លទ្ធផលនៃចំនួនស្នាមមេដៃ និងឧបសគ្គក្នុងការប្រមូលស្នាមមេដៃរបស់បក្សប្រឆាំង
មន្ត្រីគណបក្សសង្គ្រោះជាតិ ប្រកាសថា បានប្រមូលស្នាមមេដៃអ្នកគាំទ្រនៅទូទាំងប្រទេសបានជាង ២លាន ៣ម៉ឺន ដើម្បីដង្ហែដាក់ញត្តិតាមស្ថានទូតនានា និងការិយាល័យអង្គការសហប្រជាជាតិ ប្រចាំរាជធានីភ្នំពេញ ដើម្បីទាមទារសុំឲ្យពិនិត្យសើរើឡើងវិញ អំពីភាពមិនប្រក្រតីនៃលទ្ធផលបោះឆ្នោត ដែលបក្សសង្គ្រោះជាតិ បានចោទថា បក្សប្រជាជន រួមគំនិតជាមួយគណៈកម្មាធិការជាតិរៀបចំការបោះឆ្នោត លួចបន្លំ។
ខេត្ត និងរាជធានីដែលទទួលបានស្នាមមេដៃច្រើនជាងគេមកទល់ថ្ងៃទី២៣ តុលា នេះ មាន ៥ ដូចជាភ្នំពេញ កំពង់ចាម កណ្ដាល កំពង់ស្ពឺ ជាដើម។
លោក កឹម សុខា អនុប្រធានបក្សសង្គ្រោះជាតិ ប្រកាសនៅទីលានប្រជាធិបតេយ្យនៅថ្ងៃទី២៣ តុលា ថា រាជធានីភ្នំពេញ បានជាង ៤សែន ក្នុងចំណោមសន្លឹកឆ្នោតសង្គ្រោះជាតិ ៣សែន ៨ម៉ឺន ២ពាន់សំឡេង។ ខេត្តព្រៃវែង ស្នាមមេដៃ ២សែន ក្នុងចំណោមសន្លឹកឆ្នោត ជាង ២សែន ៨ម៉ឺន។
ខេត្តកំពង់ចាម ស្នាមមេដៃជិត ៤សែន ក្នុងចំណោមសន្លឹកឆ្នោតសង្គ្រោះជាតិ ប្រហែល ៤សែន ៥ម៉ឺន ៧ពាន់។ ខេត្តកំពង់ស្ពឺ ស្នាមមេដៃ ១សែន ១ម៉ឺន ក្នុងចំណោមសន្លឹកឆ្នោតសង្គ្រោះជាតិ ជាង ១សែន ៨ម៉ឺន ៦ពាន់។ ខេត្តកណ្ដាល ស្នាមមេដៃ ២សែន ៣ម៉ឺន ក្នុងចំណោមសន្លឹកឆ្នោតប្រហែល ៣សែន ៦ម៉ឺន ៦ពាន់។
បន្ទាប់មកមានខេត្តជាច្រើនបានស្នាមមេដៃកម្រិតមធ្យម ដូចជា ខេត្តកំពត បន្ទាយមានជ័យ បាត់ដំបង កំពង់ឆ្នាំង កំពង់ធំ ជាដើម។
តំណាងបក្សសង្គ្រោះជាតិ ប្រចាំខេត្តទាំងនោះឲ្យដឹងនៅថ្ងៃទី២៣ តុលា ថា មូលហេតុដែលប្រមូលស្នាមមេដៃបានតិច គឺដោយសារមូលហេតុចម្បងសំខាន់បី គឺអាជ្ញាធរមូលដ្ឋានរារាំង គំរាមកំហែង គ្រោះទឹកជំនន់ និងអ្នកគាំទ្រចំណាកស្រុកច្រើនក្រោយថ្ងៃបោះឆ្នោត។
លោក ជា ប៉ូច ប្រធានក្រុមការងារបក្សសង្គ្រោះជាតិ ខេត្តកំពត បញ្ជាក់ថា បក្សសង្គ្រោះជាតិ ខេត្តកំពត ប្រមូលស្នាមមេដៃបានជាង ៨ម៉ឺន ក្នុងចំណោមសន្លឹកឆ្នោតចំនួនជាង ១សែន ២ម៉ឺន ៥ពាន់នាក់។
ចំណែកខេត្តនៅភាគពាយព្យ ក៏មិនខុសគ្នាប៉ុន្មានដែរ។ លោក ឡុង រី ប្រធានក្រុមការងារបក្សសង្គ្រោះជាតិ ខេត្តបន្ទាយមានជ័យ ឲ្យដឹងថា ខេត្តបន្ទាយមានជ័យ មានស្នាមមេដៃជាង ៤ម៉ឺន ៦ពាន់ ក្នុងចំណោមសន្លឹកឆ្នោតជាង ៦ម៉ឺន ៤ពាន់ ដែលចំនួននេះនៅស្ទើរ ព្រោះអាជ្ញាធរមូលដ្ឋានរារាំង គ្រោះទឹកជំនន់ និងអ្នកគាំទ្រចំណាកស្រុក។
