UN ទទួលញាត្តិនិងស្នាមមេ ដៃរបស់គណបក្សសង្គ្រោះជាតិ
ភ្នំពេញៈ តំណាងនៃការិយាល័យឧត្តមស្នងការនៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស (OHCHR) បានចេញមកទទួលញាត្តិ និងស្នាមមេដៃពីលោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិដែលបានដឹកនាំបាតុករជាច្រើនរយនាក់ ដង្ហែរក្បួនពីទីលានប្រជាធិបតេយ្យឆ្ពោះមកស្នាក់ការអង្គការសហប្រជាជាតិស្ថិតនៅផ្លូវលេខ ៣០២។
ការដង្ហែរក្បួនចេញពីកន្លែងធ្វើមហាបាតុកម្ម គឺត្រូវបានអនុញ្ញាតពីសាលារាជធានីភ្នំពេញ និងក្រសួងមហាផ្ទៃ ដែលការដង្ហែរក្បួនយកមកដាក់ញាត្តិនៅ UN-OHCHR នេះត្រូវបានហែហម យាមការពារ សុវត្ថិភាព និងបើកផ្លូវសម្រួលចរាចរណ៍ដោយសមត្ថកិច្ចចម្រុះ ជាច្រើនរយនាក់ផងដែរ។
ការដាក់ញាត្តិ និងស្នាមមេដៃនៅអង្គការសហប្រជាជាតិថ្ងៃនេះ និងតាមស្ថានទូតនានានៅថ្ងៃស្អែកបន្តទៀត គឺ គណបក្សសង្គ្រោះជាតិ ចង់ឲ្យសហគមន៍អន្តរជាតិ អន្តរាគមន៍ និងដាក់សម្ពាធទៅលើរាជរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ដែលកើតចេញពីសភាឯកបក្ស ដែលគណបក្សប្រឆាំងនេះ បដិសេធមិនទទួលស្គាល់ រាប់ទាំងលទ្ធផលបោះឆ្នោតកាលពីថ្ងៃទី ២៨ កក្កដា និងទាមទារ រកយុត្តិធម៌ជូនប្រជាពលរដ្ឋ ដែលជាម្ចាស់ឆ្នោតដោយជំរុញឲ្យស៊ើបអង្កេតឯករាជ្យលើភាពមិនប្រក្រតីនៃការបោះឆ្នោតនោះ និងជាពិសេស ទាមទារឲ្យរាជរដ្ឋាភិបាលបច្ចុប្បន្ន គោរព និងអនុវត្តតាមកិច្ចព្រមព្រៀងទីក្រុងថ្ងៃទី ២៣ តុលា ឆ្នាំ១៩៩១ ឲ្យបានពេញលេញ ព្រមទាំងធានាឲ្យមានការគោរពសិទ្ធិមនុស្ស និងអនុវត្តឲ្យបានត្រឹមត្រូវតាមគោលការណ៍ប្រជាធិបតេយ្យ សេរី ពហុបក្ស ដូចមានចែងក្នុងរដ្ឋធម្មនុញ្ញកម្ពុជា។
លោក សម រង្ស៊ី ដែលបានថ្លែងមុខក្រុមបាតុករជាង ១ម៉ឺននាក់ មុននឹងធ្វើការដង្ហែរក្បួននេះ ថា មហាបាតុកម្មថ្ងៃនេះ ទាមទាររកយុត្តិធម៌ ការបោះឆ្នោតប្រកបដោយភាពត្រឹមត្រូវ សេរី យុត្តិធម៌។ បាតុកម្មនេះមិនមែនលើកចុងក្រោយទេ យើងនឹងបន្តធ្វើទៀតរហូតទាល់តែមានដំណោះស្រាយ ដែលទទួលយកបាន។
លោក សម រង្ស៊ី បានលើកទឹកចិត្តឲ្យប្រជាពលរដ្ឋខ្មែរចូលរួមឲ្យបានច្រើន ដើម្បីឲ្យអន្តរជាតិបានឃើញ ពីសកម្មភាព និងឆន្ទៈស្នេហារបស់ពលរដ្ឋខ្មែរ។ «កម្លាំងយើងនេះ គឺជាកម្លាំងពិតប្រាកដ»។
ប្រភពពី ភ្នំពេញ ប៉ុស្តិ៍