ក្រុមហ៊ុនថាមពល កោះកុង នឹងចុះហត្ថលេខាថ្មីក្នុងការសាងសង់រោងចក្រថាមពល
កោះកុងៈ លោក លី យ៉ុងផាត់ មហាសេដ្ឋី ដែលជាសមាជិកព្រឹទ្ធសភាមកពីគណបក្សប្រជាជនកម្ពុជា និងជាម្ចាស់ក្រុមហ៊ុនថាមពលកោះកុង (KK Power) របស់កម្ពុជាគ្រោងនឹងចុះហត្ថលេខាលើកិច្ចព្រមព្រៀងវិនិយោគរួមថ្មីមួយជាមួយក្រុមហ៊ុនថាមពលថៃនៅចុងខែនេះដើម្បីកសាងរោងចក្រអគ្គិសនីដំណើរការដោយធ្យូងថ្មនៅខេត្ត កោះកុង។
កាលពីខែ មីនា ឆ្នាំនេះក្រុមហ៊ុនថាមពលអគ្គិសនី កោះកុង របស់កម្ពុជា និងក្រុមហ៊ុន Ratchaburi Electricity Generating Holding Plc របស់ ថៃ បានចុះហត្ថលេខាលើកិច្ចព្រមព្រៀងវិនិយោគរួមមានតម្លៃ ៣ ពាន់លានដុល្លារអាមេរិកដើម្បីសាងសង់រោងចក្រអគ្គិសនី ដំណើរការដោយធ្យូងថ្មផ្ដល់បរិមាណថាមពល ១ ៨០០ មេហ្គាវ៉ាត់នៅ កោះកុង។ ក្រុមហ៊ុនទាំងពីរកាន់កាប់ភាគហ៊ុន ៥០ ភាគរយរៀងៗខ្លួន។
ប្រព័ន្ធផ្សព្វផ្សាយព័ត៌មានរបស់ថៃកាលពីថ្ងៃ ទី២១ ខែ សីហា រាយការណ៍ថា ក្រុមហ៊ុន Ratchaburi Electricity Generating Holding បានលុបចោលកិច្ចព្រមព្រៀងវិនិយោគរួមរបស់ខ្លួនជាមួយក្រុមហ៊ុន KK Power ប៉ុន្តែលោក លី យ៉ុងផាត់ បានប្រាប់កាសែត ភ្នំពេញ ប៉ុស្ដិ៍ កាលពីថ្ងៃ ទី៣០ ខែ សីហា ថា លោកជួបជាមួយនឹងដៃគូរបស់ថៃថ្មីដោយបាននិយាយថា ក្រុមហ៊ុន Ratchaburi នៅតែជាដៃគូដដែល ប៉ុន្តែពួកគេគ្រាន់តែផ្លាស់ប្តូរប្រភេទនៃការវិនិយោគប៉ុណ្ណោះ។
លោកបាននិយាយថា៖ «យើងនៅតែធ្វើការជាមួយពួកគេ។ យើងបានផ្លាស់ប្តូរការវិនិយោគរបស់យើងពីរោងចក្រថាមពលអគ្គិសនីដើរដោយធ្យូងថ្មទៅជាការដំឡើងខ្សែភ្លើងអគ្គិសនីនៅក្នុងប្រទេសរបស់យើងវិញ យើងកំពុងតែសិក្សាពីលទ្ធភាពរបស់យើងនៅក្នុងពេលនេះ»។
លោក លី យ៉ុងផាត់ ប្រាប់ ភ្នំពេញ ប៉ុស្ដិ៍ កាលពីចុងខែ សីហា ថា៖ «យើងមានដៃគូថៃថ្មីមួយដើម្បីរួមគ្នាក្នុងការសាងសង់រោងចក្រថាមពលអគ្គិសនីដើរដោយធ្យូងថ្មជាមួយយើង»។
លោក លី យ៉ុងផាត់ ជាម្ចាស់ក្រុមហ៊ុន LYP Group កាលពីថ្ងៃពុធបាននិយាយថា លោកនឹងបើកកិច្ចប្រជុំមួយជាមួយនឹងដៃគូថ្មីនេះក្នុងពេលឆាប់ៗក្នុងរង្វង់ខែនេះ។
លោកលើកឡើងថា៖ «យើងនឹងចុះហត្ថលេខាលើកិច្ចព្រមព្រៀងនេះជាមួយនឹងដៃគូថ្មីនៅចុងខែនេះ»។ ប៉ុន្តែលោកនៅតែមិនប្រាប់ឈ្មោះដៃគូថ្មីនេះដោយលើកឡើងថា ដៃគូជប៉ុននឹងចូលរួមក្នុងការចុះហត្ថលេខាលើកិច្ចព្រមព្រៀងនេះ៖ «ដូច្នេះ អ្នកនឹងស្គាល់ឈ្មោះដៃគូថ្មីរបស់យើងនៅពេលអ្នកចូលរួម»។
លោកបញ្ជាក់យ៉ាងច្បាស់ថា ក្រុមហ៊ុន KK Power នឹងវិនិយោគរហូតដល់ ៣០ លានដុល្លារខាងផ្នែកខ្សែភ្លើងអគ្គិសនី រវាងរោងចក្រថាមពលធ្យូងថ្ម និងទំនប់វារីអគ្គិសនី តាតៃ។
ក្រសួង ឧស្សាហកម្ម រ៉ែនិង ថាមពលនិយាយថា តម្រូវការថាមពលសរុបរបស់កម្ពុជាគឺប្រហែល ៥០០ ម៉េហ្គាវ៉ាត់ ប៉ុន្តែនឹងកើនឡើងដល់ ៣ ០០០ ម៉េហ្គាវ៉ាត់ត្រឹមឆ្នាំ ២០២៥៕
ប្រភពពី ភ្នំពេញប៉ុស្តិ៍