ចំណែកខេត្តបាត់ដំបង បានស្នាមមេដៃប្រហែល ៨ម៉ឺនស្នាមមេដៃ ក្នុងចំណោមសំឡេងឆ្នោតសង្គ្រោះជាតិ ជាង ១សែន ៦ម៉ឺន ២ពាន់។ ខេត្តពោធិ៍សាត់ ស្នាមមេដៃ ៣ម៉ឺន ១ពាន់ ក្នុងចំណោមសំឡេងឆ្នោត ៤ម៉ឺន ៨ពាន់។ ខេត្តកំពង់ឆ្នាំង ៥ម៉ឺន ៤ពាន់ ក្នុងចំណោមសំឡេងឆ្នោត ៩ម៉ឺន ៦ពាន់។ សៀមរាប ស្នាមមេដៃជិត ៩ម៉ឺន ក្នុងចំណោមសន្លឹកឆ្នោត ១៤ម៉ឺន។
រីឯខេត្តកំពង់ធំ បាន ៥ម៉ឺន ៤ពាន់ ក្នុងចំណោមសំឡេងឆ្នោតជាង ១សែន ១ម៉ឺន។ ខេត្តក្រចេះ បានស្នាមមេដៃជាង ៤ម៉ឺន ក្នុងចំណោមសំឡេងឆ្នោតជិត ៦ម៉ឺន។
ខេត្តស្វាយរៀង ស្នាមមេដៃជាង ៤ម៉ឺន ៣ពាន់ ក្នុងចំណោមសន្លឹកឆ្នោតជិត ១សែនសំឡេង។ ខេត្តតាកែវ ស្នាមមេដៃ ១៥ម៉ឺន ក្នុងចំណោមសំឡេងប្រហែល ៤៥ម៉ឺន។
ក្រៅពីនេះ ខេត្ត៩នៅសល់ បានសំឡេងតិចជាងគេ គឺខេត្តព្រះសីហនុ កោះកុង ២.៥០០ រតនគិរី មណ្ឌលគិរី ព្រះវិហារ ប៉ៃលិន ឧត្តរមានជ័យ ស្ទឹងត្រែង និងខេត្តកែប មានស្នាមមេដៃត្រឹមកម្រិតខ្ទង់ពាន់ប៉ុណ្ណោះ។
មន្ត្រីបក្សសង្គ្រោះជាតិ បញ្ជាក់ថា មូលហេតុដែលចំនួនស្នាមមេដៃតាមខេត្តទាំងប៉ុន្មាននេះតិចជាងគេ គឺដោយសារបក្សសង្គ្រោះជាតិ មិនមានគោលការណ៍ប្រមូលស្នាមមេដៃតាមខេត្តទាំងនោះ ដែលខេត្តនីមួយៗនោះ មានកៅអីអ្នកតំណាងរាស្ត្រតែមួយ។
ពលរដ្ឋនៅតាមបណ្ដាខេត្តហែញត្តិមកភ្នំពេញ
ដោយ ជិន ជេដ្ឋា
មន្ត្រី និងសកម្មជនគាំទ្រគណបក្សសង្គ្រោះជាតិ នៅខេត្តបន្ទាយមានជ័យ បាត់ដំបង ពោធិ៍សាត់ និងខេត្តកំពង់ឆ្នាំង បានធ្វើដំណើររួមគ្នាឆ្ពោះមកកាន់ទីលានប្រជាធិបតេយ្យ ក្នុងរាជធានីភ្នំពេញ នៅរសៀលថ្ងៃទី២៣ ខែតុលា។ ក្រុមបាតុករបញ្ជាក់ថា ពួកគេចង់បង្ហាញឲ្យឃើញពីការប្ដេជ្ញាចិត្ត និងកម្លាំងគាំទ្ររបស់គណបក្សសង្គ្រោះជាតិ ក្នុងការចូលរួមធ្វើមហាបាតុកម្មអហិង្សាលើកទី៣នេះ។
សមាជិកក្រុមការងារគណបក្សសង្គ្រោះជាតិ ប្រចាំខេត្តបាត់ដំបង លោក ជា ជីវ ថ្លែងថា ក្នុងករណីដែលមានសមត្ថកិច្ចមករារាំងមិនឲ្យក្រុមបាតុករទៅចូលរួមធ្វើមហាបាតុកម្មនៅទីលានប្រជាធិបតេយ្យ ពួកគេនឹងចុះពីលើឡានធ្វើបាតុកម្ម ឬអាចឈានដល់ការបិទផ្លូវទៀតផង៖ «ខ្ញុំមកថ្ងៃនេះ គឺដើម្បីបញ្ជាក់ថា ខ្ញុំត្រូវរកសន្លឹកឆ្នោតខ្ញុំនៅឯណា យុត្តិធម៌របស់ខ្ញុំនៅទីណា ហើយខ្ញុំជាយុវជន ខ្ញុំចង់មានការផ្លាស់ប្ដូរដែលបានប្រទេសមួយដែលមានការរីកចម្រើន ប្រជាពលរដ្ឋមានជីវភាពល្អ យុវជនគឺមានការងារធ្វើ»។
