ចាប់ផ្សឹកសាមណេ ៥ អង្គនិងបណ្តេញចេញពីវត្ត រឿងសេពមេថុននិងគ្រឿងស្រវឹងលើព្រះវិហារ
ខេត្តក្រចេះ ៖ ព្រះសង្ឃចំនួន ៥ អង្គដែលបានមកស្នាក់នៅ បួសរៀនជាសមណសិស្ស ពុទ្ធិកបឋមសិក្សានៅវត្តមួយ ក្នុងឃុំប្ញស្សីកែវ ស្រុកព្រែកប្រសព្វ ដែលបានប្រព្រឹត្តចាកខុសវិន័យសង្ឃ ត្រូវបានអាជ្ញាធរខេត្ត និងមន្ត្រីសង្ឃសម្រេចចាប់ផ្សឹក និងបណ្តេញចេញពីវត្ត កាលពីព្រឹកថ្ងៃទី២៣ ខែតុលា ឆ្នាំ២០១៣ ដោយមានការចូលរួមពី ព្រះគ្រូវិន័យសង្ឃខេត្ត ព្រះគ្រូចៅអធិការវត្ត រួមទាំងពុទ្ធបរិស័ទចំណុះជើងវត្តផងដែរ។
សាមណេទាំង៥ អង្គនេះរួមមាន១-ឈ្មោះ យ៉ុង រដ្ឋា ហៅ ម៉ាប់ អាយុ ១៨ឆ្នាំ, ២-ឈ្មោះ យ៉ា សុផាត អាយុ ១៦ឆ្នាំ, ៣-ឈ្មោះ ឆុន ឡៃហ៊ាង អាយុ ១៨ឆ្នាំ ស្នាក់នៅឃុំបុសខ្នុរ ស្រុកចំការលើ ខេត្តកំពង់ចាម ៤-ឈ្មោះ ឆោម ទិត្យ អាយុ ១៦ឆ្នាំ និង៥-ឈ្មោះ កូន សម្ផស្ស អាយុ ១៦ឆ្នាំ ស្នាក់នៅស្រុកសំបូរ ខេត្តក្រចេះ។ សង្ឃទាំង៥អង្គនេះ ត្រូវបានរកឃើញថា មានប្រព្រឹត្តខុសវិន័យសង្ឃ ដោយនាំគ្នាសេពសុរា និងសេពមេថុនធម្ម ឬសេពកាមជាច្រើនលើកច្រើនសា នៅលើព្រះវិហារក្នុងវត្ត៕