Apple ត្រៀមចេញ iPad Plus ប្រើប៊ិចដូច Galaxy Note
របាយការណ៍ថ្មីចុងក្រោយមួយ ចេញពីសារព័ត៌មាន Apple Insider ឱ្យដឹងថា ក្រុមហ៊ុន Apple ពេលនេះ អាចកំពុងសំងំផលិត iPad ជំនាន់ថ្មីអមជាមួយប៊ិច Stylus ងាយស្រួលសរសេរអក្សរនៅលើថេប្លេតរបស់ខ្លួន។ អ្នកវិភាគមួយរូបគឺលោក Ming-Chi Kuo នៅស្ថាប័ន KGI Securities បាននិយាយថា លោកជឿថាក្រុមហ៊ុន Apple នឹងប្រកាសចេញ iPad Pro ឬ iPad Plus ដែលមានប៊ិច Stylus នៅអំឡុងត្រីមាសទី២ ឆ្នាំ២០១៥នេះ។
ការវិភាគរបស់លោក Ming-Chi Kuo គឺធ្វើឡើងបន្ទាប់ពីក្រុមហ៊ុន Apple បានចុះបញ្ជីប៉ាតង់បច្ចេកវិទ្យាពាក់ព័ន្ធនឹង Stylus ជាច្រើននៅប៉ុន្មានឆ្នាំងមកនេះ។ ម្យ៉ាងការលើកឡើងរបស់លោក Kuo ក៏ដោយផ្អែកលើដៃគូផ្គត់ផ្គង់របស់ Apple ផងដែរ។ លោក Kuo និយាយថា ដើម្បីផ្ដល់ភាពកាន់តែងាយស្រួល touch បញ្ជាសរសេរអក្សរជាងការប្រើម្រាមដៃ Apple អាចនឹងប្រើប៊ិច Styus ហើយក៏អាចមានជា Keyboard និង Mouse ថែមទៀតក៏ថាបាន។
អ្នកវិភាគជឿថា ការផលិតថេប្លេតដោយបន្ថែមប៊ិច Stylus មកជាមួយនេះ នឹងធ្វើឱ្យតម្លៃដាក់លក់ iPad កើនឡើង។ ម៉ូដែល iPad Plus មានប៊ិចដំបូង អាចប្រើត្រឹមមុខងារសរសេរធម្មតា តែម៉ូដែលក្រោយៗទៀត អាចត្រូវបានច្របាច់បញ្ចូលមុខងារពិសេស gyroscope ឬ accelerometer ដើម្បីគាំទ្រ ការគូសចេញ 3D ដោយប្រើប៊ិច៕
ប្រែសម្រួល៖ លី ឈៀន
ប្រភព៖ macworld, techspot
