វេង ដែលជាក្រុមហ៊ុនធំទីពីរ របស់ប្រទេសចិន ត្រូវបានអាជ្ញាធរចិន ដាក់ឲ្យស្ថិតនៅក្រោមការស៊ើបអង្កេតមួយទាក់ទងនឹងរឿងពុករលួយ។ នេះបើតាមសេចក្តីប្រកាសព័ត៌មានរបស់អាជ្ញាធរចិន ដែលគេឃើញចេញផ្សាយ នៅថ្ងៃចុងសប្តាហ៍នេះ។
ក្នុងបទជាប់សង្ស័យ ប្រព្រឹត្តកំហុសដែលល្មើសនឹងវិន័យ លោករេន យ៉ុង អគ្គនាយករងរបស់ក្រុមហ៊ុនដុងហ្វេង និងជាអនុប្រធានក្រុមហ៊ុនដុងហ្វេង ជាមួយក្រុមហ៊ុននីសាន់របស់ជប៉ុន កំពុងស្ថិតនៅក្រោមការតាមដានស៊ើបអង្កេតរបស់អាជ្ញាធរមានសមត្ថកិច្ច។ ជាលទ្ធផល ក្រុមហ៊ុនបានសម្រេចដកតួនាទីរដ្ឋបាល និងតំណែងទទួលខុសត្រូវទាំងអស់ពីលោករេន យ៉ុង។ នេះបើតាមសេចក្តីប្រកាសព័ត៌មានរបស់ក្រុមហ៊ុនដុងហ្វេង ដែលត្រូវបានគេចេញផ្សាយនៅទីផ្សារភាគហ៊ុនក្នុងទីក្រុងហុងកុង កាលពីល្ងាចថ្ងៃសុក្រ។
ដុងហ្វេង (Dongfeng) ក្រុមហ៊ុនផលិតរថយន្តធំទីពីររបស់ចិន បានចូលដាក់ទុនក្នុងក្រុមហ៊ុនផលិតរថយន្តបារាំង PSA Peugeot Citroën
នៅចុងសប្តាហ៍នេះ គណៈកម្មការមជ្ឈិមដើម្បីត្រួតពិនិត្យវិន័យរបស់បក្សកុម្មុយនិស្តចិន បានបញ្ជាក់ដំណើរការស៊ើបអង្កេតទៅលើលោករេន យ៉ុង។ នៅក្នុងសេចក្តីថ្លែងការណ៍ដាច់ដោយឡែកមួយរបស់ខ្លួន គណៈកម្មការមជ្ឈិមដើម្បី ត្រួតពិនិត្យវិន័យ ដែលជាទាហានអាវុធហត្ថ ផ្ទៃក្នុងរបស់បក្សកុម្មុយនិស្តចិន បានអះអាងថា លោករេន យ៉ុងកំពុងត្រូវគេសង្ស័យថា បានប្រព្រឹត្តបទល្មើសនឹងវិន័យ និងច្បាប់យ៉ាងធ្ងន់ធ្ងរ។
ពាក្យល្មើសនឹងវិន័យរបស់បក្សត្រូវអាជ្ញាធរចិនប្រើសម្រាប់សំដៅ សកម្មភាពប្រព្រឹត្តអំពើពុករលួយ និងការសូកប៉ាន់ទាំងឡាយ។ នៅប្រទេសចិន ក្រុមហ៊ុនផលិតរថយន្តធំៗទាំងអស់ ដែលស្ថិតនៅក្រោមការគ្រប់គ្រងរបស់រដ្ឋ មិនបានរួចខ្លួនពីយុទ្ធនាការបោសសំអាតអំពើពុករលួយរបស់បក្ស កុម្មុយនិស្តចិន។ កាលពីខែសីហាកន្លងទៅ មន្រ្តីជាន់ខ្ពស់ប៉ុន្មាននាក់របស់ក្រុមចិនFAW ដែលសហការចូលហ៊ុនជាមួយក្រុមហ៊ុនផលិតរថយន្តអាល្លឺម៉ង់ Volkswagen ក៏ត្រូវជាប់សង្ស័យក្នុងរឿងពុករលួយ ដូចគ្នានេះដែរ។
សូមបញ្ជាក់ថា ក្រៅតែពីចងដៃគូធ្វើជំនួញជាមួយក្រុមហ៊ុនផលិតរថយន្តធំៗរបស់បារាំង ដូចជាRenault និងPeugeot PSA Citroën ក្រុមហ៊ុនដុងហ្វេង បានរួមគ្នាជាមួយក្រុមហ៊ុនផលិតរថយន្តជប៉ុន នីសាន់។ កាលពីឆ្នាំ ២០១៣ ក្រុមហ៊ុនដុងហ្វេង នីសាន់ត្រូវបានចាត់ចូលក្នុងចំណោមក្រុមហ៊ុនផលិតរថយន្តចំនួន១០ដែល លក់ដាច់ជាងគេនៅក្នុងទីផ្សារប្រទេសចិន៕ប្រភពៈ RFI
