នាយករដ្ឋមន្ត្រីថៃ ប្រកាសរក្សាសន្តិភាព តាមព្រំដែនជាមួយកម្ពុជា
កាសែតបាងកកប៉ុស្តិ៍ថៃ រាយការណ៍ថា នាយករដ្ឋមន្ត្រីថៃ នឹងធ្វើការជាមួយភាគីកម្ពុជា ដើម្បីរក្សាសន្តិភាពនៅតាមព្រំដែន បើទោះជាសេចក្តីសម្រេចតុលាការអន្តរជាតិទីក្រុងឡាអេ(ICJ) នៅថ្ងៃទី១១ខែវិច្ឆិកា យ៉ាងណាក៏ដោយ។
នាយករដ្ឋមន្ត្រីថៃ លោកស្រី យីងឡាក់ កំពុងរៀបចំការចរចាជាផ្លូវការមួយជាមួយភាគីកម្ពុជា មុនពេល តុលាការអន្តរជាតិមួយនេះ ប្រកាសសេចក្តីសម្រេចលើជម្លោះប្រាសាទព្រះវិហារ។លោកស្រី មានប្រសាសន៍កាលពីថ្ងៃព្រហស្បតិ៍ថា ប្រទេសថៃ និងប្រទេសកម្ពុជា នឹងធ្វើការរួមគ្នា ដើម្បីរក្សាសន្តិភាពនៅតាមព្រំដែន។លោកស្រីបញ្ជាក់ថា ប្រទេសទាំងពីរត្រូវតែដោះស្រាយជម្លោះ ដើម្បីរក្សាសន្តិភាពនៅតាមបណ្តោយព្រំដែន។
លោកស្រី យីងឡាក់ នឹងបើកកិច្ចប្រជុំជាបន្ទាន់មួយ នៅថ្ងៃចន្ទសប្តាហ៍ក្រោយ ដើម្បីពិភាក្សាអំពីសេចក្ដីលម្អិតនៃពាក្យថា "យន្ដការ" ឆ្លើយតបទៅនឹងសេចក្តីសម្រេចរបស់តុលាការ។
លោក Nutthavudh Photisaro អនុលេខាអចិន្ត្រៃយ៍សម្រាប់កិច្ចការបរទេសថៃ ឲ្យដឹងថា យន្ដការនោះ គឺរួមបញ្ចូលទាំងវិធានការ ការទូត យោធា នយោបាយ និងមធ្យោបាយក្នុងការអនុលោម តាមសេចក្តីសម្រេចដោយមានផលប៉ះពាល់ដល់ទំនាក់ទំនងរវាងប្រទេសទាំងពីរ។
ក្រសួងការបរទេសថៃ ទស្សន៍ទាយថា ចំណុចបួនយ៉ាងសម្រាប់សេក្តីសម្រេចរបស់ICJ គឺទីមួយ តុលាការ មិនសិទ្ធិអំណាចក្នុងការសម្រេចលើករណីនេះ ទីពីរ តំបន់ត្រួតស៊ីគ្នានៅក្បែរប្រាសាទព្រះវិហារជារបស់កម្ពុជា ទីបី តុលាការ នឹងសម្រេចថា ដីក្បែរប្រាសាទព្រះវិហារ ត្រូវបានកណត់ដោយប៉ារ៉ាម៉ែត្រ ដែលកំណត់ដោយខុទ្ទកាល័យរបស់ថៃក្នុងឆ្នាំ១៩៦២ និងទីបួន តុលាការនឹងកំណត់បន្ទាត់ព្រំដែនថ្មីសម្រាប់ប្រទេសទាំងពីរ។
អ្នកនាំពាក្យក្រសួងការបរទេសកម្ពុជា លោក កុយ គួង ប្រាប់VODកាលពីថ្ងៃព្រហ្បតិ៍ថា ភាគីកម្ពុជា សង្ឃឹមថា តុលាការ នឹងសម្រេចដោយយុត្តិធម៌ មិនឲ្យកម្ពុជា បាត់បង់ទឹកដី និងក៏មិនឲ្យកម្ពុជា រំលោភលើទឹកដីប្រទេសថៃដែរ។
ភាគីកម្ពុជា និងថៃ បានតទល់គ្នាក្នុងសវនាការរបស់តុលាការយុត្តិធម៌អន្តរជាតិ កាលពីថ្ងៃទី១៥ ដល់ថ្ងៃទី១៩ ខែមេសា ឆ្នាំ២០១៣។
ក្រោយពីការបកស្រាយតទល់គ្នាជាមួយ ភាគីថៃ សារព័ត៌មាននៅកម្ពុជា ចុះផ្សាយថា តុលាការអន្តរជាតិទីក្រុងឡាអេ គ្រោងនឹងប្រកាសសេចក្តីសម្រេចរឿងដីទំហំ ៤.៦ គីឡូម៉ែត្រក្រឡា ក្បែរប្រាសាទព្រះវិហារ នៅចុងខែតុលា ឆ្នាំ២០១៣នេះ។
គោលការណ៍គ្រឹះនៃកម្មវិធីនយោបាយរបស់ រាជរដ្ឋាភិបាលនីតិកាលទី៥ ចេញផ្សាយនៅខែកញ្ញានេះ បង្ហាញថា រាជរដ្ឋា ភិបាលកម្ពុជា បន្តខិតខំធ្វើការតស៊ូតាមផ្លូវច្បាប់ នៅតុលាការយុត្តិធម៌អន្តរជាតិ ដើម្បីឲ្យតុលាការមួយនេះ បកស្រាយសាលក្រមឆ្នាំ១៩៦២ ស្តីពីបូរណភាពដែនដី ដែលស្ថិតនៅក្នុងអធិបតេយ្យកម្ពុជា នៅតំបន់ប្រាសាទព្រះវិហារ៕
