វៀតណាមជំរុញឲ្យពង្រឹងសន្តិសុខព្រំដែនខណៈបក្សប្រឆាំងនៅកម្ពុជារកឃើញមានការរំលោភទឹកដីខ្មែរ
ក្រសួងមួយនៃប្រទេសវៀតណាម កាលពីថ្ងៃសុក្រម្សិលមិញបានស្នើឲ្យកម្ពុជាសហការគ្នាដើម្បីទប់ស្កាត់ បទឧក្រិដ្ឋឆ្លងដែននានារួមទាំងពង្រឹងសន្តិសុខតាមខ្សែក្រវ៉ាត់ព្រំដែន ។
ការស្នើសុំនេះធ្វើឡើងបន្ទាប់ពីមន្ត្រីបក្សប្រឆាំងរកឃើញថា ប្រទេសជិតខាងមួយនេះបានធ្វើផ្លូវរំលោភចូលដីខ្មែរជិត៥០គីឡូម៉ែត្រ នៅឃុំដាក់ដាំក្នុងខេត្តមណ្ឌលគិរី ។
កិច្ចព្រមព្រៀងនោះធ្វើឡើងរវាងមន្ត្រីជាន់ខ្ពស់នគរបាលសាធារណៈរដ្ឋ ប្រជាមានិតវៀតណាម លោក ត្រឹង ដាយក្វាង និងរដ្ឋមន្ត្រីក្រសួងមហាផ្ទៃកម្ពុជា លោក ស ខេង កាលពីថ្ងៃទី១៦ខែមករាឆ្នាំ២០១៥ម្សិលមិញ ។
គណៈប្រតិភូជាន់ខ្ពស់នៃក្រសួង នគរបាលសាធារណរដ្ឋសង្គមនិយម វៀតណាមបំពេញទស្សនៈកិច្ចនៅកម្ពុជា(រូបថតដោយក្រសូង មហាផ្ទៃ)
នៅចុងឆ្នាំ២០១៤ តំណាងរាស្ត្របក្សប្រឆាំង លោក ម៉ៅ មុនីវណ្ណ បានស្នើប្រធានរដ្ឋសភាលោកហេង សំរិន ឲ្យកោះហៅ លោកនាយករដ្ឋមន្ត្រីហ៊ុន សែន មកសាកសួរដេញដោលផ្ទាល់មាត់ក្នុងរដ្ឋសភាករណីរដ្ឋាភិបាលមិនអាច ទប់ស្កាត់បាន នូវអ្វីដែលលោកអះអាងថា វៀតណាមបានធ្វើ ផ្លូវក្រាលកៅស៊ូរំលោភចូលដីកម្ពុជានៅតំបន់ដាក់ដាំ ខេត្តមណ្ឌលគិរី ប្រមាណជិត៥០គីឡូម៉ែត្រ ។
មកដល់ពេលនេះព័ត៌មានជុំវិញគម្រោងកោះហៅនាយករដ្ឋមន្ត្រីឲ្យចូល បំភ្លឺក្នុងសភាតាមការចង់បានរបស់មន្ត្រីបក្សប្រឆាំងនោះមិនទាន់ ត្រូវបានប្រកាសជាសាធារណៈថា លោក ហ៊ុន សែន នឹងព្រមចូលទៅបំភ្លឺក្នុងសភាថ្ងៃណាពិតប្រាកដនៅឡើងទេ ក្រៅពីការអះអាងមុនការបោះឆ្នោតឆ្នាំ២០១៣ជាង៥ម៉ោងកន្លងទៅ ។
ក្រោយពីការអះអាងរបស់លោក ម៉ៅ មុនីវណ្ណ ពីការរំលោភបូរណៈភាពទឹកដីខ្មែរថ្មីទៀតពីសំណាក់ប្រទេសវៀតណាមនេះ ប្រធានគណៈកម្មាការព្រំដែនកម្ពុជាលោក វ៉ា គឹមហុង ធ្លាប់ប្រាប់ VOD ថាវៀតណាមពិតជាបានធ្វើផ្លូវនៅតំបន់នោះរំលោភលើសន្ធិសញ្ញា បំពេញបន្ថែមឆ្នាំ២០០៥ និងសេចក្តីប្រកាសរួមនៃប្រទេសទាំងពីរដែលបានសម្រេចដាក់តំបន់នោះជា តំបន់ស ។
ប៉ុន្តែលោកថា កម្ពុជានឹងព្យាយាមជួបពិភាក្សាជាមួយភាគីនៃប្រទេសវៀតណាមដើម្បីស្វែងរកដំណោះស្រាយ ។
យ៉ាងណាក៏ដោយ លោក ត្រឹង ដាយក្វាង ភាគីវៀតណាមក៏បានព្រមព្រៀងដែរថា រដ្ឋាភិបាលខ្លួននៅតែបន្តជួយបណ្តុះបណ្តាលមន្ត្រីជំនាញផ្នែកនគរបាល កម្ពុជា ឲ្យបាន៦០០នាក់ ក្នុងឆ្នាំ២០១៥នេះ តាមផែនការដែលបានគ្រោងទុក ដើម្បីពង្រឹងសមត្ថភាពជំនាញបន្ថែម ៕ ប្រភពៈ VOD
