មន្ត្រីឥណ្ឌូណេស៊ី៖ QZ8501 ហោះឡើងយ៉ាងលឿន (លើសយន្តហោះប្រយុទ្ធ) រួចសំកាំងមុនពេលធ្លាក់
រដ្ឋមន្ត្រីក្រសួងដឹកជញ្ជូនឥណ្ឌូណេស៊ីលោក Ignasius Jonan បានថ្លែងថា ផ្អែកតាមទិន្នន័យបានពីរ៉ាដាបង្ហាញថា យន្តហោះ Airbus A320-200 បានហោះឡើងយ៉ាងលឿនគឺក្នុងល្បឿន ១៨០០ម៉ែត្រក្នុងមួយនាទីហើយក៏សំកាំង មុនពេលយន្តហោះធ្លាក់។
យន្តហោះរបស់ក្រុមហ៊ុន AirAsia ខាងលើ ត្រូវបានក្រុមអ្នកជំនាញផ្នែកឧតុនិយមលើកឡើងថា យន្តហោះធ្លាក់ដោយសារតែអាកាសធាតុមិនល្អ។ ទោះជាយ៉ាងណា ក្រុមអ្នកស៊ើបអង្កេត កំពុងធ្វើការវិភាគទៅលើទិន្នន័យនៅក្នុងប្រអប់ខ្មៅរបស់យន្តហោះមុនពេលអាចបញ្ចេញរបាយការណ៍បឋមបាន។
មុនពេលដែលយន្តហោះបាត់ពីប្រព័ន្ធរ៉ាដា កាពីតែនអាកាសយានិកត្រូវបានស្នើឱ្យហោះឡើងខ្ពស់ដើម្បីគេចឱ្យផុតពីព្យុះ ប៉ុន្តែការិយាល័យអ្នកបើកបរមិនបានអនុញ្ញាតភ្លាមៗនោះទេដោយសារតែយន្តហោះផ្ទុកមនុស្សច្រើន។
មន្ត្រីឥណ្ឌូណេស៊ីខាងលើ បានថ្លែងដូច្នេះថា ៖ «រ៉ាដាចាប់បានត្រង់ចំណុចមួយគឺយន្តហោះហោះក្នុងកម្រិតល្បឿន ១៨០០ម៉ែត្រក្នុងមួយនាទីមុនពេលធ្លាក់។ មានយន្តហោះជាច្រើនគ្រឿងហោះនៅចំចំណុចដែលរ៉ាដាចាប់បាននោះដែរ»។
មន្ត្រីឥណ្ឌូណេស៊ីដដែលបានបន្តទៀតថា ៖«វាគឺជារឿងដ៏កម្រមួយទៅហើយសម្រាប់យន្តហោះប្រយុទ្ធអាចបើកក្នុងល្បឿនហោះឡើង ១៨០០ម៉ែត្រក្នុងមួយនាទី។ ចំណែកយន្តហោះពាណិជ្ជកម្មវិញ គឺបើកឡើងកម្រិតល្បឿនត្រឹមតែពី ១០០០ ទៅ ១២០០ហ្វីត (ជាង ៣០០ម៉ែត្រ)ក្នុងមួយនាទីគឺវាលឿនខុសពីកម្រិតធម្មតាទៅហើយ»៕
