ស្ត្រីម្នាក់ឆ្លងទន្លេ កណ្តាលផ្លូវពេលប្តី ឌុបតាមម៉ូតូដើម្បី ទៅមន្ទីរពេទ្យ
ខេត្ត
កណ្តាល ៖ ស្ត្រីម្នាក់បានឈឺពោះឆ្លងទន្លេនៅចិញ្ចើមផ្លូវជាតិ
ខណៈដែលប្តីបានឌុប
ក្នុងបំណងមកសម្រាលកូននៅមន្ទីរពេទ្យបានត្រឹមពាក់កណ្តាលផ្លូវ
ប៉ុណ្ណោះ ត្រូវប្រជាពលរដ្ឋជួយសង្គ្រោះ
អ្នកខ្លះរត់ទៅរកពេទ្យឆ្មប អ្នកខ្លះទៀតយកកន្ទេល
សារុងមកក្រាល អ្នកខ្លះទៀតយកភ្លើងពិលបំភ្លឺ
ទីបំផុតសម្រាលបានកូនស្រីម្នាក់ រួចផុតពីគ្រោះថ្នាក់ទាំង
ម្តាយទាំងកូន ។ហេតុការណ៍សម្រាលកូននៅពាក់កណ្តាលផ្លូវនេះបានកើតឡើងនៅវេលា ម៉ោង៩និង ៣០នាទីយប់ ថ្ងៃទី០៣ ខែកញ្ញា ឆ្នាំ២០១៤ នៅចិញ្ចើមផ្លូវជាតិលេខ២១B ភូមិទួលក្រសាំង ស្រុកស្អាង ចំណុចជិតស្ពានលេខ១ ខាងមុខមណ្ឌលកុមារអារុណរៈ ។
ស្ត្រីឆ្លងទន្លេតាមផ្លូវមានឈ្មោះម៉ែន ចាន់ថា អាយុ២៧ឆ្នាំ ប្តីឈ្មោះសយ សៅ អាយុ៤៣ឆ្នាំ មុខរបរកសិករ មានទីលំនៅភូមិក្បាលកោះ ឃុំកោះខ្សាច់ទន្លា ស្រុកស្អាង ខេត្តកណ្តាល ។
លោក សយ សៅ ជាប្តីស្ត្រីខាងលើបានបន្តថា នៅវេលាម៉ោងប្រមាណ២០និង៣០នាទី ថ្ងៃទី០៣ ខែកញ្ញា ឆ្នាំ២០១៤ ប្រពន្ធរបស់គាត់មានសភាពឈឺពោះ ហើយរូបគាត់បានយកម៉ូតូដឹកចេញពីផ្ទះនៅភូមិក្បាលកោះ ឃុំកោះខ្សាច់ទន្លា ឆ្លងទូកដរមកត្រើយម្ខាងដោយឲ្យសាច់ញាតិអង្គុយឱបពីក្រោយ ។ ពេលឆ្លងដររួបហើយ រូបគាត់ក៏បានបើកម៉ូតូយ៉ាងប្រញ៉ាប់ប្រញ៉ាល់ដោយការប្រុង ប្រយ័ត្នក្នុងគោលបំណងដឹកភរិយាទៅសម្រាលកូននៅមន្ទីរពេទ្យកែវសាន មានទីតាំងស្ថិតក្នុងក្រុងតាខ្មៅ ខេត្តកណ្តាល ។
ប្តីស្ត្រីខាងលើបានបន្តទៀតថា ពេលកំពុងធ្វើដំណើរយ៉ាងតក់ក្រហល់នោះ ប្រពន្ធរបស់គាត់បានស្រែកឈឺពោះតាមផ្លូវ រហូតមកដល់ចំណុចស្ពានទី១ខាងមុខមណ្ឌលកុមារកំព្រាអារុណរះ ប្រពន្ធរបស់គាត់កាន់តែឈឺពោះខ្លាំងឡើងៗរហូតធ្វើឲ្យរូបគាត់ជា ប្តីមានការតក់ស្លុតយ៉ាងខ្លាំង ក៏ឈប់ម៉ូតូក្បែរចិញ្ចើមផ្លូវដាក់ប្រពន្ធឲ្យអង្គុយចុះក្បែរ ចិញ្ចើមផ្លូវ ស្រែកឲ្យប្រជាពលរដ្ឋជិតខាងជួយ ។ ភ្លាមៗនោះក៏មានប្រជាពលរដ្ឋជាច្រើននាក់ខ្លះកាន់កន្ទេល ខ្លះកាន់សារុង មកក្រាលឲ្យប្រពន្ធរបស់គាត់ដេក និងមានប្រជាពលរដ្ឋមួយចំនួនទៀតអូសម៉ូតូរបស់ខ្លួន(របស់ប្រជា ពលរដ្ឋ) បើកទៅដឹកក្រុមគ្រូពេទ្យប្រចាំតំបន់ប្រតិបត្តិការសឹករងខេត្តក ណ្តាល មកជួយសម្រាលកូនរបស់គាត់(លោក សយ សៅ) ។ ជាមួយគ្នានោះដែរ ក៏មានសមត្ថកិច្ចនគរបាលប៉ុស្តិ៍រដ្ឋបាលរកាខ្ពស់ទៅជួយ អន្តរាគមន៍នៅកន្លែងកើតហេតុ ដើម្បីសម្រួលចរាចរណ៍ និងសន្តិសុខជូនដល់ក្រុមគ្រូពេទ្យ និងស្ត្រីឆ្លងទន្លេ ។
បន្ទាប់ពីក្រុមគ្រូពេទ្យ២នាក់ធ្វើការសម្រាលកូនឲ្យស្ត្រីខាង លើអស់រយៈពេលប្រមាណកន្លះម៉ោងក្រោយមក ស្ត្រីខាងលើបានសម្រាលបានកូនស្រីមួយសម្បុរស យ៉ាងត្រលុកត្រលន់ ដោយពុំបានធ្វើឲ្យមានការគ្រោះថ្នាក់ដល់ស្ត្រីជាម្តាយ និងកូននោះទេ ។ ក្រោយពីសម្រាលកូនតាមចិញ្ចើមផ្លូវបានយ៉ាងជោគជ័យហើយនោះ សមត្ថកិច្ច និងប្រជាពលរដ្ឋ បានហៅម៉ូតូកង់បីដឹកស្ត្រីខាងលើ និងកូនទៅកាន់មន្ទីរពេទ្យជ័យជំនះក្រុងតាខ្មៅ ដើម្បីឲ្យក្រុមគ្រួពេទ្យជំនាញជួយចាក់ថ្នាំ ៕
_
______________________ប្រភពពីនគរវត្ត
