ប៉ះចំស្រាកាចមានជម្លោះ ក្នុងវង់ផឹកស៊ីផ្ទុះហិង្សា ទាញដំបងនិងកាំបិតកាប់ចាក់គ្នារបួសធ្ងន់ម្នាក់
ខេត្តបាត់ដំបង ៖ បុរសម្នាក់ក្នុងស្ថានភាព ស្រវឹងធ្លាក់ភ្នែកបានទាញដំបងវាយ និងកាប់បុរសម្នាក់ នៅក្នុងវង់ស៊ីផឹកចំនួន ២ កាំបិតបណ្តាលឲ្យរបួសធ្ងន់ ហើយត្រូវសមត្ថកិច្ច ឃាត់ខ្លួនកាលពីរសៀល ថ្ងៃទី២២ ខែតុលា ឆ្នាំ២០១៣ នៅចំណុចកើតហេតុ ក្នុងភូមិអូរកំបុត្រ ឃុំព្រែកខ្ពប ស្រុកឯកភ្នំ ខេត្តបាត់ដំបង ដើម្បីកសាងសំណុំរឿង បញ្ជូនទៅតុលាការ ចាត់ការតាមនីតិវិធី។
បុរសសង្ស័យដែល ត្រូវឃាត់ខ្លួនមានឈ្មោះ ឈឿន ឆៃយ៉ា អាយុ ២៥ឆ្នាំ រស់នៅភូមិកើតហេតុ។ ចំណែកជនរងគ្រោះមានឈ្មោះ ហ៊ុន ឡុញ អាយុ ២០ឆ្នាំ រងរបួសដៃឆ្វេង២កាំបិត មានទីលំនៅក្នុងភូមិ កើតហេតុជាមួយគ្នា។ ជនរងគ្រោះឈ្មោះ ហ៊ុន ឡុញ បានប្រាប់សមត្ថកិច្ចថា ពេលខ្លួនកំពុងអង្គុយផឹកស្រា នៅផ្ទះអ្នកជិតខាងវេលាម៉ោង១១ ថ្ងៃទី២១ ខែតុលា ឆ្នាំ២០១៣ ស្រាប់តែឃើញឈ្មោះ ឈឿន ឆៃយ៉ា ដើរចូលមក ពេលនោះឈ្មោះ ហូ ហៅវាផឹកស្រា តែវាមិនផឹក។
ពេលនោះជនល្មើស បានយកដំបងឬស្សី មកវាយឈ្មោះ ហ៊ុន ឡុញ ត្រូវមួយដំបង ហើយឈ្មោះ ហ៊ុន ឡុញ ក៏ប្រតាយប្រតប់ ទើបជនល្មើសស្ទុះទៅស្រវ៉ា យកកាំបិតនៅក្រោមគ្រែ ម្ចាស់ផ្ទះមកកាប់ឈ្មោះ ហ៊ុន ឡុញ ចំត្រូវដៃឆ្វេងចំនួន២កាំបិត បណ្តាលឲ្យរងរបួសហូរឈាម ហើយឈ្មោះ ហ៊ុន ឡុញ បានទូរស័ព្ទប្តឹងសមត្ថកិច្ច ឲ្យចុះមកឃាត់ខ្លួនជនល្មើស និងទាមទារសំណងជាប្រាក់ចំនួន ១លានរៀល និងឲ្យចាត់ការតាមផ្លូវច្បាប់់។
បុរសសង្ស័យឈ្មោះ ឈឿន ឆៃយ៉ា បានសារភាពថា ខ្លួនបានផឹកស្រានៅផ្ទះឈ្មោះ វ៉ាត់ អស់ចំនួន ៥លីត្រ ក្រោយមកបានដើរទៅផ្ទះ ឈឿន ធឿន ដែលកំពុងផឹកស៊ី។ ពេលទៅដល់ឈ្មោះ កាឡុញ បានចាក់ស្រាឲ្យខ្លួន១កែវ ដើម្បីផឹកតែខ្លួនមិនផឹក ហើយភ្លាមនោះឈ្មោះ កាឡុញ បានដៀលខ្លួនថា អាឈ្លើយ ហើយដោយខ្លួនខឹងខ្លាំងទ្រាំមិនបាន ក៏ទាញកាំបិតកាប់វាចំនួន ២កាំបិតតែម្តង៕
ប្រភពពី វត្តភ្នំ