តុលាការខេត្តកំពង់ចាមប្រគល់រថយន្តឲ្យម្ចាស់នៅកំពតបន្ទាប់ប្រតិកម្មពីភរិយានាយករដ្ឋមន្ត្រី
តុលាការខេត្តកំពង់ចាម បានសម្រេចប្រគល់រថយន្តមួយគ្រឿងទៅម្ចាស់នៅខេត្តកំពត ដើម្បីប្រើប្រាស់បណ្ដោះអាសន្នតាមការស្នើសុំពីមេធាវី។ ម្ចាស់រថយន្តយល់ថា ការសម្រេចនេះប្រសិនបើមិនមានការផ្ញើសារពីសំណាក់ប្រពន្ធនាយក រដ្ឋមន្ត្រី លោក ហ៊ុន សែន ទេ ប្រហែលជារថយន្តរបស់ខ្លួន តុលាការមិនទាន់ប្រគល់ឱ្យឡើយ។
ដីកាសម្រេចរបស់តុលាការខេត្តកំពង់ចាម ដោយមានហត្ថលេខាពីសំណាក់ចៅក្រមស៊ើបសួរ លោក ងួន វុទ្ធី បានសម្រេចប្រគល់រថយន្តម៉ាក HYUNDIA ទៅឲ្យមេធាវី លោក គឹម វាសនា ដែលជាមេធាវីការពារក្តីឱ្យម្ចាស់រថយន្ត គឺលោក អ៊ួក ពៅ យកទៅប្រើប្រាស់បណ្ដោះអាសន្ន ដោយមិនត្រូវលក់ដូរ ផ្ទេរកម្មសិទ្ធិ ជួល ឬបញ្ចាំ និងមិនត្រូវធ្វើឱ្យខូចស្ថានភាពដើមរបស់រថយន្តនោះជាដាច់ខាត។ នៅក្នុងដីកានោះបញ្ជាក់ថា ការប្រគល់ឱ្យនេះ បន្ទាប់ពីខាងតុលាការទទួលបានពាក្យស្នើសុំពីមេធាវី កាលពីថ្ងៃទី២៦ ខែវិច្ឆិកា ហើយមកដល់សាលាដំបូងខេត្តកំពង់ចាម នៅថ្ងៃទី២៧ វិច្ឆិកា ដែលចាត់ទុកថាត្រឹមត្រូវទៅតាមផ្លូវច្បាប់ហើយនោះ។
សមត្ថកិច្ចបានដកហូតរថយន្តរបស់លោក អ៊ួក ពៅ កាលពីថ្ងៃទី២៤ កក្កដា បន្ទាប់ពីរថយន្តនោះត្រូវបានឈ្មោះ សន សារ៉ា យកទៅបញ្ចាំកាលពីថ្ងៃទី២៣ កក្កដា នៅហាងបញ្ចាំឈ្មោះ ហៀង វណ្ណលីដង់ នៅស្រុកចម្ការលើ ដែលមានរឿងចម្រូងចម្រាសនោះ។ រឿងចម្រូងចម្រាសត្រង់ថា អ្នកយករថយន្តទៅបញ្ចាំបានរត់គេចខ្លួនបាត់ ប៉ុន្តែម្ចាស់រថយន្តបែរជាត្រូវម្ចាស់ហាងបញ្ចាំប្ដឹងសមត្ថកិច្ច ឱ្យចាប់ខ្លួន ហើយបញ្ជូនមកតុលាការខេត្ត។ តុលាការក៏សម្រេចចោទប្រកាន់ពីបទផ្សំគំនិតឆបោក និងបានឃុំម្ចាស់រថយន្ត និងប្រពន្ធ កាលពីថ្ងៃទី២៨ កក្កដា តែដោយមានប្រតិកម្មពីពលរដ្ឋខេត្តកំពត ជាច្រើនរយនាក់ មកតវ៉ានៅមុខតុលាការនោះ ទើបតុលាការសម្រេចដោះលែងអ្នកទាំងពីរឱ្យនៅក្រៅឃុំកាលពីថ្ងៃទី ៣០ កក្កដា។
