បៀតបៀនផ្លូវភេទអនីតិជន ហើយយកកាំបិតអារដៃ និងចាក់ខ្លួនឯង ហូរឈាមជោកខ្លួន
ខេត្ដសៀមរាប ៖ បុរសជនជាតិកាណាដាម្នាក់ ទំនងជាញៀនថ្នាំញៀន
បានយកកាំបិតចុងស្រួច ចាក់ខ្លួនឯងជាច្រើនកាំបិត
បណ្ដាលឲ្យហូរឈាមជោកខ្លួន ស្ថិតក្នុងភាពអាក្រាតកាយ
បន្ទាប់ពីបៀតបៀនផ្លូវភេទលើកុមារា ជាអនីតិជនជាច្រើននាក់
បង្កឲ្យមានការភ្ញាក់ផ្អើល កាលពីវេលាម៉ោង ៣រសៀលថ្ងៃទី២៣ ខែកុម្ភៈ
ឆ្នាំ២០១៤ ស្ថិតនៅក្នុងបន្ទប់ជួល ក្នុងភូមិបឹងដូនប៉ា
សង្កាត់ស្លក្រាម ក្រុងសៀមរាប ខេត្ដសៀមរាប ។សមត្ថកិច្ចបានឲ្យដឹងថា ជនរងគ្រោះមានឈ្មោះ DESLAURIES PIERE ជាជនជាតិកាណាដា អាយុ៧០ឆ្នាំ កាន់លិខិតឆ្លងដែនលេខ QF 73 00 84 ផុតកំណត់នៅខែតុលា ឆ្នាំ២០១៦ ។ ដោយមានពាក្យបណ្ដឹង ពីក្រុមគ្រួសារ ហើយមានការចង្អុលបង្ហាញ ពីកុមារងគ្រោះផងនោះ សមត្ថកិច្ចបានតាមចាប់ តែជនសង្ស័យបានមកដេកសំងំ ក្នុងបន្ទប់ផ្ទះជួល ដោយមិនមានសម្លៀកបំពាក់ បន្ទាប់ពីល្បួកុមារាជាច្រើននាក់ យកទៅបៀតបៀនផ្លូវភេទ ហើយនៅពេលសមត្ថកិច្ច ធាក់ទ្វារបន្ទប់ ចូលចាប់ជនសង្ស័យ ក៏ជួបរឿងរ៉ាវ គួរឲ្យភ្ញាក់ផ្អើលតែម្តង ។
សមត្ថកិច្ចជំនាញ បានសន្និដ្ឋានថា បុរសស្បែកសនោះ ទំនងញៀនថ្នាំញៀនខ្លាំង និងដឹងខ្លួនឯងថា បានប្រព្រឹត្តបទល្មើស មកលើអនិតិជនក្រោម អាយុ ១៥ឆ្នាំផងនោះ ទើបបានយកកាំបិតចុងស្រួច ចាក់លើខ្លួនឯង និងអារដៃជាច្រើនកាំបិត បណ្ដាលឲ្យហូរឈាមជោកខ្លួន និងឆ្អាបពេញបន្ទប់ ។ ភ្លាមៗនោះ ជនសង្ស័យ ត្រូវបានសមត្ថកិច្ច នាំទៅព្យាបាល នៅមន្ទីរពេទ្យ រងចាំធ្វើការសាកសួរជាក្រោយ នៅពេលជនសង្ស័យ មានស្ថានភាពល្អប្រសើរឡើងវិញ ដើម្បី ចាត់ការតាមច្បាប់ ៕
ប្រភពពី វត្តភ្នំ
