កូនក្រមុំជាប់ពិរុទ្ធគ្រួសារស្វាមីនៅតែមានទំនុកចិត្ត
ដោយសារតែចង់ឮបទភ្លេងបាយខុនចងដៃ ដើម្បីបានក្រាបសំពះផ្ទឹមមុខមេបាតាមគន្លងប្រពៃណី កូនក្រមុំដែលបន្ទុំសម្រស់ចាំតែថ្ងៃទ្រង់គ្រឿងមង្គល ខណៈពេលារៀបអាពាហ៍ពិពាហ៍ខិតជិតចូល ដ្បិតតែមិនមានប្រាក់កាសចាត់ចែងពិធី ទើបកើតចិត្តធំហ៊ានចេញធ្វើជាចោរដៃឆៅប្លន់ម៉ូតូរកលុយមករៀបការ ប្តីបំពេញមុខមាតាបិតា។ តែគួរឲ្យស្តាយទង្វើប្រាស់ចាកគន្លងច្បាប់បានត្រឹមតែបន្សល់នូវ វិប្បដិសារីក្នុងជីវិត និងរឿងអាស្រូវឈ្មោះជាប់ជាកូនក្រមុំជាប់ពិរុទ្ធទៅវិញ។
ព្រះសង្ឃសូត្រមន្តនាំពរជ័យសិរីសួស្ដីដល់គូស្វាមីភរិយាថ្មីគឺ លោក មាស សុខគុជ និងកូនក្រមុំជាប់ពិរុទ្ធនាង ខុន ស្រីឌី។ រូបថត សហការី
បើទោះជាកំពុងជាប់ពិរុទ្ធពីបទប្លន់ និងប៉ុនប៉ងមនុស្សឃាតដោយចាក់ជនរងគ្រោះធ្លាយពោះវៀនក្ដី ក៏យុវតីវ័យ ២០ ឆ្នាំរស់នៅ និងបម្រើការជាកម្មការិនីនៅក្រុងបាវិតឈ្មោះ ខុន ស្រីឌី នៅតែអាចសម្រេចបំណងរៀបការយ៉ាងអធិកអធម ខណៈស្វាមីកំពុងឱបជាប់ទ្រូងក៏នៅតែបង្ហាញភក្ដីភាពស្រឡាញ់ភរិយាឥត ប្រួលប្រែ ទាំងជំនឿចិត្តមុតមាត់ថា ប្រពន្ធម្ចាស់ចិត្តរបស់ខ្លួនមិនមែនជាជនឧក្រិដ្ឋនោះឡើយ។
កាលពីថ្ងៃ១១រោជ ខែបុស្ស ត្រូវនឹងថ្ងៃសុក្រទី១៥ ខែមករា ឆ្នាំ ២០១៥ សំឡេងភ្លេងការបន្លឺឡើងកងរំពងពេញភូមិ ក៏ជាស្នូរដាស់អស់ភ្ញៀវកិត្តិយសដែលកាន់ធៀបអញ្ជើញ បញ្ជាក់ថា ខុន ស្រីឌី ដែលបានជាប់ឃុំក្នុងពន្ធនាគាររយៈពេល ១៣ ថ្ងៃមុននឹងត្រូវបានតម្កល់ប្រាក់ធានាដោះលែងឲ្យមករៀបការនឹង កំលោះ មាស សុខគុជ ជាកម្មកររោងចក្រដូចគ្នានោះ ពួកគេមិនបានរំសាយថ្ងៃពេលាជ័យដោយសារមានព្រឹត្តិការណ៍ដ៏អាម៉ាស់ នោះឡើយ។
រោងការនៅមុខផ្ទះកូនក្រមុំនៅថ្ងៃរៀបអាពាហ៍ពិពាហ៍។ រូបថត សហការី
ក្នុងថ្ងៃមង្គលការ កូនកំលោះ មាស សុខគុជ ថែមទាំងបាននិយាយប្រាប់ម្ដាយក្មេកថា ខ្លួនមិនខ្វល់ពីរឿងទោសកំហុសអ្វីរបស់ភរិយាឡើយ ហើយលោកក៏មិនជឿថា នាងជាមនុស្សអាក្រក់ដូចការចោទប្រកាន់ដែរ។
