ACU ជំរុញឲ្យប៉ុស្តិ៍នគរបាល ច្រកទ្វារព្រំដែនអន្តរជាតិ ចាំយាមខេត្តកោះកុងកែ លម្អការងាររបស់ខ្លួន
អង្គភាពប្រឆាំងអំពើពុករលួយ (ACU) ជំរុញឲ្យប៉ុស្តិ៍នគរបាលច្រកទ្វារព្រំដែនអន្តរជាតិចាំយាម ខេត្តកោះកុង កែលម្អការងាររបស់ខ្លួន បន្ទាប់ពីអង្គភាពបានទទួលពាក្យបណ្តឹងតាមទូរស័ព្ទពាក់ព័ន្ធការយកលុយរបស់ពលរដ្ឋដែលទៅធ្វើការ ដោយខុសច្បាប់នៅប្រទេសថៃ។
ការជំរុញនេះធ្វើទ្បើង បន្ទាប់ពីនាយប៉ុស្តិ៍នគរបាលច្រកទ្វារព្រំដែនអន្តរជាតិចាំយាម ខេត្តកោះកុង លោក សួស សុខតារ៉ា កាលពីដើមខែកញ្ញា ឆ្នាំ២០១៣ បានផ្ញើលិខិតទៅប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ដើម្បីឆ្លើយបំភ្លឺពីការចោទប្រកាន់លោកថា បានយកលុយពីពលរដ្ឋដែលឆ្លងដែនទៅធ្វើការនៅថៃចំនួន ១២០០បាត (៣៨.៧៨ដុលា្លរអាមេរិក) ក្នុងម្នាក់ និង ៤០០បាត (១២.៩ ដុល្លារអាមេរិក) ក្នុងម្នាក់នៅពេលពួកគាត់ត្រទ្បប់មកប្រទេសកំណើតវិញ និងការយកលុយពីទ្បានដឹកទំនិញ និងរថយន្តគ្រប់ប្រភេទ នៅពេលឆ្លងកាត់ច្រកព្រំដែន។
ពាក្យបណ្តឹង និងលិខិតឆ្លើយឆ្លងរវាងលោកវរសេនីយ៍ឯក សួស សុខតារ៉ា និងលោកឱម យ៉ិនទៀង ត្រូវបានអង្គភាពប្រឆាំងអំពើពុករលួយ ផ្សាយនៅលើគេហទំព័ររបស់ខ្លួន នៅថ្ងៃសុក្រនេះ។
ក្នុងលិខិតឆ្លើយបំភ្លឺរបស់ខ្លួន ចុះថ្ងៃទី៦ ខែកញ្ញា លោក សួស សុខតារ៉ា អះអាងថា ប៉ុស្តិ៍មិនមានគោលការណ៍ទារលុយពីពលរដ្ឋខ្មែរ និងរថយន្តដឹកទំនិញទេ ហើយក៏មិនតម្រូវឲ្យមន្ត្រីក្រោមឱវាទ ប្រព្រឹត្តនូវបាតុភាពអសកម្មដូចការលើកទ្បើងនោះទ្បើយ។
លោក ឱម យ៉ិនទៀង បានទទួលយកជាបណ្តោះអាសន្ន នូវការឆ្លើយបំភ្លឺរបស់លោក សួស សុខតារ៉ា និងស្នើឲ្យបិទផ្សាយលិខិតបំភ្លឺ ដែលមាន៣ទំព័រជាសាធារណៈ នៅប៉ុស្តិ៍នគរបាលច្រកទ្វារព្រំដែនអន្តរជាតិចាំយាមខេត្តកោះកុង ដើម្បីឲ្យម្ចាស់បណ្តឹងបានជ្រាបពីដំណោះស្រាយ របស់អង្គភាពប្រឆាំងអំពើពុករលួយ។
អ្នកសម្របសម្រួលសមាគមការពារសិទ្ធិមនុស្សអាដហុក (Adhoc) ប្រចាំខេត្តកោះកុង លោក នាង បូរាទីណូ ស្វាគមន៍ចំណាត់ការអង្គភាពប្រឆាំងអំពើពុករលួយ ប៉ុន្តែស្នើឲ្យអង្គភាពនេះចាត់វិធានការរឹតបន្តឹងខ្លាំងជាងនេះ ៖ "ចំណាត់ការទៅលើច្រកព្រំដែនហ្នឹង គួតែរឹតបន្ដឹងបន្ថែមទៀតពីព្រោះថា ការមានវិធានការនេះ គ្រាន់តែជា មានវិធានការមួយមិនទាន់បានស៊ីជម្រៅ ហើយមិនទាន់មានភាពច្បាស់លាស់ ក្នុងការចំណាត់ការក្នុងការយកលុយយកកាក់ ចឹងប្រជាពលរដ្ឋដែលគាត់ចង់ទៅចំណាក់ស្រុក ដែលខុសច្បាប់ហ្នឹងគឺវាស្រួលណាស់" ។
កន្លងមក អង្គការសង្គមស៊ីវិល ដែលធ្វើការលើបញ្ហាចំណាកស្រុករបស់ពលរដ្ឋ ក៏ធ្លាប់លើកទ្បើងពីអំពើពុករលួយរបស់មន្ត្រីនៅតាមព្រំដែនមួយចំនួន ដែលយកលុយពីពលរដ្ឋ ដែលធ្វើឲ្យអត្រាចំណាកស្រុកខុសច្បាប់កើនទ្បើង៕