លោក ហ៊ុន សែន ហាមបរទេសលូកដៃក្នុងចំណាត់ការរបស់តុលាការកម្ពុជា
លោកនាយក រដ្ឋមន្ត្រី ហ៊ុន សែន នៅថ្ងៃចន្ទនេះ ប្រកាសកុំឲ្យបរទេសនានាលូកដៃប្រឆាំងនឹងចំណាត់ការរបស់តុលាការ កម្ពុជាទៅលើតំណាងរាស្រ្តរបស់គណបក្សសង្រ្គោះជាតិ៧រូប និងសកម្មជនផ្សេងៗទៀត។
លោកនាយករដ្ឋមន្រ្តី ហ៊ុន សែន បានលើកឡើងបែបនេះ ពេលលោកប្រតិកម្មខ្លាំងនឹងការវាយប្រហាររបស់អនុប្រធានគណបក្ស សង្រ្គោះជាតិ លោក កឹម សុខា នាពេលថ្មីៗនេះ នៅតាមបណ្តាខេត្តមួយចំនួន។
លោកនាយករដ្ឋមន្រ្តី ហ៊ុន សែន កាលពីកន្លងទៅ
ក្នុងពិធីចែកសញ្ញាបត្រដល់និស្សិតនៅខេត្តស្វាយរៀង លោកនាយករដ្ឋមន្រ្តីមានប្រសាសន៍ថាលោកមិនអាចទ្រាំបាននឹងការរិះគន់ និងការវាយប្រហារជាបន្តបន្ទាប់របស់លោក កឹម សុខា នោះទេ។ លោកបន្តដោយសម្តីខ្លាំងៗថាតុលាការនឹងធ្វើកិច្ចការរបស់គេ ហើយតំណាងរាស្រ្តគណបក្សសង្រ្គោះជាតិទាំង៥៥រូប មិនអាចរកសំឡេង៣ភាគ៤ពីសភាបាននោះទេ ដើម្បីគាំទ្រកុំឲ្យមានការដកអភ័យឯកសិទ្ធិយកទៅកាត់ទោស។ លោកនាយករដ្ឋមន្រ្តីឲ្យដឹងទៀតថាអភ័យឯកសិទ្ធិរបស់តំណាងរាស្រ្តទាំង ៧នោះ ទទួលបានក្រោយពេលតុលាការដោះលែងឲ្យនៅក្រៅឃុំបណ្តោះអាសន្ន។ លោកបន្តថាតុលាការនឹងចាត់វិធានការអ្នកដែលកំពុងជាប់ឃុំឃាំងមុន និងបន្ទាប់មក គឺអ្នកនៅក្រៅឃុំ។
លោកនាយករដ្ឋមន្រ្តីហាមកុំឲ្យមានការលូកដៃពីបរទេសក្នុងករណីនេះ ដោយគោរពតាមតុលាការរបស់កម្ពុជា។ លោកបញ្ជាក់ថា «ហើយសុំបរទេសនានា កុំលូកដៃ កុំលូកលាន់ចូលកិច្ចការរបស់តុលាការកម្ពុជា។ អ្នកឯងធ្លាប់តែនិយាយពីបញ្ហា ទុកឲ្យតុលាការឯករាជ្យ។ …ខ្ញុំគោរពតុលាការ»។
លោកនាយករដ្ឋមន្រ្តីឲ្យដឹងទៀតថាលោកនិយាយបែបនេះឲ្យហើយ ស្របពេលអ្នករាយការណ៍ពិសេសអង្គការសហប្រជាជាតិ លោក សុរិយា ស៊ូប៊ែឌី កំពុងតែបំពេញទសន្សកិច្ចនៅកម្ពុជា។
គួររំឮកថា តំណាងរាស្ត្រគណបក្សសង្រ្គោះជាតិទាំង៧រូបនោះ រួមមាន លោកស្រី មូរ សុខហួរ បេក្ខជនតំណារាស្ត្រជាប់ឆ្នោតខេត្តបាត់ដំបង លោក ម៉ែន សុថាវរិន្ទ្រ បេក្ខជនតំណាងរាស្ត្រជាប់ឆ្នោតខេត្តកំពង់ធំ លោក ហូរ វ៉ាន់ បេក្ខជនតំណាងរាស្ត្រនៅភ្នំពេញ លោក លោក រៀល ខេមរិន្ទ្រ បេក្ខជនតំណាងរាស្ត្រគណបក្សសង្គ្រោះជាតិខេត្តស្វាយរៀង និងលោក កែវ ភីរម្យ បេក្ខជនតំណារាស្ត្រជាប់ឆ្នោតខេត្តក្រចេះ លោក ឡុង រី បេក្ខជនជាប់ឆ្នោតតំណាងរាស្ត្រខេត្តបន្ទាយមានជ័យ និង លោក នុត រំដួល បេក្ខជនតំណាងរាស្ត្រជាប់ឆ្នោតខេត្តកំពង់ស្ពឺ។
អ្នកទាំង៧រូប ត្រូវបានចោទប្រកាន់ពីបទដឹកនាំធ្វើកុបកម្ម យោងតាមមាត្រា ៤៥៩នៃក្រមព្រហ្មទណ្ឌ និងពីបទផ្តើមគំនិតបង្កហិង្សា និងញុះញង់ឲ្យប្រព្រឹត្តបទឧក្រិដ្ឋ យោងតាមមាត្រា ២៨, ២១៨ និង ៤៩៥នៃក្រមព្រហ្មទណ្ឌ។
គួរបញ្ជាក់ថា លោក សុរិយា ស៊ូប៊ែឌី នឹងជួបជាមួយលោក សម រង្ស៊ី និងលោក កឹម សុខា នៅវិមានរដ្ឋសភា នៅព្រឹកថ្ងៃអង្គារស្អែកនេះ។
គួររំឮកថា កន្លងទៅ សហគមន៍ជាតិ និងអន្តរជាតិ រួមទាំងសហរដ្ឋអាមេរិកផងដែរ ធ្លាប់បានអំពាវនាវឲ្យដោះលែងតំណាងរាស្រ្តសង្រ្គោះជាតិ លោកស្រី មូរ សុខហួរ ពេលលោកស្រីជាប់ពន្ធនាគារ៕ ប្រភពៈ VOD
