គ្រោះទឹកជំនន់ឆ្នាំនេះបំផ្លាញអស់ប្រមាណជាង $១ ពាន់លាន
ភ្នំពេញៈ មន្រ្តីគណៈកម្មាធិការគ្រប់គ្រងគ្រោះមហន្តរាយបានថ្លែងឲ្យដឹងថា ទំហំនៃការខូចខាតទឹកជំនន់បណ្តាលមកពីទន្លេមេគង្គទឹកភ្លៀងជន់មកពី ថៃ តាមការប៉ាន់ប្រមាណគិតជាទឹកប្រាក់មានរហូតដល់ ១ ពាន់លានដុល្លារសហរដ្ឋអាមេរិក ដែលជាចំនួនខូចខាតដ៏ច្រើនលើសលប់ ទៅលើប្រព័ន្ធធារាសាស្រ្ត ផ្លូវថ្នល់ និងហេដ្ឋារចនាសម្ព័ន្ធផ្សេងទៀត។
លោក ញឹម វណ្ណដា អនុប្រធាន ទី១ នៃគណៈកម្មាធិការជាតិគ្រប់គ្រងគ្រោះមហន្តរាយបានថ្លែងនៅក្នុងឱកាសពិធីប្រគល់អំណោយ ជាជំនួយសង្គ្រោះបនា្ទន់របស់ប្រទេស ជប៉ុន សម្រាប់ជួយដល់ជនរងគ្រោះដោយទឹកជំនន់ នៅព្រលានយន្តហោះអន្តរជាតិ ភ្នំពេញ កាលពីម្សិលមិញថា រដ្ឋាភិបាលប៉ាន់ប្រមាណតម្លៃនៃការខូចខាតទឹកជំនន់ឆ្នាំនេះមានទំហំដល់ទៅជាង ១ ពាន់លានដុល្លារអាមេរិក ព្រោះគ្រាន់តែខេត្តពីរ គឺ បន្ទាយមានជ័យ និង បាត់ដំបង មានជាង ៥០០ លានដុល្លារទៅហើយ ខណៈដែលទឹកជំនន់ធំ ក្នុងឆ្នាំ ២០១១ មានការខូចខាតប្រមាណតែជាង ៥៥០ លានដុល្លារប៉ុណ្ណោះ។
លោកបន្តថា ឆ្នាំនេះមានការខូចខាតច្រើន ដោយសារខូចខាតប្រព័ន្ធធារាសាស្រ្តទំនប់ធំៗ ដូចជានៅខេត្ត បាត់ដំបង បន្ទាយមានជ័យ និង សៀមរាប ហើយនិងខូចខាតផ្លូវថ្នល់ ជាច្រើនថែមទៀតផង។
លោក ញឹម វណ្ណដា បានបន្តថា៖ «ខ្ញុំចង់បញ្ជាក់ថាផ្លូវហើមអស់ហើយ បន្ទាប់ពីទឹកស្រក ទំនប់ប្រេះធ្លាយត្រូវជុសជុស ប្រព័ន្ធធារាសាស្រ្តស្ទើររងនូវការខូចខាតទាំងស្រុង ហើយចាំបាច់ត្រូវស្តារឡើងវិញ»។
យោងតាមគណៈកម្មាធិការជាតិគ្រប់គ្រងគ្រោះមហន្តរាយបានឲ្យដឹងថា ទឹកជំនន់ឆ្នាំនេះ បានសម្លាប់មនុស្សចំនួន ១៦៨ នាក់ ក្នុងនោះ ក៏បានបង្កផលប៉ះពាល់ដល់ដំណាំស្រូវជាង ៣០ ម៉ឺនហិកតា ខូចខាតជាបណ្តោះអាសន្នចំនួន ៣ ម៉ឺនហិកតា ប៉ះពាល់ដល់ដំណាំរួមផ្សំរួមមាន ពោត សណ្តែកនិងដំឡូងមី ប្រមាណ ៥០៥ ៧៤៣ ហិកតា ក្នុងនោះខូចខាត ៦ ៦០០ ហិកតា។ ប៉ះពាល់ផ្លូវជាតិនិងផ្លូវខេត្តប្រវែង ២៤១ គីឡូម៉ែត្រ និងផ្លូវក្រាលក្រួសក្រហម-ស មានប្រវែង ៣ ១៤៩ គីឡូម៉ែត្រ។
ជំនួយរដ្ឋាភិបាលជប៉ុន ដែលផ្តល់ជាជំនួយសង្គ្រោះបន្ទាន់ក្នុងគ្រោះមហន្តរាយដោយទឹក ជំនន់សម្រាប់កម្ពុជា ដែលប្រារព្ធពិធីប្រគល់ជូនកាលពីម្សិលមិញ រួមមានម៉ាស៊ីនភ្លើង ៥០ គ្រឿងធុងដាក់ទឹកយួរដៃចំនួន ២១០០ ធុង ម៉ាស៊ីនបន្សុទ្ធទឹកស្អាតចំនួន ៤៥ គ្រឿង និងធុងដាក់ទឹកចំនួន ៤៥ ធុង ដែលមានតម្លៃសរុប ៣២ លានយ៉េន។
លោក អគ្គរាជទូតជប៉ុនប្រចាំប្រទេសកម្ពុជា គូម៉ា ម៉ារ៉ូ យូជិ បានថ្លែងថា ជប៉ុនបានទទួលរងនូវការបាត់បង់អាយុជីវិតប្រជាជនខ្លួននិងទ្រព្យសម្បត្តិធំធេង កាលពីគ្រោះជួបរញ្ជួយដីនិងរលកយក្ស ស៊ូណាមី កាលពីឆ្នាំ ២០១១ តែត្រូវបានស្តារឡើងវិញដោយសារជំនួយសហគមន៍អន្តរជាតិ ក្នុងនោះ រួមមានជំនួយពីកម្ពុជាផងដែរ។
លោកបន្តថា៖ «យើងសង្ឃឹមយ៉ាងមុតមាំថា ជំនួយនេះនឹងរួមចំណែកជួយសម្រាលការលំបាករបស់ប្រជាជនដែលរងគ្រោះដោយទឹកជំនន់នាពេលថ្មីៗនេះនៅកម្ពុជា»៕
ប្រភពពី ភ្នំពេញប៉ុស្តិ៍
