គណបក្សប្រឆាំង មានគូប្រជែងច្រើនជាងគណបក្សកាន់អំណាច
មិនមែនជារឿងចៃដន្យទេ ដែលសម្តេចក្រុមព្រះ នរោត្តម រណឫទ្ធិ បានឡើងកាន់តួនាទីជាប្រធានគណបក្សហ្វ៊ុនស៊ិនប៉ិច ក្នុងសមាជ នាព្រឹកថ្ងៃទី១៩មករា។ ជាពេលវេលា ដែលសម្តេចក្រុមព្រះ បានប្រកាស ដឹកនាំហ្វ៊ុនស៊ិនប៉ិច ដើម្បីប្រជែងនឹងគណបក្សសង្គ្រោះជាតិ ដឹកនាំដោយលោកសមរង្ស៊ី និងលោកកឹមសុខា សម្រាប់ការបោះឆ្នោតឃុំសង្កាត់ នៅឆ្នាំ២០១៧ និងការបោះឆ្នោតជាតិ នៅឆ្នាំ២០១៨។
កាលពីព្រឹកថ្ងៃចន្ទ ទី១៩មករា លោកហ៊ុនសែន ប្រមុខដឹកនាំគណបក្សប្រជាជនកម្ពុជា ដែលជាគូប្រជែងចាស់ ក៏បានប្រកាសថា លោកសមរង្ស៊ី ក្បត់កិច្ចព្រមព្រៀងនយោបាយ។ ក្នុងពេលដែលគណបក្សហ្វ៊ុនស៊ិនប៉ិច បានរួបរួមផ្ទៃក្នុង ងាកមកតទល់នឹងគណបក្សសង្គ្រោះជាតិ គឺគណបក្សប្រជាជនកម្ពុជា ក៏កម្រើកខ្លួនឡើងវិញ ចំពេលដែលក្រុមបណ្តាញថ្មីរបស់លោក កែម ឡី គ្រោងនឹងបង្កើតគណបក្សប្រឆាំងមួយទៀត។ ចលនានយោបាយនេះ នាំឲ្យគណបក្សសង្គ្រោះជាតិ ត្រូវប្រឈមនឹងដៃគូប្រជែងដល់ទៅ ៣ ក្នុងពេលតែមួយ ៕ ប្រភពៈ RFI