នៅក្រោមស្នូរភ្លេងការចាក់យ៉ាងទ្រហឹងអឺងកង ម្ដាយឪពុកកូនក្រមុំជាប់ពិរុទ្ធ បានជួបសម្ភាសផ្ទាល់ជាមួយ កម្ពុជាចុងសប្តាហ៍ ដោយអះអាងថា៖ «គ្មានរឿងអ្វីដែលថា ពិធីរៀបអាពាហ៍ពិពាហ៍កូនស្រីខ្ញុំមិនអាចដំណើរការនោះទេ ហើយពិធីក៏មិនមែនពិធីក្លែងក្លាយ ឬជប់លៀងបន្លំភ្នែកញាតិដែរ គឺពិធីរៀបអាពាហ៍ពិពាហ៍ពេញលក្ខណៈពីរយប់បីថ្ងៃធម្មតា»។
បើទោះជាមានរបាយការណ៍ភ្លូកទឹកភ្លូកដីនិយាយពីបទល្មើសរបស់កូនស្រី ខ្លួនក្ដី ក៏លោក ខុន ស៊ីថា ជាឪពុកនៅតែអះអាងជាមួយនឹងសម្ដីខ្លាំងម៉ាត់ៗដដែលៗថា៖ «អ្នកណាថាកូនខ្ញុំប្លន់ម៉ូតូយកលុយការប្តី ផ្សព្វផ្សាយខ្វះភាពយុត្តិធម៌ មិនដឹងការពិត គ្មានបានសម្ភាស»។
លោកថា៖ «ម៉េចត្រឹមអាលុយមួយពាន់ពីរពាន់ដុល្លារហ្នឹង ម៉ែឪប៉ុងដែរ រកលុយការប្តីឲ្យកូនមិនបាន? កុំថាឡើយការកូនមួយហ្នឹង ហើយការមួយទៀតក៏ខ្ញុំរកលុយបានការដែរ។ ចុះចាំបាច់អីកូនទៅប្លន់គេយកលុយការប្តី។ ពាក្យនេះជាពាក្យបង្កាច់បង្ខូចកូនខ្ញុំទាំងស្រុង»។
ក្នុងទឹកមុខមាំ ឪពុករូបនេះថ្លែងថា៖ «កូនខ្ញុំប្លន់ម៉ូតូនោះជារឿងមូលបង្កាច់ទាំងស្រុង។ រឿងនេះបើតាមកូនខ្ញុំប្រាប់ខ្ញុំ ជារឿងខាងប្រុសនោះប៉ងចាប់រំលោភកូនស្រីខ្ញុំទេ ហើយថានាងចាក់ធ្លាយពោះចេញពោះវៀននោះក៏មិនពិតដែរ។ វាគ្រាន់តែមុតឆូតហ្នឹង។ នាងថាពេលនោះ ប្រវាយប្រតប់គ្នាក៏ត្រូវទៅ»។
លោកថា៖ «ម៉េចត្រឹមអាលុយមួយពាន់ពីរពាន់ដុល្លារហ្នឹង ម៉ែឪប៉ុងដែរ រកលុយការប្តីឲ្យកូនមិនបាន? កុំថាឡើយការកូនមួយហ្នឹង ហើយការមួយទៀតក៏ខ្ញុំរកលុយបានការដែរ។ ចុះចាំបាច់អីកូនទៅប្លន់គេយកលុយការប្តី។ ពាក្យនេះជាពាក្យបង្កាច់បង្ខូចកូនខ្ញុំទាំងស្រុង»។
ក្នុងទឹកមុខមាំ ឪពុករូបនេះថ្លែងថា៖ «កូនខ្ញុំប្លន់ម៉ូតូនោះជារឿងមូលបង្កាច់ទាំងស្រុង។ រឿងនេះបើតាមកូនខ្ញុំប្រាប់ខ្ញុំ ជារឿងខាងប្រុសនោះប៉ងចាប់រំលោភកូនស្រីខ្ញុំទេ ហើយថានាងចាក់ធ្លាយពោះចេញពោះវៀននោះក៏មិនពិតដែរ។ វាគ្រាន់តែមុតឆូតហ្នឹង។ នាងថាពេលនោះ ប្រវាយប្រតប់គ្នាក៏ត្រូវទៅ»។
លោក ខុន ស៊ីថា បានថ្លែងចោទជាចម្ងល់ថា៖ «មនុស្សស្រីណាទៅប្លន់កើត មនុស្សប្រុសមានគ្នាបីនាក់ កូនស្រីខ្ញុំម្នាក់ឯងគិតមើលទៅ?»។
