ពៅ បញ្ញាពេជ្រ មានមហិច្ឆតា ចង់បង្ហាញមុខជាថ្មី ក្រោយទទួលជោគជ័យ ថ្ងៃដំបូង
ភ្នំពេញ: បន្ទាប់ពីទទួលបាននូវការគាំទ្រ យ៉ាងច្រើនលើសលប់ ពីសំណាក់ទស្សនិកជន ទាំងមិននឹកស្មានដល់ ក្នុងការបង្ហាញខ្លួន លើកទីមួយ នៅក្នុងកម្មវិធីសប្បុរសធម៌មួយ ដែលបានរៀបចំធ្វើឡើង នៅសាកលវិទ្យាល័យបញ្ញាសាស្ត្រ កន្លងមក អតីតតារាចម្រៀង ស្រីល្បីឈ្មោះ របស់ផលិតកម្ម រស្មីហង្សមាស នាង ពៅ បញ្ញាពេជ្រ ដែលបានធ្លាក់ខ្លួនពិការអង្គុយលើរទេះ ជិត១០ឆ្នាំ ដោយសារ ខ្មាន់កាំភ្លើង មិនស្គាល់អត្តសញ្ញាណលួចបាញ់ ក្នុងអំឡុងឆ្នាំ ២០០៧ បានបញ្ចេញនូវមហិច្ឆតារបស់ខ្លួន ចង់បង្ហាញវត្តមានជាថ្មីបន្តទៀត។
តារាចម្រៀង នាង ពៅ បញ្ញាពេជ្រ បានលើកឡើងថា នាងពិតជាមិននឹកស្មានដល់ទាល់តែសោះ នៅពេលដែលឃើញ ទស្សនិកជន ជាច្រើន បាននាំគ្នាស្វាគមន៍គាំទ្រ និងលើកទឹកចិត្ត ខណៈនាងសម្រេចចិត្ត ធ្វើការបង្ហាញខ្លួនលើកទីមួយ តបតាមការអញ្ចើញ របស់អ្នករៀបចំកម្មវិធី សប្បុរសធម៌មួយ អោយនាងចួលរួមច្រៀង ដើម្បីស្វែងរកនូវជំនួយឧត្ថម្ភ ដល់កុមារកំព្រានៅ ក្នុងប្រទេសកម្ពុជា។
អតីតតារាចម្រៀងរបស់ផលិតកម្ម រស្មីហង្សមាស រូបនេះ បានបន្តថា ដោយសារតែមានការគាំទ្រ និងលើកទឹកចិត្តពីទស្សនិកជននេះហើយ ទើបធ្វើអោយនាងមានចិត្តសប្បាយរីករាយឡើងវិញ បើទោះជានាងត្រូវបង្ហាញវត្តមាន បង្ហើរបទចម្រៀង នៅមុខទស្សនិកជនជាច្រើន ត្រឹមអង្គុយលើសាឡុង យ៉ាងណាក៏ដោយ។ ម្យ៉ាងទៀត ការចូលរួមគាំទ្រ និងលើកទឹកចិត្ត ក៏ជាកត្តាមួយដែលមានសារៈសំខាន់ ក្នុងការជួយជម្រុញអោយសភាពនៃជម្ងឺ ដែលកំពុងឈឺរ៉ាំរ៉ៃ នៅក្នុងខ្លួនរបស់នាង បានស្បើយបន្តិចផងដែរ។
ពាក់ព័ន្ធនឹងការបង្ហាញខ្លួនលើកដំបូង ទទួលបានការគាំទ្រ និងលើកទឹកចិត្តពីទស្សនិក ជនជាច្រើន ព្រមទាំងប្រមូលបាននូវថវិកាពីសំណាក់សប្បុរសធម៌ ប្រមាណ ៥០០ដុល្លារ នោះ តារាចម្រៀងដែលជាចៅស្រីរបស់កវីនិពន្ធបទភ្លេង និងទំនុកច្រៀងដ៏ល្បីល្បាញ គឺលោក ពៅ ស៊ីផូ នាង ពៅ បញ្ញាពេជ្រ បានបង្ហាញពីគោលបំណង ក្នុងការបង្ហាញវត្តមានបែបនេះជាថ្មីបន្តទៀត ប្រសិនបើមានការអញ្ជើញ ខណៈអាស្រ័យលើសុខភាពរបស់នាងផងដែរ។
បើតាមការអះអាងរបស់នាង ពៅ បញ្ញាពេជ្រ មកទល់ពេលនេះ នៅមិនទាន់មានបណ្តាក្រុមហ៊ុន សមាគមន៍ ឬអង្គការណាមួយ ធ្វើការទំនាក់ទំនងអញ្ជើញនាង អោយទៅចូលរួមច្រៀងនៅឡើយទេ ។ យ៉ាងណាក៏ដោយ ជាចុងក្រោយនាង ពៅ បញ្ញាពេជ្រ បានបន្តធ្វើការអំពាវនាវស្វះស្វែងរកជំនួយឧបត្ថម្ភ ពីសប្បុរសជននានាបន្ថែមទៀត ដើម្បីយកមកព្យាបាលជំងឺរបស់នាង ដែលត្រូវប្រើរយៈពេលយូរបន្តទៀត៕
ប្រភពពី CEN
Read more: http://www.cambodiapage.info/?p=627#ixzz2ichfCi4u