ក្រុមបាតុករទាំង ៤ខេត្តសរុបជាង ៣ពាន់នាក់ បានឡើងជិះឡានក្រុងចំណុះ ៤៥កៅអី និងឡានធុនតូចសរុបចំនួន ១១៥ឡាន។ ក្រុមបាតុករបាននាំមកជាមួយនូវកាបូបដាក់សម្លៀកបំពាក់ បដា និងទង់ជាតិមួយចំនួន ឆ្ពោះទៅកាន់ទីលានប្រជាធិបតេយ្យ ដើម្បីធ្វើមហាបាតុកម្មអហិង្សារយៈពេល ៣ថ្ងៃ គឺចាប់ពីថ្ងៃទី២៣ ដល់ថ្ងៃទី២៥ ខែតុលា ឆ្នាំ២០១៣ ក្នុងគោលបំណងទាមទារឲ្យមានដំណោះស្រាយវិបត្តិនយោបាយ ដែលកំពុងតែកើតមាននៅក្រោយការបោះឆ្នោត។
ថ្នាក់ដឹកនាំគណបក្សសង្គ្រោះជាតិ និងក្រុមបាតុករ នៅខេត្តព្រៃវែង និងខេត្តស្វាយរៀង ប្រមាណ ៧ពាន់នាក់ បានប្រមូលផ្ដុំគ្នារៀបចំចាត់ក្បួនដង្ហែនាំញត្តិស្នាមមេដៃទៅកាន់ទីលានប្រជាធិបតេយ្យរាជធានី ភ្នំពេញ នៅព្រឹកថ្ងៃទី២៣ តុលា។
ក្បួនដង្ហែពីខេត្តព្រៃវែង ដឹកនាំដោយ លោក គិន លឹង ប្រធានគណៈកម្មការប្រតិបត្តិខេត្ត និងមានរថយន្តតូចធំដង្ហែក្បួនប្រមាណជាង ២០០គ្រឿង រៀបចំហែជាពីរក្បួន។ ក្បួនទី១ ហែចេញពីកំពង់ចម្លងអ្នកលឿងត្រើយខាងលិច ហែតាមផ្លូវជាតិលេខ១ និងក្បួនទី២ រៀបចំដង្ហែតាមផ្លូវជាតិ៨ នៅចំណុចរង្វង់មូលស្រុកស្វាយអន្ទរ ខេត្តព្រៃវែង ហែឆ្ពោះទៅរាជធានីភ្នំពេញ។
ក្បួនហែពីខេត្តស្វាយរៀង ដឹកនាំដោយ លោក ម៉ៅ វិបុល ប្រធានប្រតិបត្តិគណបក្សសង្គ្រោះជាតិ ខេត្ត ដែលមានរថយន្តដឹកក្បួនដង្ហែចំនួន ១៣គ្រឿង និងមានក្រុមបាតុករប្រមាណជិត ៤០០នាក់ ចូលរួមដង្ហែក្បួន។ ដង្ហែចេញទីស្នាក់ការកណ្ដាលគណបក្សខេត្ត ស្ថិតនៅតាមបណ្ដោយផ្លូវជាតិលេខ១ ក្រុងស្វាយរៀង ខេត្តស្វាយរៀង។ ក្បួនដង្ហែនៅខេត្តស្វាយរៀង បានជួបឧបសគ្គរារាំងដំណើរពីអាជ្ញាធរប៉ូលិស នៅម្ដុំឃុំក្រោលគោ ស្រុកស្វាយជ្រំ អស់មួយម៉ោង។ រថយន្តក្បួនដង្ហែបានបន្តដំណើរទៅមុខ បន្ទាប់ពីមានការចរចាសម្រួលរវាងថ្នាក់ដឹកនាំគណបក្សសង្គ្រោះជាតិ ខេត្តស្វាយរៀង និងអាជ្ញាធរប៉ូលិសស្រុកស្វាយជ្រំ។
ញត្តិស្នាមមេដៃរបស់ខេត្តទាំងពីរប្រមូលបាន នឹងបញ្ជូនទៅរាជធានីភ្នំពេញ រួមប្រមាណជាង ៣សែនស្នាមមេដៃ៕
ប្រភពពី វិទ្យុអាស៊ីសេរី