លោក សម រង្សី ប្រកាសមិនចូលរួមប្រជុំសភា បើមិនបែងចែកអំណាចឲ្យមានតុល្យភាព
ភ្លាមៗបន្ទាប់ពីដាក់ជើង ជាន់ព្រលានយន្តហោះអន្តរជាតិភ្នំពេញ មេដឹកនាំបក្សប្រឆាំងបានប្រកាសថា នឹងមិនចូលរួមប្រជុំសភាទេ ដ៏រាបណាគណបក្សប្រជាជនកម្ពុជា មិនព្រមធ្វើការបែងចែកអំណាច ឲ្យមានតុល្យភាពនោះ ។ តុល្យភាពដែលត្រូវបានគណបក្សសង្គ្រោះជាតិ អះអាងថា ទាល់តែប្រគល់តំណែង ប្រធានរដ្ឋសភា មកឲ្យខ្លួន ប៉ុន្តែត្រូវបានបក្សប្រជាជនបដិសេធ ។
ដើម្បីប្រឆាំងចំពោះការបដិសេធនេះ លោក សម រង្ស៊ី បានថ្លែងប្រាប់ក្រុមអ្នករាយការណ៏ព័ត៌មានកាលពីព្រឹកមិញថា លោកនឹងដឹកនាំបាតុកម្មរយៈពេល៣ថ្ងៃ ដែលផ្ដើមចាប់ពីព្រឹកថ្ងៃទី២៣ តុលា ស្អែកនេះ ។ ជាបាតុកម្ម ប្រឆាំងលទ្ធផលឆ្នោត ជ្រើសរើសតំណាងរាស្រ្ត នីតិកាលទី៥ និងទាមទារឲ្យរដ្ឋាភិបាល គោរពកិច្ចព្រមព្រៀងទីក្រុងប៉ារីស ថ្ងៃទី២៣ តុលា ឆ្នាំ១៩៩១ ។
យោងតាមលទ្ធផល ដែលបានពីការបោះឆ្នោតថ្ងៃទី២៨កក្កដា ឆ្នាំ ២០១៣ ដែលប្រកាសដោយគ.ជ.ប បានបង្ហាញថា គណបក្សប្រជាជនកម្ពុជា ទទួលបាន៦៨ អាសន ចំណែកគណបក្សសង្គ្រោះជាតិ ដែលជាគណបក្សប្រឆាំង ទទួលបាន៥៥ អាសន ។ ប៉ុន្តែយ៉ាងណាក៏ដោយ គណបក្សសង្គ្រោះជាតិចោទថា គ.ជ.ប បានគៃបន្លំសន្លឹកឆ្នោតរបស់ខ្លួន ឲ្យ បក្សប្រជាជន ដែលបានក្លាយជាមូលហេតុ ធ្វើឲ្យជាប់គាំង នយោបាយមកដល់ពេលនេះ ៕
ប្រភពពី Free Press Magazine ·