ប្រេងសាំងលើពិភពលោកចុះថ្លៃហើយ ចឹងថ្លៃសាំង និងថ្លៃភ្លើង នៅផ្ទះជួលសម្រាប់កម្មករ ក៏ល្មមចុះដែរ!
កោះកុង: ក្នុងពិធីសម្ពោធដាក់ឲ្យប្រើប្រាស់វារីអគ្គិសនី ឫស្សីជ្រុំក្រោម នៅខេត្តកោះកុង កាលពីព្រឹកថ្ងៃទី១២មករានេះ សម្តេចនាយករដ្ឋមន្ត្រី ហ៊ុនសែន បានប្រកាសឲ្យអាជ្ញាធរដែនដី ពិនិត្យ ធ្វើយ៉ាងណាឲ្យតម្លៃភ្លើងអគ្គិសនីតាមបណ្តាខេត្ត ពិសេសតម្លៃអគ្គិសនីតាមបន្ទប់ផ្ទះជួលរបស់កម្មកររោងចក្រកាត់ដេរ នៅភ្នំពេញ ដល់ពេលដែលត្រូវចុះថ្លៃហើយ ព្រោះប្រេងសាំងចុះថ្លៃយូរហើយ។
សម្តេចតេជោ ហ៊ុន សែន បានជំរុញឲ្យអាជ្ញាធរអគ្គិសនីកម្ពុជា អាជ្ញាធរដែនដី និងក្រសួងរ៉ែ និងថាមពល ពិនិត្យមើលការលក់ភ្លើងរបស់ផ្នែកឯកជន ដែលមកដល់ពេលនេះ តម្លៃអគ្គិសនី មិនបានចុះសោះ នៅពេលដែលតម្លៃប្រេងនៅលើទីផ្សារ មានការធ្លាក់ចុះជាងពាក់កណ្តាលទៅហើយ នោះ ។ ជាមួយនេះសម្តេចក៏បានស្នើឲ្យក្រុមហ៊ុន ប្រេងឥន្ធនៈនៅក្នុងប្រទេសកម្ពុជា បន្តចុះថ្លៃបន្ថែមទៀត ព្រោះក្រសួងសេដ្ឋកិច្ច និងហិរញ្ញវត្ថុ បានធ្វើលិខិតទៅក្រុមហ៊ុនទាំងនោះឲ្យបញ្ចុះតម្លៃមកនៅត្រឹម ៣.៩០០ រៀលក្នុង ១ លីត្រ តែមកទល់ពេលនេះក្រុមហ៊ុនសាំងមួយចំនួន មិនទាន់បានចុះនៅឡើយទេពិសេសក្រុមហ៊ុនបរទេស។
សម្តេចតេជោ ហ៊ុន សែន បានបន្តថា “វាល្មមបញ្ចុះតម្លៃបានហើយ ប្រេងដែលស្តុកទុកពីមុននោះ វាល្មមអស់ហើយដែរ”។
នៅក្នុឳកាសនោះ សម្តេចក៏បានស្នើឲ្យក្រុមហ៊ុនអគ្គិសនីកម្ពុជា សហការជាមួយអជា្ញធររាជធានីភ្នំពេញ ចុះធ្វើការ សិក្សាផងដែរ ចំពោះលំនៅដ្ឋាន ដែលកម្មករកម្មការិនី កំពុងជួលស្នាក់នៅរាជធានីភ្នំពេញ ដែលមានជាង ៣ ម៉ឺនបន្ទប់ ហើយដែលតម្លៃភ្លើងនៃបន្ទប់ជួលនោះ មានតម្លៃពី ៨៥០ រៀល ទៅ ២៥០០ រៀលក្នុងមួយគីឡូវ៉ាត់ម៉ោង ដែលម្ចាស់ផ្ទះជួលទារពីកម្មករ ដូចនេះត្រូវរកវិធីដោះស្រាយធ្វើយ៉ាងណា ដើម្បីឲ្យតម្លៃនេះមានការធ្លាក់ចុះសម្រាប់បងប្អូនកម្មករ។
ជាមួយនេះ សម្តេចក៏បានបង្ហាញពីផែនការបញ្ចុះតម្លៃអគ្គិសនីសម្រាប់ប្រជាពលរដ្ឋ ដែលរស់នៅក្នុងខេត្តកោះកុងផងដែរ៕ប្រភពៈ CEN
