មានព័ត៌មានលេចឮថា លោក ហ្គាដាហ្វ៉ី នៅរស់
សារព័ត៌មានអេហ្ស៊ីប និងអ៊ីរ៉ង់បានផ្សព្វផ្សាយថា មេដឹកនាំលីប៊ី លោកហ្គាដាហ្វ៉ី នៅរស់រានមានជីវិតនៅឡើយ ហើយកំពុងរស់នៅលាក់ខ្លួនក្នុងប្រទេសមួយជិតខាងប្រទេសលីប៊ី ។
សារព័ត៌មានអេហ្ស៊ីបបានផ្សព្វផ្សាយថា ការស្លាប់របស់លោកហ្គាដាហ្វ៉ីគ្រាន់តែជាការបំភ័ន្ដមតិពិភពលោកប៉ុណ្ណោះ ដែលបានផ្សព្វផ្សាយនៅលើព័ត៌មាន Al Marri Al Yawm របស់អេហ្ស៊ីប ។ នៅក្នុងអត្ថបទមួយរបស់អ្នកសារព័ត៌មានឯករាជ្យ លោក Abu Asad Abu Ghayla បានបញ្ជាក់ថា លោកហ្គាដាហ្វ៉ីដែលជាមេដឹកនាំរយៈ៤២ឆ្នាំបានវះកាត់ ហើយកាត់ជើងម្ខាងចោល ក្រោយការវាយប្រហាររបស់យន្ដហោះចម្បាំងរបស់ក្រុម ទាហានណាតូ ។
អ្នកសារព័ត៌មានឯករាជ្យខាងលើបានផ្សព្វផ្សាយទៀតថា លោក ហ្គាដាហ្វ៉ី បានទៅដល់ប្រទេសជិតខាងព្យាបាលរបួស ហើយនៅទីនោះ លោកបានរួចផុតពីក្ដីស្លាប់ ហើយរស់នៅយ៉ាងសុខសាន្ដនៅទីតាំងសម្ងាត់មួយ ។ ចំណែក ខ្សែអាត់វីដេអូដែលបានផ្សព្វផ្សាយសាធារណជនពីការស្លាប់របស់លោក ហ្គាដាហ្វ៉ីជាការក្លែងបន្លំប៉ុណ្ណោះ ។
ពេលនេះ វិវាទបានផ្ទុះឡើងសារជា ថ្មីជុំវិញការស្លាប់របស់លោកហ្គាដាហ្វីក្រោយពេលភរិយាលោកហ្គាដាហ្វី លោកស្រី សាហ្វីយ៉ា ហ្គាដាហ្វី បានស្នើ ដល់អង្គការសហប្រជាជាតិប្រកាសពីទីតាំងបញ្ចុះសពស្វាមី និងកូនប្រុសរបស់ខ្លួន ។
លើកចុងក្រោយដែលមើលឃើញ លោកហ្គាដាហ្វ៉ីដែលនៅរស់គឺនៅថ្ងៃទី២០ ខែតុលា ឆ្នាំ២០១១ ពេលនោះលោកបានទៅលាក់ខ្លួននៅស្រុកកំណើតសឺតេ ។ ក្បួនរថយន្ដអមការពារលោកមានដល់ទៅ៥០គ្រឿង និងទាហាន២៥០ នាក់ត្រូវយន្ដហោះចម្បាំងណាតូបាញ់ប្រហារបណ្ដាលឱ្យស្លាប់ទាំងអស់ ។ លោកហ្គាដាហ្វីបានរងរបួសជាទម្ងន់ ហើយត្រូវក្រុមខឹងសម្បាចាប់អូសលោកវាយតប់ ។ សាកសពរបស់លោក ត្រូវគេរកឃើញនៅក្នុងប្រឡាយគ្មានទឹកមួយក្នុងសភាពរបួសធ្ងន់ ៕
_______________________
ប្រភពព័ត៌មានពី៖ នគវត្ត
ប្រភពព័ត៌មានពី៖ នគវត្ត
