លោក ស ខេង ទូរស័ព្ទទៅលោក សម រង្ស៊ី ដោយសារបារម្ភអំពីអំពើហិង្សា ក្នុងពេលដឹកនាំបាតុកម្ម
ភ្នំពេញ: លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានមានប្រសាសន៍ ក្នុងកិច្ចសំភាសន៍ជាមួយ CEN កាលពីព្រឹកថ្ងៃទី២៣ ខែតុលា ឲ្យដឹងថា លោកបានទូរស័ព្ទ ទៅលោក សម រង្ស៊ី ដោយសារលោកមានការបារម្ភអំពីអំពើហិង្សា ក្នុងពេលដឹកនាំបាតុកម្មនេះ។
លោក ស ខេង បន្តថា ការបារម្ភរបស់លោក គឺផ្តើមចេញពីលោកកឹម សុខា បាននិយាយ នៅក្នុងកាសែត ឌឺខេមបូឌាដេលី ហើយគាត់និយាយនឹង ហាក់ដូចជា មានបំណងអ្វីមួយដែលវាមិនសូវល្អ ហាក់ដូចជាមិនចង់សហការជាមួយអាជ្ញាធរ គាត់ធ្វើអី ធ្វើតាមចិត្តរបស់គាត់ ដូចជា មានភាពញុះញង់មួយ អីចឹងហើយមានការបារម្ភណាស់ទាក់ទងបញ្ហានេះ។
លោកឧបនាយករដ្ឋមន្ត្រី ស ខេង បានបន្តថា “ផលប្រយោជន៍គណបក្សយើងខ្ញុំ មិនហ៊ានបដិសេធទេ ប៉ុន្តែយើងគិតអំពីផលប្រយោជន៍ជាតិជារួម ផលប្រយោជន៍ជាតិជាធំ ផលប្រយោជន៍ជាតិ វាធំជាងផលប្រយោជន៍គណបក្ស។ ហើយឲ្យអភិបាលរាជធានីភ្នំពេញ អញ្ជើញលោក កឹម សុខា មកជជែកពិភាក្សាគាត់មិនព្រមមក គាត់បដិសេធ មិនព្រមសហការ អីចឹងហើយ ដែលខ្ញុំបារម្ភ។ អីចឹងហើយបានខ្ញុំតេទូរស័ព្ទទៅលោកសម រង្ស៊ី ថា ខ្ញុំមានការបារម្ភបញ្ហានឹង។ ហើយខ្ញុំក៏បានជួបជាមួយទូតនានា ហើយខ្ញុំក៏បានបញ្ជាក់អំពីទាំងអស់នឹង”។
លោករដ្ឋមន្ត្រីក្រសួងមហាផ្ទៃ ស ខេង បានបញ្ជាក់ថា នៅក្នុងការទាក់ទងជាមួយលោក សម រង្ស៊ី តាមទូរស័ព្ទគឺគ្រាន់តែបញ្ជាក់បញ្ហាថា យើងរួមគ្នាឯកភាពជាគោលការណ៍ថា កុំឲ្យមានអំពើហិង្សា ទាំងសមត្ថកិច្ចក៏អត់ធ្មត់ ហើយទាំងអ្នកដឹកនាំបាតុកម្ម នឹងក៏ត្រូវតែមានការទទួលខុសត្រូវអំពីអំពើហិង្សា។
ទាក់ទងការចរចាគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិ ត្រូវបានលោកឧបនាយករដ្ឋមន្ត្រី ស ខេង លើកឡើងថា “ការចរចានៅមិនទាន់មាននៅឡើយទេ។ ហើយខ្ញុំគិតថា ប្រហែលជាក្រោយពេលធ្វើបាតុកម្មនេះ នឹងអាចចាប់យកកិច្ចការចរចានេះបន្តទៀត”៕
ប្រភពពី CEN