ទាក់ទងបញ្ហានេះដែរ ម្ចាស់រថយន្តនៅខេត្តកំពត លោក អ៊ួក ពៅ បញ្ជាក់ថា ប្រសិនបើមិនមានប្រតិកម្មពីលោកជំទាវ ប៊ុន រ៉ានី ហ៊ុន សែន ចំពោះបញ្ហានេះតាមប្រព័ន្ធផ្សព្វផ្សាយនៅក្នុងស្រុក កាលពីថ្ងៃទី២៦ វិច្ឆិកា ទេនោះ ឡានរបស់លោកមិនសង្ឃឹមថានឹងបានត្រឡប់វិញឡើយ បើទោះបីជាលោកមានឯកសារគ្រប់គ្រាន់យ៉ាងណាក៏ដោយ៖ «អាជ្ញាធរពី ថ្នាក់ដឹកនាំ គាត់បានផ្ញើសារមកបង វុទ្ធី ហង្ស មាស ហ្នឹង ក៏បានថាប្រគល់ឯកសិទ្ធិមកម្ចាស់ឡានវិញ ប៉ុន្តែតុលាការមិនទាន់ឱ្យកាតគ្រីមកខ្ញុំវិញទេ។ បាទ! ជាការប្រើប្រាស់បណ្ដោះអាសន្នទេ»។
លោកបន្ថែមថា តាំងពីលោក និងប្រពន្ធ ត្រូវតុលាការសម្រេចឱ្យនៅក្រៅឃុំមក លោកតែងដាក់លិខិតស្នើសុំយករថយន្តទៅប្រើប្រាស់ ដើម្បីរកប្រាក់សងបំណុលគេ ប៉ុន្តែគ្មានលទ្ធផលល្អទេ ក្រោមហេតុផលថាតុលាការកំពុងស៊ើបអង្កេត។ លោកស្នើឱ្យតុលាការស្វែងរកយុត្តិធម៌ ចំពោះការចោទប្រកាន់លោក និងប្រពន្ធ ថារួមគំនិតឆបោក ព្រមទាំងឃាត់ និងឃុំខ្លួនលោក និងប្រពន្ធរយៈពេល ៦ថ្ងៃ កាលពីខែកក្កដា ទាំងមិនមានកំហុសអ្វីសោះនោះ។ លើសពីនេះទៀត លោកចង់ឱ្យតុលាការ ផ្តល់ឱ្យនូវឯកសារដែលពាក់ព័ន្ធជាមួយរថយន្តមកឱ្យលោកវិញ ដើម្បីអាចទៅរកស៊ីដោយគ្មានការភ័យខ្លាច។
ដោយឡែកម្ចាស់រថយន្តមួយរូបទៀត នៅខេត្តពោធិ៍សាត់ លោក នួន មិថុនា ដែលមានឡានម៉ាក់អ៊ីស៊ុយស៊ុយ (ISUSU) កំពុងជាប់នៅប៉ុស្តិ៍នគរបាលស្រុកចម្ការលើ ឱ្យដឹងថា តុលាការខេត្តកំពង់ចាម មិនបានធ្វើការងាររបស់ខ្លួនទៅតាមច្បាប់នោះឡើយ ពោលគឺឡានរបស់លោកមានរឿងដូចគ្នាទៅនឹងឡានរបស់ពលរដ្ឋនៅខេត្ត កំពត ដែរ ប៉ុន្តែឡានលោកនៅមិនអាចស្នើសុំយកមកប្រើប្រាស់វិញបាន៖ «លោក នួន មិថុនា៖ ខ្ញុំសូមឱ្យរដ្ឋាភិបាលជួយអន្តរាគមន៍ខ្ញុំផង មើលទៅរដ្ឋាភិបាលមិនអន្តរាគមន៍ ឡានខ្ញុំមិនអាចចេញបានទេ។ បើដូចគាត់ឡានកំពត អ៊ីចឹងទាល់តែលោកជំទាវស្រែកមក បានគាត់អាចយកឡានចេញបាន។ បើខ្ញុំបើមិនជួយអន្តរាគមន៍ទេ មិនអាចយកឡានចេញបានទេ។ តុលាការមិនបានធ្វើការផង ដេកចេញខ្ញុំយកលុយទៅឱ្យ»។
