ចាប់ខ្លួនមេតុងទីនផ្សារកណ្តាល សមាជិកតុងទីនរាប់សិបនាក់ តាមដល់សាលាដំបូងរាជធានី
រាជធានីភ្នំពេញ ៖ ដោយមានការបារម្ភខ្លាចមេតុងទីនអាចនឹងត្រូវដោះលែងក្រោយពេលចាប់ខ្លួនកាលពីរសៀលថ្ងៃទី២១ តុលា ពលរដ្ឋប្រមាណ៥០នាក់ តំណាងឱ្យសមាជិកតុងទីនរាប់រយនាក់ បានលើកគ្នាមកឃ្លាំមើលមេតុងទីនទាំងយប់ថ្ងៃដដែលដោយសុំមិនឱ្យមានការដោះលែងមេតុងទីនរូបនេះឡើយ ដរាបណាមិនព្រមសងប្រាក់តុងទីនដល់សមាជិករបស់ខ្លួនទេនោះ។
មេតុងទីនដែលត្រូវបានឃាត់ខ្លួននេះឈ្មោះសុខ កែវពិសី អាយុ៣៣ ឆ្នាំ មានទីលំនៅផ្ទះលេខ៧៦E៣ ផ្លូវលេខ១៧២ ភូមិ៦ សង្កាត់ជ័យជំនះ ខណ្ឌដូនពេញ ប្តីឈ្មោះជៀម សំអាត អាយុជាង៣០ឆ្នាំ ដូចគ្នា ។ សមាជិកមេតុងទីនម្នាក់និយាយថា ឈ្មោះសុខ កែវពិសី ត្រូវសមាជិកតុងទីនទាំងអស់ដែលភាគច្រើនជាអាជីវករនៅផ្សារកណ្តាលនាំគ្នាឡោមព័ទ្ធតូបលក់ដូររបស់មេតុងទីនរូបនេះនៅផ្សារកណ្តាលកាលពីរសៀលថ្ងៃទី២១ តុលា ម្តងរួចមកហើយ ថែមទាំងបានឱ្យធ្វើកិច្ចសន្យាទទួលស្គាល់ការជំពាក់ប្រាក់សមាជិកតុងទីនគ្រប់ៗរូបថែមទៀតផង ។ ប៉ុន្តែដោយមានសមាជិកតុងទីនខ្លះមិនសុខចិត្តក៏ប្តឹងទៅនគរបាលក្រសួងមហាផ្ទៃឱ្យចាប់ខ្លួនតែម្តង ហើយអ្វីដែលជាការកត់សម្គាល់គឺនៅពេលដែលសមត្ថកិច្ចឃាត់ខ្លួនមេតុងទីនរូបនេះហើយ បងប្អូនប្រជាពលរដ្ឋមិនអស់ចិត្តខ្លាចនគរបាលដោះលែងទៅវិញស្ងាត់ៗក៏នាំគ្នាទៅតាមឃ្លាំមើលទាំងយប់ថែមទៀត ព្រោះពួកគាត់ឮសូរថា មេតុងទីនរូបនេះបានពឹងពាក់មេធាវីដើម្បីធានាខ្លួន ។ ជាលទ្ធផល ដោយមានការតាមឃ្លាំមើលយ៉ាងយកចិត្តទុកដាក់ពីសមាជិកតុងទីន នគរបាលក្រសួងមហាផ្ទៃសម្រេចឃុំខ្លួនមេតុងទីនរូបនេះបណ្តោះអាសន្ននៅក្រសួងមហាផ្ទៃដើម្បីចាត់ការបន្តតាមផ្លូវច្បាប់ ។
សូមបញ្ជាក់ថា សមាជិកតុងទីនដែលអះអាងថា ចាញ់បោកមេតុងទីនខាងលើនេះ មានខ្លះប្រាប់ថាអស់រាប់ពាន់រាប់ម៉ឺនដុល្លារ ហេតុដូច្នេះហើយទើបពួកគាត់តាមឃ្លាំមើលយ៉ាងយកចិត្តទុកដាក់បំផុត ក្នុងគោលបំណងថា បើគ្មានលុយសងពួកគាត់ទេ គឺទាមទារឱ្យច្បាប់ដាក់ទោស និងរឹបអូសទ្រព្យសម្បត្តិមកសងដល់សមាជិកតុងទីនវិញ ព្រោះមេតុងទីនរូបនេះបានយកលុយសមាជិកទៅទិញរថយន្តទំនើបជិះនិងសង់ផ្ទះវីឡា នៅក្នុងសង្កាត់ព្រែកឯង ខណ្ឌមានជ័យ ។ រហូតមកដល់ព្រឹកថ្ងៃទី២២ តុលា មេតុងទីនឈ្មោះសុខ កែវពិសី កំពុងត្រូវបានឃុំខ្លួននៅក្នុងក្រសួងមហាផ្ទៃ និងស្ថិតក្រោមការតាមឃ្លាំមើលយ៉ាងម៉ត់ចត់ពីសំណាក់សមាជិកតុងទីនរាប់រយនាក់ ។ នៅរសៀលថ្ងៃទី២៣ តុលា ស្ត្រីជាមេតុងទីនរូបនេះត្រូវបានសមត្ថកិច្ចក្រសួងមហាផ្ទៃបញ្ជូនទៅសាលាដំបូងរាជធានីភ្នំពេញធ្វើការសាកសួរតាមនីតិវិធី ។
ទោះជាយ៉ាងណាការសាកសួរនេះ មិនទាន់បានបញ្ចប់នៅឡើយទេ នៅរសៀលថ្ងៃនោះ ហើយស្ត្រីជាប់ចោទត្រូវបានបញ្ជូនមកឃុំខ្លួននៅក្រសួងមហាផ្ទៃវិញ ប៉ុន្តែអ្វីដែលគួរឱ្យកត់សម្គាល់នោះ គឺសមាជិកជាកូនតុងទីន ក៏បានតាមទៅឃ្លាំមើលដល់សាលាដំបូងដែរ ៕