លោក សមរង្ស៊ី នឹងប្រាប់មន្រី្តក្រសួងការ បរទេសអាមេរិកអំពី បញ្ហានយោបាយនៅកម្ពុជា
លោក សម រង្ស៊ី ប្រធានគណបក្សសង្គ្រោះជាតិ ដែលកំពុងស្វែងរកអន្តរាគមន៍ ពីសហគមន៍អន្តរជាតិ ដូចជាអាមេរិក និងអឺរ៉ុប ត្រូវបានរាយការណ៍ថា លោកទទួលបានការអនុញ្ញាតឲ្យថ្លែងសារនយោបាយ នៅក្រសួងការបរទេសអាមេរិក នៅចំពោះមុខវត្តមានមន្ត្រីជាន់ខ្ពស់សេតវិមានអាមេរិក នៅថ្ងៃទី១៧ ខែតុលា។
យោងតាមបណ្ដាញផ្សាយព័ត៌មានកម្ពុជា CMN មួយដែលមានមូលដ្ឋាននៅអាមេរិក បានរាយការណ៍ថា នៅក្នុងដំណើរស្វែងរកអន្តរាគមន៍របស់ ប្រធានគណបក្សសង្គ្រោះជាតិ លោក សម រង្ស៊ី នៅអាមេរិក នៅថ្ងៃនេះ ប្រធានគណបក្សប្រឆាំងដែលជាប់ឆ្នោតនៅកម្ពុជា លោកមានគម្រោង ជួបមន្ត្រីការទូតអាមេរិក និងមានសន្និសីទការសែតមួយ នៅក្រសួងការបរទេសអាមេរិក នៅសេតវិមាន ហើយនៅពេលនោះ លោកសម រង្ស៊ី នឹងថ្លែងអំពីបរិបទនយោបាយនៅកម្ពុជា ដែលមានការវិវឌ្ឍថ្មីៗនេះ។
តាមប្រភពដដែលនេះ លោកសម រង្ស៊ី ត្រូវបានមន្ត្រីធនាគារពិភពលោក និងមន្ត្រីមូលនិធីរូបីយវត្ថុអន្តរជាតិ IMF ដែលមានមូលដ្ឋាននៅក្រុងវ៉ាស៊ិនតោន អនុញ្ញាតឲ្យជួប ដើម្បីបង្ហាញពីបំណង ដែលលោកចង់ឲ្យស្ថាប័នហិរញ្ញវត្ថុអន្តរជាតិពីរនេះ ជួយពិនិត្យមើលស្ថានភាពផ្ដល់ប្រាក់កម្ចី ជាមួយរដ្ឋាភិបាលកម្ពុជា។
តាមព័ត៌មានលើទំព័របណ្ដាញសង្គម Facebook លោកសម រង្ស៊ី បានជួបដោយផ្ទាល់ជាមួយលោក Eward R. Royce ប្រធានគណៈកម្មាធិការ កិច្ចការបរទេស នៃសភាអាមេរិក។ អ្នកទាំងពីរត្រូវបានរាយការណ៍មកថា បានពិភាក្សាជាមួយគ្នា យ៉ាងច្រើន អំពីបញ្ហានយោបាយនៅកម្ពុជា។
លោក Eward R. Royce ប្រធានគណៈកម្មាធិការ កិច្ចការបរទេសនៃសភាអាមេរិក គឺជាម្ចាស់ដំណោះស្រាយ សភាអាមេរិក លេខ៣១០ ដែលមានឆន្ទៈគាបសង្កត់សភាអាមេរិកទាំងមូល កាត់បន្ថយជំនួយមកកាន់កម្ពុជា៕
