ទីបំផុត Apple អាចលក់ iPod touch បានចំនួន ១០០លានគ្រឿងហើយ
កាលពីម្សិលមិញនេះក្រុមហ៊ុន Apple បានអះអាងថា ពេលនេះផលិតផលិត iPod touch របស់ខ្លួនត្រូវបានលក់អស់ចំនួន ១០០លានគ្រឿងហើយ ។ iPod touch បានទទួលប្រជាប្រិយភាពជាឧបករណ៍សម្រាប់ចាក់ស្ដាប់តន្ត្រី ចាប់តាំងពីការប្រកាសចេញជាលើកដំបូងក្នុងឆ្នាំ ២០០៧ មកម៉េ្លះ ។ ដោយឡែកមកទល់នឹងពេលនេះក្រុមហ៊ុន Apple បានប្រកាសចេញនូវផលិតផល iPod touch បានចំនួន ៥ ជំនាន់ហើយ ។
iPod touch មិនមែនតែជាឧបករណ៍សម្រាប់តែចាក់តន្ត្រីស្ដាប់ប៉ុណ្ណោះទេ តែគេអាចទទួលបានអត្ថប្រយោជន៍យ៉ាងច្រើនបន្ថែមទៀតក្រៅពីនេះផងដែរដូចជា ចាក់វីឌីអូ ថតរូប និងថតវីឌីអូ លេងហ្គេមកម្សាន្ត ប្រើ GPS អានសៀវភៅឌីជីថល និងប្រើប្រាស់កម្មវិធីជាច្រើនទៀតដែលប្រហាក់ប្រហែលទៅនឹងទូរស័ព្ទ iPhone ដែរ តែខុសត្រង់មិនអាចប្រើ SIM សម្រាប់ Call តែប៉ុណ្ណោះ ពីព្រោះ iPod touch អាចប្រើអ៊ីនធឺណិតបានតែតាមប្រព័ន្ធ Wi-Fi តែមួយគត់ ។
សូមបញ្ជាក់ថា ថ្វីបើប្រទេសកម្ពុជាយើងគេមិនសូវនិយមប្រើ iPod touch តែឧបករណ៍នេះនៅតែទទួលបានប្រជាប្រិយភាពយ៉ាងច្រើននៅលើទីផ្សារ iDevice ។ យ៉ាងណាមិញសម្រាប់ម៉ូដែល iPod touch ជំនាន់ចុងក្រោយ ដែលមានអង្គផ្ទុកទិន្នន័យទំហំ 16GB គឺមានតម្លៃត្រឹមតែ $229 ប៉ុណ្ណោះនៅលើគេហទំព័រ Apple ៕
