លោកតាឡើងទៅសំណាក់ធម៌លើភ្នំជីសូរ ត្រូវឃាតកសម្លាប់យកសព ទៅកប់ចោលបំបិទដាន
ខេត្ដតាកែវ ៖ សាកសពជនរងគ្រោះ ជាលោកតាអាយុ ៧៨ឆ្នាំស្នាក់នៅសំណាក់ធម៌ លើភ្នំជីសូរ ត្រូវជនមិនស្គាល់មុខ សម្លាប់យ៉ាងឃោរឃៅ រួចយកសាកសពទៅកប់បំបាត់ដាន ហើយត្រូវបានសាច់ញាតិប្រទះឃើញ កាលពីព្រលឹមស្រាងៗថ្ងៃទី២៣ ខែតុលា ឆ្នាំ២០១៣ នៅខាងជើង វិហារវត្ដភ្នំជីសូរ ស្ថិតក្នុងឃុំរវៀង ស្រុកសំរោង ខេត្ដតាកែវ ។
ជនរងគ្រោះមានឈ្មោះ ចាប តូច អាយុ ៧៨ឆ្នាំ រស់នៅភូមិដកពរ ឃុំរវៀង ស្រុកសំរោង ។ ក្រុមគ្រួសារជនរងគ្រោះ បានឲ្យដឹងថា កាលពីល្ងាចថ្ងៃទី២២ ខែតុលា ជនរងគ្រោះបានឡើងទៅលើភ្នំ ដើម្បីសំណាក់ធម៌ ដូចសព្វមួយដង ហើយនៅក្នុងខ្លួនរបស់ជនរងគ្រោះ មានពាក់ចិញ្ចៀន១វង់ ទម្ងន់ ២ជី និងលុយ ៤០ ម៉ឺនរៀល ព្រមទាំងទូរស័ព្ទ១គ្រឿងផងដែរ ។
នៅពេលព្រលឹមស្រាងៗ បងប្អូនកូនចៅជនរងគ្រោះ ដោយសារបាត់ជនរងគ្រោះយូរ មិនឃើញមកផ្ទះក៏នាំគ្នាទៅរក នៅកន្លែងសំណាក់ធម៌ តែពុំឃើញជនរងគ្រោះនោះទេ ។ ដោយមានការសង្ស័យ ក្រុមគ្រួសារជនរងគ្រោះ ក៏បាននាំគ្នាដើររកបន្ដ ស្រាប់តែមានឃើញស្នាមដី នៅខាងជើង ព្រះវិហារលើកំពូលភ្នំជីសូរ ក៏នាំគ្នាកាយមើល ទើបឃើញសាកសពជនរងគ្រោះ ធ្វើឱ្យមានការភ្ញាក់ផ្អើលតែម្ដង ។
មន្ដ្រីជំនាញនៃ ស្នងការដ្ឋានខេត្ដបានឱ្យដឹងថា ផ្អែកតាមការស្រាវជ្រាវ ជនរងគ្រោះត្រូវជនមិនស្គាល់មុខសម្លាប់ ប្លន់យកទ្រព្យសម្បត្ដិ ដោយមានការគិតទុកជាមុន និងមានគ្នាចាប់ពី ២នាក់ឡើងទៅ ។ មន្ដ្រី ជំនាញបានបន្ដថា ជនរងគ្រោះត្រូវជនសង្ស័យ ប្រើវត្ថុរឹងវាយក្បាល ពីក្រោយជាច្រើនកន្លែង ទើបជនសង្ស័យនាំគ្នា លើកសពជនរងគ្រោះ ទៅកប់បំបិទដានជាក្រោយ ។ ជនសង្ស័យ និងជនរងគ្រោះអាចជាមនុស្សស្គាល់គ្នាច្បាស់ ទើបជនសង្ស័យសម្លាប់ ជនរងគ្រោះបំបិទមាត់ ៕
____________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