ចំណាយតែ ១១៥ដុល្លារ នឹងបាន iPhone 6 ភ្លោះ?
បច្ចុប្បន្នមានទូរស័ព្ទចិនរាងដូច iPhone យ៉ាងច្រើនកំពុងចរាចរលក់លើទីផ្សារ ជាក់ស្ដែងស្មាតហ្វូនប៉ុន្មានម៉ូដែលដែលទើបសម្ពោធចេញនៅក្នុងពិព័រណ៍ផលិតផលអេឡិចត្រូនិក CES 2015 ដែលទើបកន្លងហួសទៅនេះជាដើម។ ចំណែកម៉ូដែល Gold-East MS937 នេះវិញ គឺត្រូវបានរចនារូបរាងស្ទើរតែច្រឡំនឹង iPhone 6 ទៅហើយ។
ទូរស័ព្ទចិន Gold-East MS937 ខាងលើនេះមានគែម និងមុខបញ្ឆិតដូចជា iPhone 6 ដែរ។ លក្ខណៈធ្វើឱ្យគេច្រឡំទូរស័ព្ទនេះទៅនឹង iPhone មួយទៀតគឺ ត្រូវបានបំពាក់ប៊ូតុង Home រាងមូល ថ្វីត្បិតមិនមានពណ៌មាស និងពណ៌ទឹកប្រាក់ដូច iPhone 6។ Gold-East MS937 អាចមានរូបរាងដូច iPhone 6 មែន ប៉ុន្តែតម្លៃរបស់ទូរស័ព្ទនេះធូរថ្លៃជាង គឺត្រឹមតែ ១១៥ដុល្លារប៉ុណ្ណោះ។ វាជាផលិតផលរបស់ក្រុមហ៊ុន Gold-East Electronic Co., Ltd ដែលមានស្នាក់ការនៅទីក្រុង Shenzhen ប្រទេសចិន។
កូនភ្លោះ iPhone 6 នេះដំណើរការដោយប្រព័ន្ធប្រតិបត្តិការ Android 4.4.2 មានអេក្រង់ ៥អ៊ីញ (1280×720)px, កាមេរ៉ាក្រោយ 5MP និងខាងមុខ 2MP, អង្គប្រតិបត្តិ Octa-Core (8-core) ល្បឿន 1.4GHz, RAM ទំហំ 1GB, អង្គចងចាំ 8GB, មានពីរពណ៌គឺ ស/ខ្មៅ ជាមួយកម្រិតថាមពលថ្ម 2000mAh។
សូមបញ្ជាក់ថា កន្លងទៅក្រុមហ៊ុន Lenovo និង Huawei ក៏ធ្លាប់បានបញ្ចេញស្មាតហ្វូន Android របស់ខ្លួនមានរូបរាងដូច iPhone 6 និង iPhone 6 Plus ដែរ ម៉ូដែល Lenovo S90 Sisley និងម៉ូដែល Huawei Honor 6 Plus៕
ប្រែសម្រួល៖ លី ឈៀន
ប្រភព៖ businessinsider