លោកបន្តថា កន្លងមកលោកបានដាក់ពាក្យស្នើសុំទៅតុលាការជាច្រើនលើកច្រើនសាមក ហើយ ដើម្បីយករថយន្តមករកស៊ីវិញ ក៏ប៉ុន្តែតុលាការថាកំពុងស៊ើបអង្កេត ហើយបែរជាទារប្រាក់លោកចំនួន ៣ពាន់ដុល្លារ ប្រសិនបើលោកចង់បានឡានទៅវិញ បើទោះបីជាលោកមានឯកសារគ្រប់គ្រាន់បញ្ជាក់ថា លោកជាម្ចាស់ឡាននោះ និងជាជនរងគ្រោះយ៉ាងណាក៏ដោយ។
ឡានអ្នកទាំងពីរ បានជួលទៅឱ្យឈ្មោះ សន សារ៉ា ហើយត្រូវ សន សារ៉ា យកទៅបញ្ចាំ និងលក់ផ្តាច់នៅហាងបញ្ចាំឈ្មោះ ហៀង វណ្ណលីដង់ នៅស្រុកចម្ការលើ ខេត្តកំពង់ចាម កាលពីខែមិថុនា និងខែកក្កដា។
ទាក់ទងបញ្ហានេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) លោក នាង សុវ៉ាត យល់ថា សំណុំរឿងបញ្ចាំឡានទាំងពីរនេះ តុលាការហាក់ផ្តល់អាទិភាពដល់អ្នកមានច្រើនជាងអ្នកក្រ ហើយភាពយុត្តិធម៌ពេលនេះ អាចទទួលបានតាមរយៈប្រតិកម្មពីភរិយាថ្នាក់ដឹកនាំកំពូលមកខាង តុលាការ មិនមែនកើតចេញពីតុលាការសុទ្ធសាធនោះទេ៖ «ជាទូទៅ បើយើងមើលសូម្បីតែខ្ញុំ សូម្បីតែអ្នកស្រុក សូម្បីតែអាជ្ញាធរដែលក្បែរៗហ្នឹង ក៏គេឃើញថា អ្នកទទួលបញ្ចាំនេះជាទង្វើខុសច្បាប់ដែរ។ ក៏ប៉ុន្តែ តុលាការហាក់កាន់ជើងអ្នកហ្នឹងច្រើនជាង ហើយធ្វើបាបអ្នកក្រ។ អាហ្នឹងដែលធ្វើឱ្យប្រជាពលរដ្ឋលែងមានជំនឿទុកចិត្តលើប្រព័ន្ធ យុត្តិធម៌»។
លោកបញ្ជាក់ទៀតថា តុលាការគប្បីពិចារណាទៅលើឯកសារដែលមានរវាងម្ចាស់រថយន្ត និងម្ចាស់ហាងបញ្ចាំ ប្រសិនបើភាគីណាមានឯកសារគ្រប់គ្រាន់ហើយ តុលាការចាំបាច់ត្រូវប្រគល់ឡានឱ្យគេវិញជាផ្លូវការ រួមទាំងឯកសារផង។ លោកថា តុលាការគប្បីចាប់អ្នកយកឡានមកបញ្ចាំ និងអ្នកទទួលបញ្ចាំ ពីព្រោះអាចជាអ្នកទទួលផលចោរកម្ម ឬអ្នកផ្សំគំនិតក្នុងរឿងនេះ៕ ប្រភពៈ RFA