រូបថតកូនកំលោះក្រមុំនៅមុខរោងការកាលពីម្សិលមិញ។ រូបថត សហការី
ករណីស្ត្រីជិតចូលរោងការប្លន់ម៉ូតូយកលុយរៀបការប្តីកាលពី ថ្ងៃទី២៥ ខែធ្នូ ឆ្នាំ២០១៤ តាមរបាយការណ៍ពីខាងសមត្ថកិច្ចបានបង្ហាញថា ខុន ស្រីឌី បានសារភាពថា នាងពិតជាមានចេតនាប្លន់ម៉ូតូ រួមទាំងខ្សែកខ្សែដៃមែន ដើម្បីយកលុយរៀបការប្តី ព្រោះលុយថ្លៃបណ្ណាការខាងប្រុសឲ្យនាងត្រូវបាននាងយកលេងល្បែងចាញ់ អស់។ នាងត្រូវបានសម្រេចឲ្យជាប់ឃុំ។ លុះបានរយៈពេល ១៣ ថ្ងៃក៏ត្រូវក្រុមគ្រួសារឪពុកម្តាយធានាសុំនៅក្រៅឃុំ ដោយតម្កល់ប្រាក់ចំនួន ៤ លានរៀលដើម្បីយកកូនស្រីមករៀបការតាមប្រពៃណី។
អ្នកស្រី យ៉ាន ស៊ី ជាម្តាយកូនក្រមុំជាប់ពិរុទ្ធ បានបដិសេធនឹងព័ត៌មានដែលថា កូនស្រីគាត់ញៀនអបាយមុខ យកប្រាក់បណ្ណាការទៅលេងល្បែងចាញ់អស់ទើបបែកគំនិតធ្វើចោរប្លន់។
អ្នកស្រីប្រាប់ថា៖ «កូនខ្ញុំ ស្រីឌី នាងសូម្បីទៅធ្វើការក៏មិនដែលទៅម្នាក់ឯងដែរ។ បើឪវាមិនបានជូន ក៏ប្អូនដែរ ហើយដូចគ្នា ពេលត្រឡប់មកវិញក៏ទៅទទួលដែល មិនឲ្យនាងទៅណាមកណាម្នាក់ឯងដែរ ហើយអារឿងថា កូនខ្ញុំលេងល្បែងនោះវាដូចជាការបង្កាច់បង្ខូចកូនខ្ញុំទាំង ស្រុង»។
ជាមួយគ្នានោះអ្នកស្រីលើកឡើងថា៖ «បើសិនជាកូនខ្ញុំអាក្រក់ថ្នាក់ហ្នឹង ចោរផង លេងល្បែងផង ចាំបាច់អី សុខគុជ និងក្រុមគ្រួសារគេនៅអាណិតស្រឡាញ់ និងរៀបការជាមួយនោះ។ គេនឹងប្តឹងឲ្យខ្ញុំសង់បណ្ណាការមួយជាន់ទៀតហើយ តែនេះគេមើលឃើញកូនខ្ញុំមិនដូចគេចោទ»។
យ៉ាងណា រឿងនេះនៅមិនទាន់ចប់នៅឡើយទេ ខណៈតុលាការគ្រាន់តែចេញដីកាឲ្យពិរុទ្ធជនស្រីវ័យក្មេងនៅក្រៅឃុំ មួយរយៈ ដើម្បីបានមករៀបការតាមប្រពៃណីតាមការគ្រោងទុកតែប៉ុណ្ណោះ។ តុលាការនឹងបន្តនីតិវិធី តែមិនទាន់កំណត់កាលបរិច្ឆទច្បាស់លាស់នៅឡើយ។
សម្ដីមេភូមិបានថ្លែងប្រាប់ពីរឿងអាពាហ៍ពិពាហ៍កាលពីម្សិលថា៖ «ស្រីឌី និងកូនកំលោះ មាស សុខគុជ គ្មានអ្វីរំខានទេ។ ភ្ញៀវក៏មកចូលរួមធម្មតា ច្រើនតាមការអញ្ជើញ ហើយយប់មិញចាក់ធុងបាស់រាំទល់ជិតភ្លឺ»៕ ប្រភពៈ ភ្នំពេញប៉ុស្តិ៍
