កញ្ញា ព្រះ កាយច័ន្ទ ធ្លាយដំណឹងមានថៅកែស្រីចិញ្ចឹម
តាមប្រភពច្បាស់ការបានរាយការណ៍មកថា តារាស្រី កញ្ញា ព្រះ កាយច័ន្ទ បច្ចុប្បន្ននេះ កំពុងតែមានថៅកែស្រីម្នាក់ទំនុកបម្រុង យកចិត្តទុកដាក់ ដើម្បីជ្រោមជ្រែងភាពហ៊ឺហារាល់ថ្ងៃ។
ប្រភពដែលសុំមិនបញ្ចេញឈ្មោះបានរាយការណ៍មកថា រថយន្ត Visto ដែល ព្រះកាយចន្ទ័ កំពុងតែជិះរាល់ថ្ងៃ ត្រូវបានថៅកែស្រីម្នាក់ចេញប្រាក់ មិនត្រឹមតែប៉ុណ្ណោះ ថែមទាំងចេញប្រាក់រាប់ពាន់ដុល្លារទៅកែខ្ទង់ច្រមុះថែមទៀត។ ប្រភពនេះ បានបន្តទៀតថា ថៅកែស្រី ដែលនៅឈរចាំជួយ ព្រះកាយច័ន្ទនោះ គឺជា មនុស្សម្នាក់មានឥទ្ធិពលក្នុងសិល្បៈ។
ព្រះ កាយច័ន្ទ មិនបានចេញមុខបកស្រាយលើការលើកឡើងខាងលើឡើយ ព្រោះជារឿយរាល់សំនួរអ្នកសារព័ត៌មាន តែងតែត្រូវបាន លោក ពៅ ចាន់តារា ដែលត្រូវជា ឪពុករបស់នាងជាអ្នកនាំពាក្យជំនួសទាំងអស់។ ឪពុករបស់ព្រះ កាយចន្ទ័ បានទទួលស្គាល់ថា រថយន្ត Visto ដែលព្រះកាយចន្ទ័ កំពុងតែជិះរាល់ថ្ងៃ ពិតជាមានអ្នកទិញឲ្យមែន ប៉ុន្តែ ការចេញប្រាក់ទិញរថយន្តឲ្យនោះ មិនមែនក្នុងន័យ ស្នេហា ឬ កូនស្រីរបស់លោក ស្រលាញ់ភេទដូចគ្នាឡើយ ពោលប្រាក់ទាំងនោះ គឺជា ការដោះដូរការងារសិល្បៈប៉ុណ្ណោះ។
លោក ពៅ ចាន់តារា បានបញ្ជាក់ថា កូនស្រីរស់ខ្លួន ត្រូវបានអ្នកស្រី ហូវ ដានេ អគ្គនាយិកា មជ្ឈមណ្ឌលកែសម្ផស្សឌែម៉ូគ្លីនិក ជាអ្នកចេញប្រាក់ ព្រោះថៅកែស្រីនោះអាណិត ត្បិតតាំងពីចូលសិល្បៈមក ព្រះកាយចន្ទ៏ មិនដែលមានរថយន្តជិះដូចគេឡើយ។
លោក បានបន្តថា ការចេញប្រាក់នេះ មិនមែនឲ្យដោយមិនគិតអ្វីឡើយ តាមពិត គឺកូនស្រីរបស់លោកត្រូវធ្វើពិធីការិនីប្រចាំគ្លីនិកមួយនេះ ជាថ្នូរទៅនឹងប្រាក់នោះ។ ក្រៅពីផ្ដល់ប្រាក់ទិញរថយន្ដ ឌែម៉ូគ្លីនិក កែខ្ទង់ច្រមុះក្នុងតម្លៃ ១៥០០ ដុល្លារ ឲ្យព្រះ កាយច័ន្ទ។ លោក ពៅ ចាន់តារា បានលើកឡើងថា កាលពីពេលកន្លងទៅ ព្រះកាយចន្ធ័ ធ្លាប់ទៅកែខ្ទង់ច្រមុះម្ដងហើយនៅកន្លែងកែសម្ផស្សមួយ ប៉ុន្តែមិនដូចបំណង ហើយនៅពេលមកកែនៅឌែម៉ូគ្លីនិកនេះត្រូវចិត្ត ក៏សហការជាមួយគ្នាតែម្ដងទៅ។
ឪពុក ព្រះកាយ ច័ន្ទ និយាយថា រថយន្ត Visto ដែលកូនរបស់លោកកំពុងជិះមានតម្លៃ ៣៥០០ ដុល្លារ ដោយនៅក្នុងនោះ អ្នកស្រី ហូវ ដានេ ឲ្យ ១៥០០ ដុល្លារ ថៅកែស្រីរបស់ស្ថានីយទូរទស្សន៍ប៉ុស្តិ៍លេខ ៩ ចំនួន ១០០០ ដុល្លារ ហើយនៅសល់ប៉ុន្មាន ព្រះកាយចន្ទ័ ជាអ្នកចេញ។
លោកបានបញ្ជាក់ថា រាល់ការធ្វើពិធីការិនីឲ្យ ឌែម៉ូគ្លីនិកម្ដងៗ បានតម្លៃខ្លួនតម្លៃ ២០០ ដុល្លារ តែត្រូវគ្លីនិកកាត់យកវិញ តាមចំនួនដែលថៅកែស្រីចេញឲ្យ។ ចំណែកនៅប្រាក់ ១០០០ ដុល្លារ ពីប៉ុស្តិ៍លេខ ៩ វិញ គឺបានមកពីខ្សែភាពយន្តដែលព្រះ កាយចន្ធ័បានថត៕
អត្ថបទ៖ ខុត សីហា