ទីបំផុតលោកស្រីស៊ូជីបានទទួលនូវពានរង្វាន់សិទ្ធិមនុស្សសាខារ៉ូវ
ក្រុងស្ត្រាប៊្បួរៈ មេដឹកនាំប្រឆាំងមីយ៉ាន់ម៉ាលោកស្រីអ៊ុងសាន ស៊ូជីកាលពីថ្ងៃពុធនៅទីបំផុតបានទទួលពានរង្វាន់សិទ្ធិមនុស្សសាខារ៉ូវ(Sakharov rights prize ) របស់សហភាពអឺរ៉ុបដែលលោកស្រីបានឈ្នះក្នុងឆ្នាំ១៩៩០នៅកម្រិតខ្ពស់នៃការបង្ក្រាបខាងយោធាដ៏ឃោរឃៅប៉ុន្តែបាននិយាយ ថាកិច្ចការរបស់លោកស្រីមិនទាន់បានសម្រេចនៅឡើយទេ។
ក្រុមសមាជិកសភាអឺរ៉ុបបាន ផ្តល់ឲ្យម្ចាស់ពានរង្វាន់ណូបែល សន្តិភាពលោកស្រីស៊ូជីនូវការក្រោកឈរទះដៃសាទរខណៈលោកស្រីបានទទួលពានរង្វាន់ពីប្រធានសភាលោកមារទីនស្គុល។
លោក ស្គុលបានថ្លែងថា៖«អ្នកបានបង្ហាញថាអ្នកដែលតស៊ូប្រយុទ្ធដើម្បីប្រជាធិបតេយ្យនឹងទទួលយកជោគជ័យនៅទីបំផុត។ ខ្ញុំសូមអបអរសាទរអ្នក។ អ្នកជានិមិត្តរូបដ៏អស្ចារ្យនៃសេរីភាពនិងប្រជាធិបតេយ្យ»។
ក្នុងសម្លៀកបំពាក់ជាប្រពៃណីលឿងខ្ចីនិងបៃតងចាស់លោកស្រីស៊ូជីបានមើលស្រាលយ៉ាងសមរម្យនូវការកោតសរសើរនេះដោយថ្លែងថា នៅមានកិច្ចការជាច្រើនដែលត្រូវធ្វើជាបន្តដើម្បីនាំមកនូវប្រជាធិបតេយ្យពេញលេញជូនមីយ៉ាន់ម៉ា។
ដោយរំឭកពីរបៀបដែលរបបយោធាបានរារាំងគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រីមិនឲ្យឡើងកាន់អំណាចបន្ទាប់ពីលោកស្រីបានឈ្នះការបោះឆ្នោតកាលពីឆ្នាំ១៩៩០នោះលោកស្រីស៊ូជីបានសួរថា៖«តើពេលនេះយើងនៅឯណា? យើងបានបង្កើតការរីកចម្រើនតាំងពីឆ្នាំ១៩៩០ ប៉ុន្តែយើងមិនទាន់បានធ្វើការរីកចម្រើនគ្រប់គ្រាន់ទេ»។
លោកស្រីបានថ្លែងថា ប្រជាជនលោកស្រី«ទើបតែចាប់ផ្ដើមដឹង»ថា ពួកគេអាចសួរសំណួរដោយសង្កត់ធ្ងន់ថារដ្ឋធម្មនុញ្ញដែលគាំទ្រដោយយោធាបច្ចុប្បន្ននេះត្រូវតែផ្លាស់ប្ដូរចេញ»ធ្វើដូច្នោះទើបវាក្លាយជាប្រទេសប្រជាធិបតេយ្យពិតប្រាកដមួយ»។
លោកស្រីស៊ូជីវ័យ៦៨ឆ្នាំបានចំណាយពេល១៥ឆ្នាំនៅក្នុងការឃុំខ្លួនក្នុងផ្ទះមុនពេលត្រូវបានដោះលែងបន្ទាប់ពីការបោះឆ្នោតឆ្នាំ២០១០៕
ប្រភពពី ភ្នំពេញប៉ុស្តិ៍
