កម្មករតវ៉ាបិទផ្លូវជាតិលេខ២ ក្រោយពីថៅកែរត់ចោល
ភ្នំពេញៈ កម្មករជិត ៤០០ នាក់មកពីរោងចក្រ USA នៅក្នុងសង្កាត់ចាក់អង្រែក្រោម ខណ្ឌមានជ័យបានធ្វើការបិទផ្លូវប្រមាណជា ១ ម៉ោងទាមទាររកដំណោះស្រាយជូនពួកគេ បន្ទាប់ពីថៅកែបានលួចដឹកអីវ៉ាន់ចេញពីរោងចក្រ។
កញ្ញា សយ ណាគ្រី ជាតំណាងកម្មករបាននិយាយកាលពីព្រឹកមិញនេះថា កម្មករបានបិទផ្លូវជាតិលេខ ២ មុខរោងចក្ររបស់ខ្លួន ដើម្បីទាមទារឲ្យថៅកែចេញមុខមកដោះស្រាយឲ្យពួកគេ។
កញ្ញាបានថ្លែងថា៖ «កម្មករបានតវ៉ាតាំងពីថ្ងៃទី ១៧ ខែតុលា បន្ទាប់ពីថៅកែបានលួចយកអីវ៉ាន់ខ្លះចេញពីរោងចក្រ។ កម្មករមិនមានការងារធ្វើទេ ហើយយើងដឹងថារោងចក្រនេះចង់ប្តូរថៅ ឬបិទទ្វាតែម្តង ដូចនេះហើយបានជាយើងទាមទារប្រាក់អតីតភាពការងាររបស់ពួកយើង»។
សយ ណាគ្រី បាននិយាយទៀតថា កម្មករបានមកដេកយាមរោងចក្រទាំងថ្ងៃទាំងយប់ខ្លាចក្រែងមានគេលួចដឹកអីវ៉ាន់ចេញទៀត។
អ្នកនាង យ៉ុង លាភ មន្រ្តីសហជីពសេរីកម្មករបាននិយាយថា កម្មករកាត់ដេរនៅកម្ពុជាតែងតែទ្រហ៊ោយំ និងប្រឹងតស៊ូតវ៉ានៅពេលដែលថៅកែរត់ចោល ឬរោងចក្របិទទ្វារម្តងៗ។
អ្នកនាងនិយាយថា៖«ពួកគេមិនដែលបានទទួលប្រាក់របស់ពួកគេដោយសុខស្រួលនោះទេ»។
ប្រភពពី ភ្នំពេញប៉ុស្តិ៍