កម្មកររោងចក្រកាត់ដេសុងមីន ហ្វេសស៊ិនធ្វើកូដកម្មបិទផ្លូវវេងស្រេង ដើម្បីឲ្យក្រសួង ពាក់ព័ន្ធជួយដោះស្រាយ
កម្មកររោងចក្រដេរសម្លៀកបំពាក់ សុងមីន ហ្វេស៊ិន ប្រមាណជា៣០០នាក់ នាព្រឹកថ្ងៃពុធនេះ បាននាំគ្នាកូដកម្មបិទផ្លូវវេងស្រេងបណ្ដាលឲ្យកកស្ទះចរាចរ ក្រោយពីថៅកែរបស់ខ្លួនរត់ចោល ហើយមិនព្រមបើកប្រាក់ឈ្នួលឲ្យកម្មករ រយះពេល២ខែ ក្រុមកម្មករបាន អំពាវនាវឲ្យអាជ្ញាធរនិងមន្ទីរក្រសួងមន្ទីរពាក់ព័ន្ធជួយដោះស្រាយ។
ក្រុមកម្មករបាននាំគ្នាទៅឈរបិទផ្លូវវេងស្រេងកាលពីវេលាម៉ោង៩និង៣០នាទីព្រឹកថ្ងៃទី២៣ខែតុលា ឆ្នាំ២០១៣ ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។
ក្រុមកម្មករបាននិយាយថា ការដែលធ្វើឲ្យពួកគេមកឈរបិទផ្លូវបែបនេះដោយសារតែពួកគេរកដំណោះស្រាយមិនបានព្រោះអាជ្ញាធរមានសមត្ថកិច្ច ក៏ហាក់ប្រងើយកន្តើយ មិនអើពើរកដំណោះស្រាយឲ្យពួកគេ ទើបពួកគេសម្រេច ចិត្តធ្វើបែបនេះ ដើម្បីឲ្យក្រសួង ពាក់ព័ន្ធជួយដោះស្រាយឲ្យបានឆាប់ ពីព្រោះពួកគេជួបប្រទះការលំបាក ក្នុងការរស់នៅដូចជា បញ្ហាឈ្នួលផ្ទះដែលត្រូវ ម្ចាស់ផ្ទះទារ ព្រោះដល់ថ្ងៃត្រូវបង់គ្មានលុយបង់ឲ្យគេជាដើម។ កម្មករបន្តថា រោងចក្រនេះត្រូវបានថៅកែរត់ចោល ដែលគេអះអាងថា ក្ស័យធន បានបិទទ្វារកាលពីថ្ងៃ ១១ខែតុលា ឆ្នាំ២០១៣ ហើយចាប់ពីពេលនោះមកក្រុមកម្មករបាននាំគ្នាធ្វើកូដកម្មទាមទាររកដំណោះស្រាយ ដើម្បីថៅកែទទួលខុសត្រូវលើប្រាក់ឈ្នួលនិង ប្រាក់បន្ទាប់បន្សំផ្សេងៗទៀតតាមផ្លូវច្បាប់។
ជាមួយគ្នានេះដែរ គេឃើញអាជ្ញាធរមានសមត្ថកិច្ចបានចុះមកជួយអន្តរាគមន៍ពន្យល់ដល់កម្មករ ឲ្យដកថយវិញ ហើយងាកទៅរកដំណោះស្រាយដោយសន្តិ វិធី តែទោះជាយ៉ាងណា ក្រុមកម្មករហាក់ពុំមានជំនឿលើមន្ត្រីដែលមកសម្រប សម្រួលនេះទេ៕
ប្រភពពី Free Press Magazine ·
