កម្មកររោងចក្រអិលស៊ីហ្គាមែន នាំគ្នាតវ៉ាមិនព្រមចូលធ្វើការ
រាជធានីភ្នំពេញ ៖ កម្មកររោងចក្រអិលស៊ីហ្គាមែន ប្រមាណ២០០នាក់ បានប្រមូលផ្តុំគ្នាធ្វើកូដកម្មតវ៉ានៅខាងមុខរោងចក្រ កាលពីវេលាព្រឹកថ្ងៃទី១៧ តុលា ២០១៣ នៅតាមបណ្តោយផ្លូវ១៩៨៦ ស្ថិតក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានបានឱ្យដឹងថា ការដែលកម្មករនាំគ្នាតវ៉ាមិនព្រមចូលធ្វើការ ដោយសារតែអ្នកគ្រប់គ្រងរោងចក្រដកកម្មករម្នាក់ គ្មានកំហុស និងសុំទាមទារលក្ខខណ្ឌការងារចំនួន៨ចំណុចពីថៅកែរោងចក្រ ។
ប្រភពពីកម្មករបានឱ្យដឹងថា កម្មករម្នាក់ឈ្មោះអឿ សាវរី ភេទប្រុស អាយុ២២ឆ្នាំ ផ្នែកដេរ ស្នាក់នៅម្តុំវត្តសំរោងអណ្តែត ខណ្ឌសែនសុខ ត្រូវបានអ្នកគ្រប់គ្រង បញ្ឈប់មិនឱ្យចូលធ្វើការ ដោយគ្មានកំហុស ។ អឿ សាវរី បានសុំច្បាប់២ថ្ងៃ ដើម្បីទៅប្រឡងភាសាកូរ៉េ ហើយពេលត្រឡប់ចូលធ្វើការងារ ក៏ត្រូវប្រធានក្រុមហ៊ុនមិនឱ្យគេចូលធ្វើការទៅវិញ ៕
